دستور.. هانصور

صباح الإستقرار

انا كنت قاعدة لا بيا ولا عليا لقيت صديق بيسألنى:

- طبعاً هاتروحى الإستفتاء؟

- لا البركة فيك انت

-لا إزاى لازم تروحى ده واجب على كل مصرى عشان الإخوان مايكسبوش

-(مايكسبوش!!) -ده فى سرى- لا الإخوان مش هايكسبو حاجة حتى لو الناس صوتت بلا ده كويس هايشوفو ايه وجه الإعتراض و يحسنوه

- لا طبعا هايكسبو دول بيعرفو ينظمو و يحشدو، لازم تروحى و تقولى نعم عايزين البلد تستقر بقى

-حاضر.. اكيد

انا عن نفسي عندى بعض الإعتراضات على الدستور (زى ميزانية الدفاع اللى من المنبع دى) بس مادام الكل مبسوط من الفقر و الذل و التعليم الفاشل و الصحة المتدهورة و تأخر سن الزواج لغلو اسعار البيوت، فإشطة انا ماعنديش اعتراض ولا مشكلة

بس المشكله جهل بعض الناس بالعملية الإنتخابية الديمقراطية

المشكلة تأخر الوسائل و سهولة التزوير

المشكلة قلة الوعى بنتائج الإستفتائات و الإنتخابات

مثلاً استفتاء على إعلان دستورى أو قانون أو دستور، مش معنى إقراره انه مش هايتغير و مش معنى رفضه اننا هانعيش من غير دستور و نغنى "يا عينى الدستور ضاع، يا عينى ده كان بصباع"

مثلاً انتخاب عضو من أعضاء مجلس الشعب له آلية لخلعه، و لو مش موجودة لازم تكون موجودة لأن من باب أولى نائب الشعب، الشعب اللى يشيله، مش المجلس!

انا ممكن اكون عندى اعتراضات على الدستور، لكنى رافضة رفض قاطع ممثلى لجنة الخمسين

ممكن أسأل اللجنة بتاعة الشو الإعلامى ليه كان نصها ممثلين و اساتذة فقه مثلاً

ليه دستور يمنع تكوين الأحزاب ذات الطابع الدينى يبقى فيها ممثلين لحزب النور السلفى

ليه يبقى فيها ممثلين للجيش و الطب و أبو الثوار و مافيهاش ممثلة لستات البيوت

و اهم حاجة خالد يوسف إزاى؟؟

انا اللى أعرفه ان اى دستور لازم يكونه قانونيين و حقوقيين فقط، الحقوقيين يقولو ايه اللى يتكتب و القانونيين للصياغة

انا اللى اعرفه ان الدستور عام و شامل، اما الفقرات القانونية بتاعة الرئيس و مجلس النواب و الحكومة مكانها القانون مش الدستور

و قبل ماترد عليا تقولى الدول التانية هاقوللك ان ده عقد اجتماعى بيقول ان الحكم للشعب و الشعب عايز حقوقه من اللى واكلينها

 لكن دى لجنة شو إعلامى

سلام

حاضر

كوكب اليابان الشقيق

إقرأ

سؤال:

لأى موظف حكومى أياً كانت درجته، إزاى يكون بإيده يغير ظلم و ما بيغيروش!

- فهمنى إزاى يكون فى أى خطر خارجى أو دولة معادية، حتى إسرائيل ممكن تبرر شر و عنف و دم على انسان مصرى؟

إحنا أكثر عداء لنفسنا، و أكثر خطر على حياتنا من أى حد تانى

- فهمنى ليه الجيش يحضر جلسات الموازنة العامة (بمعنى اصح وقت تقسيم التورتة) و يقول نصيبي كذا؟ (دستور مصر 2013)

ليه دولة فى حالتنا دى {الصحة + التعليم + البحث العلمى + البنية التحتية = صفر} و مش فى حالة حرب حقيقية، محتاجة حماية جيش و مبررله ياخد الفلوس دى كلها؟ (الإرهاب، مانا عارفة)

- فهمنى إزاى يكون فى كل بيت فى مصر كمبيوتر و مكتبة فى كل حتة و حالتنا الثقافية بالتردى ده (تردى دى عشان انا مثقفة و كدة)

- فهمنى إزاى فى القرن الواحد و عشرين فى عصر المعلومات و التكنولوجيا لسة فى فى مصر حد مش لاقى يشرب مياة نضيفة؟ أو يمشى فى طرق سليمة؟ أو يعيش حياة آدمية؟

لا انا عايزة أفهم بجد؟

يعنى بدل ما القوات المسلحة تقول: "ياخونا مادام بناخد مليارات من فلوس مصر إحنا قررنا نضم علينا وزارة البحث العلمى و البنية التحتية أو نشر الثقافة (اللى هى أول حماية ضد الارهاب)". بتقول: "انا عايزة أمسك طريق مصر اسكندرية و الم فلوس الكارتة" (اللى هى تعتبر ملاليم بالنسبة للى بياخدوه بس اهو يشغلو المجندين فى حاجة)

التجنيد الاجبارى فى بعض الدول الاسياوية و اعتقد فى روسيا بيخلى المجندين يشتركو فى محو الامية و رصف الطرق و تنضيف البلد و إحنا المجند عندنا يا بيعمر مزاجه على الحدود يا بيخدم الباشا و ولاده و المدام

الجيش المفروض وظيفته هى الحرب، و فى حالة السلم بيدرب المجند على استخدام الاسلحة و الاساليب القتالية، لكن بما ان هذا ما وجدنا عليه ابائنا و أهى سبوبة حلوة بردو استمرينا على الغلط.

- فهمنى إزاى دولة "المفروض" تخلصت من "الظلم" و "الفساد" بمظاهرات تحولت لعنف فى 2011 تلغى حق التظاهر و تلاحق مرتكبيه اكنها جريمة، ماهو كدة يبقى لو بقى فى ظلم و فساد اكيد مش هايدينى موافقة على اخطارى بطلب المظاهرة، ولا ايه؟

انا مش بتكلم ع السياسة و مش هاتكلم فيها، انا بتكلم ع المنطق

حاضر انا هاقول حاضر، انا مش خسرانة حاجة، انا عايشة كويس و بشرب قهوة فى كافيهات و بكتب بلوج فى اوقات فراغى، بس فكر لحظة ان مجرد "صدفة" هى اللى خلتنى هنا دلوقتى و خلتك بتقرا، مش نايم فى عشة صفيح فى المقابر ولا بتصرف على اسرتك بـ 800 جنيه فى الشهر

