عك، عك، عك
و السبب بسيط جداً، الإخوان عشان يضمنو أنتخابات 2010 (بعد ما داقو الكيكة فى 2005) كانو بيجندو بالهبل، و التجنيد ده أسلوب قديم أساساً، و بيعتمد على قصور فى المجنَد، و قوة تأثير المجنِد، و مالوش علاقة بإقتناع الناس بفكر الإخوان، لأن الإقتناع مش مطلوب بل بالعكس (حرام) "وَمَا كَانَ لِمُؤْمِنٍ وَلا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَن يَكُونَ لَهُمُ الْخِيَرَةُ مِنْ أَمْرِهِمْ"
فـ فى الآخر بيطلع لنا نوع من أنواع الزومبى اللى هو شخصياً ممكن يكون بنى آدم ذكى بس همة بيعلموه السمع و الطاعة، و بعدين يأكلوهم البرسيم و يحشروهم فى حظيرة كبيرة لها قبة، تبقى متوقع إيه غير العك؟
فى سبب تانى و هو الطمع، عايزين التشريعى (مجاس الشعب) و التنفيذى (الحكومة: و هو سبب المشكلة اللى بينهم و بين العسكر) و أخيراً الدستور و دلوقتى ناويين ينزلو حد يبقى رئيس، بس مش فاهمة السسبنس اللى معمول، طب ماهم كدة مش هايلحقو يلمو توكيلات خصوصاً قدام مرشح العسكرى "أبو سماعين" ، أيوة إنت فاكر إيه؟ ما العسكرى فهم اللعبة هو كمان، ولا هو مالوش نفس؟
طب بالهبل دة و النبى؟ هنستفيد من حكم الإخوان إزاى و همة لوحدهم، طب أنت تقدر تتفرج على ماتش الأهلى بيلعب فيه لوحده؟
الناس دى مش عارفة تلعب سياسة، بس هيعرفو منين و هم عذارى (أول مرة سياسة)؟
السياسة نظام أعلى من كدة بكتير، مش نظام الست أم فاروق اللى بتشرشح لأم إبراهيم فى البلكونة، دة فضايحهم غطت على فضايح الممثلين و المغنيين و لعيبة الكورة
و إحنا قاعدين إمبارح مع بعض عدى علينا الراجل الكناس و قاللنا:
"يعنى قومتو و عملتو ثورة و قلبتو الدنيا و بعدين ولا حس ولا خبر، إنتو فين؟"
سؤال اليوم: أنت "مطمن"؟
سلام
ليست هناك تعليقات:
إرسال تعليق