القط الإسود 2

صباح الفل، القط الأسود بيسلم عليكو بيقول أن قضى أحلى الأوقات فى مصر، و أنه لو كان راح ف اى حتة تانية فى العالم مكنش إنبسط زى هنا، البداية كانت فى الستينات مع فيلم شئ من الخجل، سورى قصدى من الخوف لما شادية و يحيي شاهين صدقو أن الشعب هيعرف مصلحتو بعد ما يفتحو الهويس، بس الجزئ التانى عتريس إتعالج و بعد ما صالح العصابة رجع يحكم و رجعو البهايم يسقفوله،
 لو ساعدتك راجعت معايا الجزئ الأول من البلوج هاتلاقى أن بتوع المخابرات (أو المخابرات المضادة) بيراهنو دايما على الزهايمر المزمن اللى مستوطن فى أمخاخ الشعب المصرى، بس بنوع من أنواع التخلف العقلى: جو سبعيناتى ضايع أخر تلت حاجات،
 من النوع بتاع تاجر الخردة اللى سرق معدات من مفاعل الضبعة (لما تبطل ضحك كمل القراية عشان تعرف أنها مش نكتة ده خبر حقيقى) أو همة عايزنا نصدق كدة، فلتان أمن بعيد عنك،

و زى مثلاً أنهم أيام الثورة (لما التلفزيون الرسمى عمل صفحة على الفايس و "حافظو على مصر" و الجو دة) قالو أن فى أقسام كتير إتسرقت الأسلحة اللى جواها، و الحقيقي إنهم لما سابو الأقسام خدو السلاح، (دة عهدة يابا)، و قال إيه دلوقتى بيلاقو كل ربع ساعة نفس السلاح مع شوية ذخيرة (هم هم بردو) مع أحد المواطنين غير الشرفاء (اللى هو أساساً دوبلير ساقط تانية معهد فنون) و دخلنا دلوقتى على جو إنفلوانزا الخنازير (فاكر لما كلنا نزلنا رابطين وشنا بملاية السرير) بس على البهايم

بس صدقنى هم مش محتاجين المسلسل ده فى حاجة، بتسألنى ليه؟ أقولك أنا...

فى الفترة اللى فاتت كان الثوار (اللى لسة عايشين و متقبضش عليهم) قالو لا دستور أو إنتخابات تحت حكم العسكر، دلوقتى كله نسى و بقينا نتكلم عن المية المبشرين باللجنة و مين اللى هيدعم أنهى مرشح،

و خد بالك أن دة كلة كوم والمواطنون الشرفاء كوم تانى، الناس ناسية أساساً أن فى ثورة أو أن مبارك مابيحكمش دلوقتى أو أن بشار بيقتل السوريين أو أن البلكيمى هينزل الدويتو بتاعه مع تامر حسنى الأسبوع الجاى أحلى

الناس عندنا فى منطقة تانية خالص، لا مبالاه مستحيلة علمياً حسب المقايس العالمية المعروفة، و زى ما حسو إنهم عملو اللى عليهم فيما يخص الإسلام بإنهم يلتحو و يتنقبو، فهمة أيضاً عملو اللى عليهم تجاه البلد بإنهم حطو الصور بتاعتهم على البروفايل و همة فى إحتفال ميدان التحرير أو حطو صورة عماد عفت أو محمود عبد العزيز فى مسلسل رأفت الهجان

فنصيحة للمخابرات العزيزة: مع المصريين متقلقوش نهائى، لو الرسول (ص) قام من قبره و رشح نفسه فى الأنتخابات ضد أبو الفتوح، مش هييكسب لأن الإخوان مش عايزين الرسول، عايزين الدستور

البلد دى ماشية بالعصاية و لابسة البردعة و هيعيطو فقط لو البرسيم قل

سؤال اليوم: هتتابع إيه فى رمضان؟

سلام