حاضر، هاسكت

سلام

لا تشرب هذا الدواء

الحكمدار قال للصيدلى إحنا دورنا مش القبض على المجرمين و تسليمهم للعدالة، إحنا دورنا الحفاظ على حياة المواطنين (و أنا أعيط) لأنى بكل بساطة الجرنان اللى مرمى جنبى كان بيوصفلى إزاى تم قتل محمد رضا على إيد "زملائه" تحت سمع و بصر الداخلية اللى هى فى نفس الوقت كانت بتضرب نار فى الهوا تحية للطلبة عشان اقتراب امتحانات التيرم

الحكمدار أمر بإن كل عسكرى و ظابط و كونستابل و مأمور قسم يدور على بنت أحمد إبراهيم أم فيونكة فى شعرها (و أنا أعيط) لأنى أفتكرت الظابط اللى أتكلم ادامى على كمية المحاضر اللى بتتحفظ أو بمعنى أصح بتترمى عشان مالهاش لازمة (و حقوق الناس معاها)

الحكمدار أمر بأن تنزل نشرة فى الأذاعة بتدعو المواطنين أنهم يساعدوهم فى أنقاذ حياة مواطن، (و أنا أعيط) و أفتكر إعلامنا المصون و المذيعة اللى بتقول المسحيين بيضربو الجيش و تدعو المواطنين للفتك بيهم، أو ان الظباط المساكين فى النت و التلفزيون فى التوك شو مزعورين و خايفين و محتاجين الصدر الحنين

الموضوع بسيط و سهل، طول ما فى فساد فى الداخلية عمر ما البلد هاتعمر، لا تقولى فوضى ولا بتنجان، ده اللى مالوش خير فى حاتم مالوش خير فى مصر

طول ما تجار المخدرات بيتوزعو جغرافيا على البلد و بيتاخد منهم ضرايب فى صورة فردة لأصحاب السلطة، طول ما البلطجية بيشتغلو بإدارة رسمية حكومية، طول ما وسيلة الامان هى أداة الفوضى، طول ما الردع بيستخدم تبع المصالح الشخصية و الواسطة، طول ما المهم الترقية و المرتب و رضا الرؤساء، مش أمن الناس و حرمة حياتهم و بيوتهم و ممتلاكتهم يبقى العلاج هو سبب المرض و يبقى الحل الوحيد زى ما قال الحكمدار

لا تشرب هذا الدواء بالدواء سم قاتل 

سلام

العدد فى اللمون 5

رحنا ولا جينا أفكارنا مابتفرقش، لأن الاعلام أقوى، و الاعلام مابيقنعش المواطن الشريف بالمنطق أو الدليل (حاولت الاقى ومالقتش) لكن بيقنعو بالزن على الودان، و أكتشفت انك ممكن تنسى اللى عايز تفتكرو و تفتكر اللى عايز تنساه

فتلاقى ان المقاتل نيلسون مانديلا أو الحرفوش الشاعر نجم موتهم كان فاجعة و صادمة (مع انهم الاتنين فى أرذل العمر) و فى نفس الوقت محمد رضا بقى زى جيكا و زى الف شاب مالحقش حتى يحلم بمستقبله، دمه اتنسى، و موته بقى منطقى

المهم انى لقيت نفسى بين خيارين أحلاهم مر، الاخوان و مرسيهم، و العسكر و سيسيهم و الاتنين الدم عندهم أرخص من مية المجارى

بس أرجع و أقول محمد رضا بالذات لا

أصل انا أموت مش مشكلة، انا ضد الظلم فلما الظلم يقتلنى هابقى عارفة الرصاصة جاية منين، لكن محمد راح يتعلم و هو بيحترم النظام، أو بمعنى أصح مستسلمله، عايش مجبر فى بلد مابتحترمش حرمة صرح العلم، حرمة الجامعة، مش هاقول حرمة الدم لأن كلنا عرفنا خلاص ان مادام مالناش واسطة ولا فلوس ولا نفوذ يبقى دمنا مالوش حرمة

يعنى ايه ادفع فلوس (ضرايب) بدل مايتحسن بيها مستوى المعيشى يتعمل بيها صفقات سلاح و قنابل غاز مع شركات السلاح الامريكية؟

يعنى إيه اروح اتعلم، فالداخلية تيجى تضرب عليا خرطوش و رصاص؟

يعنى ايه أقول لا، فيقولولى ماحدش يقول لا للكبار

لا هاقول لا

هاقول لا من غير ما استأذن، ماحدش بيستأذن الرفض

هاقول لا من غير ماكون عميلة أو كافرة أو بلاك بلوك

لا مش هاتستنى وصمة الاعلام

(إفشال الدولة، توجهات خارجية، الفوضى، الارهاب)

انتو عايزين الفراخ فى العشة تستنو كل يوم البيضة وتاكلوها، لحد ماتبطل فتدبحوها، لا الفرخة تقول لا لسرقة بيضها ولا الفراخ زمايلها يعترضو على موتها

سلام

نور عينينا

احنا ماعندناش ادنى فكرة يعنى ايه دولة

انت لو نزلت سألت اى شاب جامعى أو راجل ببدلة و كرافتة ايه هى السلطات الثلاثة للدولة هايقولك لا دول اربعة الكول سلو و الطحينة و السلطة البلدى و بابا غنوج

هيبة دولة ايه؟

الدولة احنا .. المواطنين، اللى دمهم بقى ارخص من مية الطرشى، اللى بياخدو احكام و يضربو بالخرطوش عشان مايفتحوش بؤهم فى وش اسيادهم، و مادام هيبتنا راحت ماحدش له هيبة

يعنى ايه يتم اصدار قوانين و دستور فى غياب ممثلين للشعب، مين اللى بيعمله؟ مين اللى بيكتبه؟

مين قال للقضاء ينام و يشخر ولما حد يرفع قضية امام القضاء الادارى بفك الحظر يتقاله ان الحكم القضائى مجالناش بيه اوامر

اى نوع من انواع الدول اللى بدل ماتقضى على فساد الشيوخ تستقصد الشباب بالضرب و الفصل و الحبس بالحداشر سنة؟؟

احنا دولة نيابية يا افاضل، ديمقراطية يا بشوات ياللى بتحكمونا و انا ماعرفكمش، يعنى الحكم لينا مش ليكو، و احنا ماخترناكوش و ماحدش يقولى التفويض.. تفويض ايه احنا مش عاجزين

احنا نزلنا و بننزل اودام ضرب النار بدون سلاح و انتو لحد دلوقتى بتجيبو بلطجية، و دلوقتى عايزين تقتلونا ميرى عشان احنا "مخربين" و "بنعطل بسكلتة الانتاج"

المخربين اللى سمحو للمجمع العلمى يتحرق و كان ممكن يتطفى زى مجلس الشورى لما اتحرق عشان تقولو علينا بلطجية و مخربين فى الوقت اللى الشباب كان بيرمى نفسه فى النار عشان ينقذ الكتب

اللى بيعطل عجلة الانتاج هو اللى بيصدر قوانين تعسفية تقضى على احلام اى شاب عايز يبتدى مشروع و تدى اى مستثمر اجنبى كل التسهيلات عشان احنا نفضل مذلولين للغرب اللى بيدفعو رشاوى للموظفين و نشتغل بالمؤهل العالى ويتر و محاسب و موديل اعلانات

احنا اللى مستمرين فى خراب الاقتصاد سنة بعد سنة عشان الناس تفضل فقيرة و ساكنة فى عشوائيات و مذلولة بلقمتها و تشتغل عند الباشا مرشد و بلطجى تبع الحكومة

فصل قوانين، لو كانت القوانين و الرصاص بيحمو  كانو حمو مبارك

سلام

بص العصفورة 2

عندى عن التحرش الجنسى فى مصر صورة مختلفة للى هاتسمعه او هاتقراه فى اى حتة تانية، و عندى قبل ما ابدأ شوية ملاحظات هاتخليك زيي تتعاطف مع المتحرش المسكين  اللى كل الناس ضده مع انه ضحية فى الموضوع ده

1 المتحرش الجنسى، امرأة أو رجل (أيوة فى ستات بتتحرش برجالة للأسف) دايماً شخص غير مقبول جنسياً و شايف نفسه أو اللى حواليه بيصفوه انه شريك غير مقبول خصوصاً للمتحرش به، يعنى لو بيتحرش بحد أغنى منه، او أحلى منه أو أصغر منه، لأن منطقى ماحدش هايتحرش بحد ممكن يقبله و يوافق عليه كشريك جنسى فهو دايماً فى حالة ضعف

2 المتحرش الذكر مجبر من مجتمعه انه يتحرش (ايوة و نزل ايدك احنا بنتكلم) ايوة مجبر و إحنا اللى جبرينه، مش من مبدأ البنت لابسة ايه او نازلة الساعة كام او رايحة فين كل دة كلام فاكس مايسواش تلاتة مليم، عن تجربة (انا نزلت بعد اتناشر باليل و سط قهوة و فى الشارع ماجراليش حاجة، و على العكس فى عز النهار و من ناس غريبة بيعاكسو و قدام الناس و الناس لطيفة و يا قمر يا عسل و كلنا بنضحك فى الاخر مع بعض -مصريين فى بعض يا اخ-) مجبر من الـ (peer pressure) و من اننا مش هانقبله لو مش بيحب الستات لأن حب الستات علينا حق حتى لو الرجل ده شاذ و الستات مابتعجبوش

3 المتحرش لغير الاغراض الجنسية، و ده عادة بيبقى طفل او مراهق (من 7 لستاشر سنة) ده بيبقى اتنشن هورينج، او باحث عن الانتباه، بمعنى هو مش بيدور على متعة جنسية، لا ده بيبقى بيدور على اهتمام (ايوة عايز يتحضن من امه اكتر) زى اللى بيركب موتوسيكل صوته عالى و يخمس بيه، أو اللى بيصبغ شعره أزرق او بيتطرف دينياً، مجرد بيقول "انا اهو بصولى"

طبعا ده مش موضوعى أصلاً انا موضوعى قانون التظاهر الجديد و المحاكمات العسكرية للمدنيين، بس لأنتشار العصفورة الجديدة و هياجنها دلوقتى مع حملة أضربها فى عقلك او صلحها X دماغك، النهاردة يا عمدة، فقلت اقولك على اللى فيها مع ان لا يخفى عليك خافية

اصل التحرش فى مصر طلع امبارح الصبح، و البلد اتعدلت و الناس لاقيا شغل، و الشوارع نضيفة و السطل مش من مكارم الاخلاق فى مصر و مافضلش غير شوية شباب هايجان حيحان على ذاته هو الغلطة اللى فى بلدنا و نسيب البشوات الكبار يمصو فى دمنا و احنا بنلطش فى بعض زى الهبل، و نعمل مؤتمرات و مناقشات و مسيرات و بانرات واكتبى يا صحافة

مانا لو فى السويد ولا النرويج كنت قولت عندكو حق لكن بلد كل حاجة فيها مشقلبة و جاين تعملو زى حجاج عبد العظيم فى صعيدى رايح جى يسأل هانى رمزى بعد ما وقعو فى الترعة:

الحتة دى فيها وساخة؟

لا.. انت زى الفل

سلام

الداخلية: عندنا خرطوش، عاوز؟

تم بحمد الله اصدار قانون مضاجعة الوداع المدنى المسمى بـ

"اذا كنت يا مواطن زعلان منى استأذنى قبل ما تشتكينى"

أو فى قولاً أخر:

"القانون رقم 107 لسنة 2013 الخاص بتنظيم الحق في الاجتماعات العامة والمواكب والمظاهرات السلمية"

المظاهرة: يسقط يسقط حكم مبارك / العسكر / المرشد / القفة ام ودنين / السبكى / ألخ... تعنى انا مش عاوزاك.. مش مؤمنة بسلطتك عليا، لا تمثلنى.. طلقنى يا متوحش طلقنى، فأكيد ماينفعش استأذنك يا كابتن، ولا ايه؟

يعنى مش كفاية علينا بكاء المنطق من مظاهرات الاخوان "المؤيدة" (بحبك اتجوزنى يا مدحت) (انت متجوزنى؟ طيب اتجوزنى تانى و النبى).. لا كمان المنطق سايباه بيصارع الموت على فراش المرض من "روحت القسم تاخدلنا معاد الجمعة دى ننزل نتظاهر ضد التعذيب فى الاقسام؟" "لا بيقولو ماعندناش" "معندهمش ايه؟" "ماعندهمش مواعيد فاضية الشهر ده"

لا و اسامى و بطاقة الراجل اللى عامل المظاهرة لو على مزاجنا و لو مش على المزاج، يبقى غرامة تلاتين الف جنيه لمجرد التفكير و اعلم سيدى المواطن انت فى القلب

و لو المظاهرة طولت او زهقو منها اشطة هايحولو المشاريكين فيها لمنخل لأنهم قالو بدل ما يطلع وزير الداخلية يقول معندناش خرطوش هانخلى الخرطوش قانونى

ده انا كدة حتى مش هاعرف اتظاهر و انا بشرب شاى مع ابو اشرف، هايقولو بهييج ابو اشرف و بضايق المواطنين الشرفاء، الله يمسيك بالخير يا سعد
مافيش فايدة

كفاية ابهار يا مصر

سلام

7 رصاصات غادرة

انا فى شغلى زى مانا، حتى من تلات سنين..

و بعدين اترقيت من سنتين و اترقيت تانى السنة دى

انا فى شغلى و انا مابفهمش فيه.. انا مدرس.. محاسب.. مراقب.. ملاحظ

انا عقيد.. و بقيت عميد

انا موجود عشان مافيش محاسبة بالرغم من ان فيه عقاب.. عقابنا فى حالة من اتنين

اللى مابيسمعش كلام الكبار

اللى بيتقدم كبش فدا للرأى العام

انا زى مانا و انت بتتغير، بتتعمى .. بتتكسح و بتموت..غرقان فى مركب.. مريض فى سرير حكومى.. برصاص الداخلية و الدفاع اللى معندهمش قناصة ولا خرطوش

انا عندى اسرة زيك بالظبط.. بس انا محتاج الستين الف جنيه فى الشهر بتوعى، انا عندى ولد و بنت بسم الله ماشاء الله عليهم.. بيدرسو فى جامعات بلاد برة

انا محتاج الموكب اللى بمشى فيه و باقفل بيه الشارع، انا لازم أوصل بدرى امضى على ورق و اتكلم مع ناس، و اقعد امضى و اتكلم و امضى و اتكلم و اقبض ستين الف جنيه و اروح الشغل بدرى و اعلم ولادى برة

انت مش محتاج بلد، مش محتاج نظام، مش محتاج محاسبة، مش محتاج اكل نضيف، مش محتاج مياة اصلاً او لو جتلك مش لازم تكون نضيفة اوى يعنى، مش محتاج تعليم كويس لولادك، ايه المشكلة لما مدرس يخرق عين ابنك ولا ابنك يتفصل من جامعته عشان عبر برأيه السياسى المخالف لأتجاه الدولة العام، ما فى داهية مستقبله، هو لو كان حتى اتخرج كان هايلاقى شغل؟

ايه المشكلة لما تركب قطر و تموت، تتعالج فى مستشفى حكومى و تموت، تعبر عن رأيك أو تطالب بحقك فى حياة محترمة زى حياتى و تموت

انت شاغلنا بموتك ليه يا اخى.

موتى انا اللى مصيبة، رصاص قتلك انت مش موجود ماحصلش لكن رصاص قتلى رصاص غادر، شرير و شيطانى، ماستحقهوش حتى لو انا كنت السبب فى قتل الملايين بسكوتى و وجودى فى نظام فاسد ماحولتش اصلحه

ايه المشكلة لما تلتين البلد مش عارفين يعيشو، و نص البلد مش لاقى يكمل لأخر الشهر و تلتهم عايش فى عشش صفيح؟؟ ايه اللى جرى يعنى؟

انا مش هاخلى الدولة و الحكومة تشتغل عشان البلد، انا هاخلى البلد تخدم نظام مكون من بضع افراد او بضع عائلات، بيستفيدو من جوع ملايين، و نكبة بلد

لازم تعرف حدودك و حدودك هى انك تفكر على طول فى مصلحتك المباشرة، عشان تفضل خايف و مستنى اللقمة و بتقول: "ما يموتو و انا مالى؟"

سلام

صباحية مباركة

زى أى اتنين متجوزين فى اول سنة جواز بيبقى دايماً فى صراع ناعم على السلطة (لا مش السلطة الى بتتاكل)

و عموماً الست (الشعب) بيبقى عارف ان من واجبه الانصياع و الدلع على جوزه يا أسماعيل بيه

سورى، عذراً انا دخلت فى الموضوع من غير ما أسلم و أصبح، بس انت مابقتش غريب خلاص، احنا بقالنا سنتين اهو، و فى خلال السنتين دول (و بمناسبة اننا فى نوفمبر) أكتشفت شبه كبير جداً بين العلاقة السياسية بين الحكومة و الشعب و العلاقة الجوازية بين الراجل و الست (الله يمسيك بالخير يا باسم انت و جماهير)

يعنى مثلاً فى مرحلة  نوفمبر 2011 و ما بعدها (أحداث محمد محمود الاولى و التانية "إبان" حكم المجلس العسكرى) خناقات أول الجواز، لازم يبقى فى علقة جامدة، و الغربال الجديد له شدة و كدة

فى اوائل 2013 بعد نصف عام من حكم الحاج مرسى و عشيرته وقفو حلقة من حلقات باسم يوسف عشان الست ماينفعش تشتم جوزها اودام الناس، و أحداث الاتحادية لا تخفى على بشر، و خصوصاً لو الزوج شرقى و ذو مسحة وهابية

المهم ان الست مالهاش الا جوزها الاولانى، بس كان لازم وجود محلل، و المحلل فى حالتنا كان دستورى

و فى كل الحالات لازم نعرف ان حتى لو الست هى اللى بتصرف على البيت (الضرايب و ملك ابوها) و حتى لو الزوج ده عاطل ولا ليه شغلة ولا مشغلة و مأجر بيتهم للغرب يشتغلوله فيه، و حتى لو هو مجوعها و بيصبحها بعلقة و يمسيها بغلقة او فتحت بؤها و أشتكت، بس بردو

الست مننا يا شعب مصر مالهاش الا جوزها

سلام

شؤون المواطنين

تعرف كاتب اسمه نبيل فاروق؟

الراجل ده عظيم و مؤلف خياله واسع و مؤمن بالدولة المصرية القادمة، و الراجل ده سبب من اسباب توهم جيل كامل فى مصر ان اسرائيل حطانا فى دماغها، بس ايه.. هاتروحى مننا فين يا اسرائيل، ده يا ارض اتهدى ما عليكى ادى، و مصر ام الدنيا و هاتبلع الكرة الارضية و نبقى اد الدنيا

بس الحق يقال، هو صحيح واسعة اوى (مننا و من اسرائيل) انها تحطنا فى دماغها، خصوصاً و احنا فى مود التدمير الذاتى ده، لكن بردو حدانا ناس بتفهم و بتشتغل، (هم فرصتهم فى الفلسعة بتكبر و خصوصاً اننا مش عايشين فى مصر كـ بنى ادمين) بس املنا فيهم و فى ربنا كبير

المهم

وجود جهاز مخابرات لبلدنا يعتبر شئ اساسي زى المياة و الكهربا خصوصا فى دولة على طول فى حالة "قلاقل"

وجود جهاز شؤون معنوية مهم بردو، لأن أكيد العدو الصهيونى الشرير ابو رجل مسلوخة (ايوة اللى حططنا فى دماغه) أكيد بيثير حالة من الأحباط و الاكتئاب بين افراد الشعب المصرى (ايوة ماتبصليش كدة احنا اساساً شعوبنا من اسعد شعوب العالم بس حالنا مال من الناس الشمال اللى بيغشو الحشيش)

اما بقى استغلال فلوسنا و مواردنا و نفس ذات الجهاز عشان نمجد فى الرئيس الاله، اهو ده اللى ماسكتش عليه ابداً

نفس ذات الجهاز قال على اعداء مبارك أجندات و بتوع كنتاكى و امريكا و اسرائيل، و نفس ذات الجهاز بيقول دلوقتى ان الجهاديين أخطر من اسرائيل و امريكا و اهل المريخ، (هم أخطر لأن صديق غبى أخطر من عدو ذكى)

لا يا شؤون، احنا مابيضحكش علينا، لسة بنعرف نفرق بين الفيديوهات إنتاج السبكى و الفيديوهات الحقيقية و عارفين كويس حدود كل واحد و قدراته، عارفين ان اللى بيحكمنا واجهة، و عارفين ان البيزنس و الفلوس اهم من الدولة اللى بيتم تفتيتها بإستخدام الاحتكار للشركات الاجنبية و تخريب الأنتاج الزراعى بالتقاوى المضروبة و منتجات مونسانتو و السماح بالبنا على الاراضى الزراعية، و ردم نهر النيل، و إحتكار سينا لصالح الاجانب و الاسرائليين، عدو ايه اللى جاى تقول عليه؟ انت قبلا تعرف معنى العدو ايه؟

حاجة واحدة بس اللى احنا بنعملها ضد إسرائيل، بندمرلهم البلد اللى عايزينها عشان لما يجو مايعرفوش يعيشو فيها

سلام

سيدى المواطن

سيدى المواطن.. طز فيك

(مش انا دى الحكومة اللى بتكلمنا)

انت فاكر نفسك أبن مين فى مصر (المفروض انك عارفة يا حكومة) انت يا مواطن انت.. تعالى .. قرب.. انا مش هاضربك، انا هاعرفك غلطك بس

سيدى المواطن، انت فاكر انك ليك حقوق؟؟ (اه الدستور بيقـ..) أخرس خالص.. الدستور ده تبله و تستحمى بميته، انت تقف فى طابور عشان نختملك ورقك، تتذل لموظف عشان تفتح دكانك، انت يتقطع عليك مياة و كهربا و تسكت خالص ولا كلمة، احنا الخرا اللى نحطهولك تاكله و تبتسم و تقول الحمد لله

سيدى المواطن، انت فاكر ان احنا ممكن نقفل باسم يوسف عشان شتمنا؟ انت عارف باسم يوسف ده تمنه اد ايه؟ ده ثروة من ثروات البلد، بص مالكش انت دعوة، دى اسمها مفاوضات خليك انت فى ستار اكادمى

عارف سيدى المواطن، البقر؟ عارفه (اه بحب الممبار اوى) كويس انك عارفه، احنا بقى عايزينك تاكل ممبارك و تخليك فى حالك تتعلف و تتحلب و انت ساكت و لما مايبقاش لك عازه هاندبحك عشان تتاكل و جلدك يتعمل جزم

سيدى المواطن: انت عارف ان لا السيسي و لا الببلاوى ولا عادلى بيحكمو البلد؟ انت عارف ان اهم حاجة اللى بيحكم ده يحكم من غير ما يتعرف عشان لو اتكشف ماحدش يعرف يجيبه ولا يحاكمه؟ انت عارف ان الاخوان (اه ولاد الـ...) ايوة شاطر يا مواطن صح، دول كل خطرهم انهم مشيو قانونى و هم بيخربو البلد، انهم عرفو اللعبة بتتلعب ازاى، و انهم لازم يتدمرو تماما عشان مايبقالكش عصاية تانية تتسند عليها (عصايا!)  و ان اى كيان تانى هايطلع خاين و عميل و بتاع امريكا و اسرائيل

كلمة اخيرة

سيدى المواطن: شكراً روح لأمك


سلام

باسم يوسف +18

انا مش هاكتب عن باسم نفسه، و لا السيسي، و لا السياسة، انا هاتكلم و بصراحة عن العضو الذكرى

فا لو فيها حساسية لأى حد ممكن مايكملش قراية و ياخد المختصر المفيد فى الجملة دى: إحنا مجموعة من المرضى

إزيك يا عبفتاح: عارف لما واحد مصرى يقول، انا سايب و عايز حد يلمنى؟ (صعبة شوية مش كدة؟؟) طب و إيه رأيك لما نفس هذا الشخص يقول: انا عايز اللى يلمنى يكون دكر بزبر كبير؟ (هو أنت عايز إيه بالظبط؟؟)

طب انت عايزه بزبر أصلاً ليه؟؟ هايفرق فى إيه الزبر من الكس؟ طب إيه رأيك فى رئيس بزبر بس مالوش فى الستات؟ له فى الازبار زي الشخص ده كدة؟

فيجيك الشخص يقولك، لا انا عايز رئيسى يكون بينام مع ستات بس مش شرط مراته بس ستات (انت متخيل ان ميول رئيسك الجنسية هاتفرق فى أسعار الزيت و السكر عند البقال؟)

انت بتدور على حد متدين عشان هو اللى يخش الجنة فبتجيب مرسى، عايز حد بزبر و "دكر" عشان هو اللى يكون مثار جنسياً و نشيط جنسياً (دى الله أعلم بيها) على طول

بلاش كلام عن الرياسة، خلينا فى باسم

نفس القصة: انا راجل بزبر.. انا راجل بزبر، من أول كليشيه "المزة اللبنانية" لحد تجريده من رجولته (قرصه فى بضانه)  كناية عن العجز الاعلامى فى حرية التعبير

حد واحد بشرى (بزبر أو بدون) يفهمنى أيه جدوى ان اى شخص بيشتغل عندى كـ رئيس او مدير مصلحة أو كهربائى يكون ذو زبر؟ (أفهمها و أموت)

سلام

الطوارئ للجميع

مساء الفل، انا لسة بتناقش مع احد الاخوة السيسييين الماسوخيين، اللى لما السيسي بيضرب بيقولو "كماااااان" (عبعال الجرجاوى ريا و سكينة)

و مازال الدفاع المستميت عن قانون التظاهر و الطوارئ، فقلت مابدهاش بقى

الموضوع هو ان البلد كانت بتقفل من تسعة تسعة يا مؤمن، هاتقولى ماهو دلوقتى بقت من واحدة

هاقولك يعنى هو الاربع ساعات حظر هما اللى هايكبدو على المجرمين الاشرار؟؟

أدينى عقلك و امشى حافى، هم "الاشرار" بيستنو الليل يليل عشان تستولى عليهم الروح الشريرة المذؤبة عند أكتمال القمر، فيرتكبو أشنع الجرائم و يقطعو الحرث و النسل، فبنخاف على مواطنينا الابرياء لا يقعو فى ايدى "الاشرار" فعملنا الحظر؟؟

طب سيبك من الحظر خلينا فى قانون التظاهر

ممنوع الاعتصام (البيات)، ممنوع التظاهر عند مجلس "الشعب" ممنوع التظاهر عند الداخلية و الدفاع و الرياسة و اقسام الشرطة و ماسبيرو و أى منشئة حيوية (نشيطة يعنى) مسافة مائة متر، ممنوع التظاهر بدون أذن و تصريح و معاد، ممنوع التظاهر بعد مواعيد التظاهر (التظاهر لحد قبل فيلم فوكس بتاع الساعة عشرة) ممنوع التظاهر بهدف تغيير النظام (نعم يا عمر؟؟؟) (ايوة)

قولولى انتو عملتو ثورة ليه؟؟

طيب

انا هامسك علم جنب أبو أشرف البواب و إحنا بنشرب شاى فى صمت معبرين عن أمتعاضنا من أداء الحكومة

طب سيبك من الحظر و قانون التظاهر، خلينا فى الطوارئ

الطوارئ يا سيدى يعنى حضرتك تشير بوست عجبك على صفحتك، تتاخد من بيتكو من غير ما كلب فى الشارع يبدى أعتراضه فى صورة نباح

و أهلك يا ولداه يلفو عليك الاقسام مايلاقوكش و تخرج من المعتقل بعد سن اليأس

الطوارئ يعنى أحقر أمين شرطة (مش كوظيفة، لكن كأخلاق) يوقفك فى نص الشارع و عز الضهر يفتشك و يقلب موبايلك

الطوارئ يعنى ظابط فى المباحث يتجسس عليك و انت بتكلم خطبتك و يسجلك المكالمة من غير أذن نيابة لمجرد الترفيه فى ليالى الخريف الباردة اللى احنا فيها دى

الطوارئ من الاخر يعنى سقوط كل حقوقك الدستورية حتى حقك فى الحفاظ على حياتك أثناء الاستجواب

و الكلام ده مش على الاخوان بس ده لينا كلنا

خلاص يا حكومة انا مابقتش اخاف زى زمااان لا

انا بقيت أخاف أكتر

سلام

العدد فى اللمون 4

كلنا فاهمين الاعلام يعنى ايه

ولكن من باب التوكيد احب أعيد تعريفه بصورة مبسطة

الاعلام هو التلفزيون و الدش و الجرنان و التويتر و فيسبوك و تمبلر و كايرو زووم (كايرو زووم!!) و البلوج ده

الاعلام هو كل ما شاع بين الناس (المنتخبين) او المؤثرين عليهم و وظيفته ببساطة:

صنع الرأى العام

الرأى العام محتاج اتنين (لا مش احمد ومنى) محتاج الهندى و الشجيع، الطيب و الشرس، عمرو دياب و تامر حسنى، توم و جيرى

و الرأى العام عمل كدة فعلاً: السيسي و الاخوان

أفتح اى جرنان او اسمع اى برنامج هاتلاقى حاجة من اتنين، 1 انجازات الحكومة (معاشات، حد ادنى، اسعاراسترشادية، بتنجان بالملوخية) 2- مصايب الاخوان (تفجيرات سينا، قنابل أكتر من ديلرز الحشيش، و أخيراً مظاهرات طلبة الازهر)

و الاخوان لعبو نفس اللعبة دى "أعداء الله الكفرة الليبراليين و العلمانيين" ايام ما كانو فى السلطة

و زى ما كنت ايام محمد مرسى عايز تكره "الرأى العام" فى حد فتقول عليه الملحد كلب امريكا عدو الله، دلوقتى بردو ممكن تكره الناس فى اى شخص أو جماعة و تقول عليهم مواليين للإخوان (جامدة جداً مواليين دى)

و على فكرة الاعلام شغال حلو اوى بسم الله ماشاء الله عليه، فلو وانت بتقرا البلوج قلت فى بالك، عندك حق شوفت الاخوان بردو طلعو زبالة و انقلب السحر على الساحر، تبقى تبع أعلام السيسي، و لو قلت عندك حق الاعلام مشيطن الاخوان و ممجد السيسي تبقى بردو تبع أعلام محمد مرسى اللى بيقول كلهم عملاء الغرب الكافر

عارف أمتى ماتبقاش تحت تأثير حد؟؟ لما تقول

عابوكو كلكو

سلام

السرطان 3

الوراق و القديسين و حماس و الشعر الاصفر

أزيك كدة؟ مش كويس؟؟ و الصحة؟ عال العال؟؟

طبعاً كلنا عارفين قذارة و دنائة الاخوان

و كلنا بردو عارفين إجرام و إرهاب حماس و فتح 

و كلنا عارفين اننا أوساخ بوجه عام و أن من ضمننا ناس مصريين زينا شربو من نيلها و جربو يغنولها ولما فشلو إشتغلو فى أمن الدولة و الجيش و الداخلية، و انتقمو مننا عشان ماصوتنالهمش فى ستار اكادمى

ده غير الحالة المتأصلة جوانا من زمان وهى التفرقة الدينية بين اصناف الشعب المصرى (لا مش اطياف)

يبقى مين اللى ضغط ع الزناد؟

لا ماتقوليش اجندات لا اقوم ارمى نفسى من فوق برج القاهرة، فى إيه؟ هو كل واحدة مش عارفة تمشى تقول الارض عوجة؟؟

 تعالى نراجع المشتبه فيهم

الارهاب بوجه عام واللى يقع تحت بنده حماس و الاخوان:

العمليات الارهابية يأما بتبقى انتقامية (11/9) يا إما بتبقى تحت إشراف حكومى (11/9) بردو

ايوة بس دى عملية تخويف، توصيل رسالة، لاهى حصلت عملية ارهابية متكاملة ولاحتى عمل انتقامى

و كان ممكن، لو احنا عايشين فى دولة مش فى إسطبل، ماتحصلش اصلاً، كان ممكن لو فى امن، لو فى نظام، لو فى أعلام، لو فى لو فى

بس كل حاجة مريضة بالسرطان

كله عيان

الداخلية عارفة السلاح فين فى البلد و ساكتة مقابل ان عدد معين من الجرائم تتمسك عشان البشاوات يبقى اسمهم عملو شغلهم و يترقو، و لو ظابط جديد لسة مؤمن بمبادئ و افكار صالحة بيعرفو يعدوه ايوة يعدوه بالمرض، و يمشى ع النظام المريض

و احنا عارفين بس بنسكت عشان لقمة عيشنا، و عشان ماحدش بيتكلم، عشان بنقلد بعض

و حكومة بوجه عام غسلة ايديها و متوضية، الوزير بيقول: انا بعمل اللى عليا، و المدير بيقول انا بعمل اللى عليا و المهم لقمة العيش

لقمة العيش اللى مكتفانا و ذلانا و مكفرانا

و للحديث بقية

سلام 

السرطان 2

السيسي مش رئيسى ده وزير الدفاع، و هو أكثر شهرة من الرئيس (ايون زى إسرائيل كدة اللى ماحدش يعرفلها رئيس لحد دلوقى) و السيسي مش جاى بالصدفة ولا بالترتيب الوظيفى ده تم فرضه على الاخ قطونيل، عفواً اقصد قنديل من قبل اتفاق بين الجهات السيادية للدولة و الجهات السيادية للأخوان

السيسي زيه زى أى حد فى مصر مواطن بيدفى صدره بالبنطلون، بيخاف على بيته و عيلته، مستنى مرتب اخر الشهر (ايوة الدشليون جنيه اللى بياخدوهم بتوع الجيش)

السيسي عبارة عن أسم، ناس بتدافع عنه بإستماته كأنه صلى الله عليه و سلم، و ناس بتلعن سلسفين اللى جابوه ولا كأنه الشيطان الرجيم

و هو فى الحقيقة زيه زى عدلى منصور و حازم الببلاوى و عم عبده بتاع البوفيه موظفين على زمة الحكومة

اللى بيحكم البلد حقيقي و زى ما قولت قبل كدة هم رجال البيزنس و الوسطاء، مافيش حد عاوز مصلحة المواطن، هم عايزين عيشته و نهمه و محفظته، لو مات او شبع او افتقر، يترمى فى الزبالة

نرجع للمهم

كمل جميلك يا سيسي، إزاى؟؟ هو خدمنا فى إيه؟؟

- انتى مجنونة، انتى ناسية انه انقذ مصر من الاحتلال الوهابى الاخوانجى؟؟

تمام حصل و زى ما فؤاد المهندس قال: على يدى، بس زى ما قولت قبل كدة ده كان لسبب اهم، ان موقف مبارك / التحرير مايتكررش، ان الناس ماتحسش انها تقدر تغير، ان لازم حد كبير يغيرلهم (البامبرز ايوة)

مانت لازم تعتمد على الحكومة، و الا مش هاتحس بلازمتها و انها مابتقومش بدورها و انت كشخص غيرت رئيسين فى تلات سنين تقدر تغير عشروميت حكومة فى اسبوع، و ده ضد مصلحة البيزنس و الناس اللى بتسهل البيزنس ده فى الحكومة

ايوة لازم الوسيط الحكومى يكون مستقر و محافظ على مركزه، و لازم انت كمواطن تكون مستهلك شره بتشترى و تخرج و تصرف فلوس و مالكش دعوة باى حاجة زى الارض، و الدخل القومى و فلوس قناة السويس

دى بيتبنى بيها فلل برة للوسطاء الحكوميين

و للحديث بقية

سلام

السرطان 1

دى مقدمة، فهاحاول أخليها بسيطة على اد ماقدر

25 يناير 2011 كانت محاولة أستكشافية لعلاج بلد يحتضر، كل اللى حصل هو إزالة قمة جبل الجليد مع الاحتفاظ بتسعة اعشاره تحت الماء
30 يونيو 2013 تكرار نفس المحاولة البائسة، بس كانت أذكى فى الطريقة، تم التخلص من الراس و الرجلين فى نفس الوقت، بس المشكلة ان المرض استمر ان ماكنش حصل انتكاسة

عارف عرفت منين ان مافيش امل؟

اتفرجت ع ماتش مصر و غانا؟

بالظبط

المشكلة مش الترفيه؟ لا المشكلة ان الشعب العظيم العريق قعد فى بيته (90 مليون مواطن) عشان يتفرج على 23 راجل بيجرو بشورتات (23 ايوة انت بس نسيت الحكم)

السرطان منتشر و مالوش علاج غير الاستئصال، و إلا الجسم هايموت و معاه السرطان بس أعضاء السرطان مش عارفين لسة


انتظروا المزيد

ملحوظة: انا لا إخوان ولا بحترمهم، مش مصدقنى بص على القديم



سلام

بص العصفورة

تصفيات كاس العالم مهمة جداً لشعب مصر، بالرغم من أننا لحد دلوقتى ماتأهلناش، بس حتى و لو

انت متخيل يعنى ايه فى يوم نتأهل؟ لازم نتابع مش يمكن يحصل فى يوم؟؟

ياه لو ده فى يوم حصل!

اتأهلنا.. و يسلام بقى لو خرجنا من ربع النهائى ولا حاجة، ده ممكن نص رجالة البلد تروح فيها

لا ... ماتخلينيش أسرح بفكرى و خيالى و أتخيل اننا ممكن مانخرجش و نوصل لنص النهائى

أو لو.... لا 

لا مش هاقولها، الحاجات دى بتتنظر

فكر كدة؟ لو منتخب مصر رجع بكاس العالم؟ لو أحمد حلمى حكم اراب ايدول، و المتسابق المصرى كسب، لو فيلم مصرى دخل الاوسكار أحسن فيلم أجنبى؟

هل فى حاجة هاتتغير فى حياتك انت؟

طب فكر تانى، لو فريق علماء مصرى أخترعو جهاز يتركب فى المصانع يقلل التلوث، أو فريق طبى أكتشف علاج للسرطان؟ لو مصنع مصرى أنتج أحسن منتجات قطنية و صدرها للعالم؟

لو اللى بيميزنا أقتصاد و علم مش رجالة كبار بيجرو بشورتات؟

لو؟

بص العصفورة

سلام

بحيرة البط

نعتذر لقطع إرسالنا المعتاد لإذاعة هذا النبأ الهام: لقد تم القبض على الجاسوس الخطير الذى حير الجماهير و طير العصافير

لقد تم القبض أخيراً على مستر (بى) فور بطة

سريالية البلد وصلت لدرجة العالم فيها بيعمل زى ما قال المتنبى (يا أمة ضحكت من جهلها الامم)

الموقف ده غلط على مستويات عدة،

مواطن قناوى معندوش فكرة ان فى أجهزة تتبع للحيوانات و الطيور المهاجرة عشان الدراسات العلمية

- هاتقولى طب ما ممكن تكون فعلاً أجهزة تجسس؟

- هاقولك صلى على هايشفع فيك، الاقمار الصناعية العادية، مش الحربية (التجسسية) تقدر تشوف بدقة متر على سطح الارض و تقدر كمان تشوف تحت طبقات الارض، و مع انتشار اجهزة التليفون الذكية المرتبطة بالانترنت، موبايل اى شخص ممكن يتحول لجهاز تصنت

- هاتقولى ده مواطن غلبان

- هاقولك المواطن التكساساوى الغلبان بيستخدم الكمبيوتر (فلاحين امريكا)

- هاتقولى ده راجل عظيم و حسه الوطنى عالى

- هاقولك التلفزيون شبع اهلنا بكلام عن نظرية المؤامرة و كفيانا بقى يا ريت نفوق

لا و كمان مش بس المواطن، ده بتوع الداخلية أخدو الطائر ده و بتوع النيابة حجزوه و كانت ليلة، بمعنى سيطرة الجهل و الدولة الامنية فى أعلى مستوياته

هانفوق ازاى؟

نقضى على السبب الاساسى للموقف ده، القضاء على الجهل، و نبطل تلفزيون

سلام

الاخوان المسلمين

هسألك السؤال المهم فى الاول لو جاوبت بـ (لا) يبقى مش لازم تكمل قراية

هل تقبل ان اللى يحكمك حرامى؟

مساء الحظر، إزيك يا رفيقى، عايزة اسالك عن يوم الاربع

يوم الاربع؟ ايوة الاربع اللى كان قبل الاحد 30 يونيو، فاكره؟

يوم الاربع كنت خارجة انا و بعض اصدقاء السوء، و لعدم وجود بنزين فى اى بنزينة، فكانت طوابير العربيات تمتد فى شوارع المحروسة لعشرات الكيلومترات، (على يدى) و المواصلات واقفة و الشوارع واقفة، و الكل بيسب ويلعن فى مرسى و اللى جابو مرسى و العيش و العيشة و اللى عايشنها (على رأى محمد صبحى)

و تانى يوم الوضع كان أسوء، و على يوم الجمعة كان لتر البنزين الـ 92 بقى أغلى من  لتر عصير المانجا من فرغلى، ده لو لقيته اصلاً

جه يوم الاحد، و الاتنين، الناس نزلت الشوارع اكنها ماوراهاش رمضان و لامصيف و لا اى عزيز ولا غالى، هنا نفس الراجل اللى جاله ذعر من الـ 18 يوم بتوع يناير، جاله هلع من ان الكنبة شخصياً كانت فى الميدان (التجمع مخيف عزيزى ايبك) و رمضان كان داخل و الناس دى كان ممكن تبات فى الشارع، فبسرعة جت الاوامر فى التليفون (على رأى الاخ فى فور فانديتا) 

الناس دى لازم تروّح بأى شكل

و لازم تعرف ان الجملة دى اتقالت قبل كدة، المهم، راحو لمرسى، يهديك يرضيك، "ابداً انا لن اتزحزح"، طب يا بديع، "نفر إيفر"، يا حج  خيرت، "ابدا ولا يمكن، هو احنا بنلاقي الكرسى كل يوم؟" 

خلاص بكيفكو، فسحو مرسي

بس يا سيدى و ابتدت العركة، بس الفرق ان الناس (اللى هو احنا يعنى) كانت بتتفرج على اسم مؤقت و ماكانش حد فايق لبتوع رابعة، المهم ان بعد العيد الناس خلصت المسلسل و بتوع رابعة لقيو ان ماحدش معبرهم، و تقريباً المخابرات اللى كانت بتشتم بتوع رابعة زى ماكانت بتشتم بتوع التحرير حسو انهم ماشحنوش الناس كفاية فقالو اقطع عرق و سيح دم بدال ما ناس جديدة تنضم عليهم خصوصاً ان السوريين بيزيدو فى البلد

اهمية السؤال اللى فوق ايه؟

اصل انت لو مش همك ان حرامى يحكمك فـ قشطة، شلنا حرامى و جبنا حرامى و اتشال عشان يجى غيره، و التفاصيل مش هاتفرق معاك فى حاجة، و هاقولك إزاى تختار انهى حرامى مناسب ليك اكتر و اهو الحرامى اللى نعرفه احسن من الحرامى اللى مانعرفوش

مبارك كان وطنى، ذنبه انه هو اللى خلق فى تلاتين سنة الطبقة الفقيرة الجاهلة اللى بتسمع كلام الاخوان، اللى فى الاخر سابو نفسهم للارهاب الاسلامى و التطرف اللى هو المنفذ الوحيد ليهم

مرسى بقى كان شخشيخة لكن يعبر عن كيان له هدف مش افراد تسعى لمصلحتها (و دى حاجة مهمة جداً لأن الكيان ولائه لنفسه
لكن الفرد ولائه لمصلحته) و هو ده سبب سقوطه لأنه ماكنش عايز يقسم التورتة (مصر) و دى حاجة ضايقت ناس كتير

اما بقى عادلى، فربنا امر بالستر

            يتبع

سؤال اليوم: ماذا تعرف عن رئيس مصر الحالى؟ (لا مش اللى فى بالك)

سلام

غريزة البشاميل (فاطرين +)

أبتدى منين يا مجدى؟ أقول إيه يا محمد؟ أنا قبل ماكتب البلوجايه دى لسة دابحة دكر مانجا

 

إحنا أنضحك علينا يا رجالة

و قبل ما ابتدى أشتم فى الجميع زى عادتى، أحب الفت النظر لتاريخى الكبير و العظيم فى محاربة الاخوان (الكترونياً) 

انا كنت قاعدة لا بيا ولا عليا بتابع الشرشحة و الابتذال و الهرى فى مسلسل حكاية غادة (أو حاجة زى كدة) و إذ بي الاقى ان كلا من واشنطن و تل أبيب شغالين نواح و صويت على مرسى حسب وكالات الانباء

و بردو انا ولا بيا ولا عليا قاعدة بمزمز فى كوباية قمر الدين لما خبطتنى (مش الكوباية، الفكرة) بكرة الذكرى الشهرية للثورة الصيفية الرمضانية اللى أطاحت بحكم الاخوان، و ان لحد دلوقتى مافيش قوانين عزل سياسى، مافيش دستور جديد، مافيش انهاء إعتصامات "عنيف" زى اللى حصل فى مارس 2011 بعد الثورة الشتوية؟؟؟

الناس دى مش بتلعب يابا، دة فى أساتذة و علماء نفس و متعاملين كبار فى البورصة و تجار سلاح فى الموضوع، 

خد بالك انك قربت تبوس إيدهم عشان يرجعو قانون الطوارئ و ان حتى ستات البيوت بتتمنى دبح الناس دى فى الشوارع، و دى فقط بالنسبة لهم وسيلة ضغط، كارت بيلعبو بيه مع بعض، و عايزين اللعب يسخن أكتر و أكتر و سايبنهم يستلمو أسلحة و مواد بنا فى عز الضهر و يبنو حيطان فى منتصف القاهرة!

الحبكة الدرامية هنا هى رمضان، و زى ما بيقولو حصيرة الصيف واسعة

 

الثورة التى أربكت حسابات الجميع، كان لازم الجيش هو اللى يتدخل فى المرتين، مبارك و مرسى، و بالذات مرسى، لأن الناس (المواطنين الشرفاء) كان ممكن يخسرو البشوات فلوس كتير و نفوذ

 بس طول مانت بتأكل كلبك بإيدك عمره ما هيدور على لقمته بنفسه و يعرف انه مش محتاجلك

و نفس الغلطة إتكررت، الناس مشيت، و قبل رمضان، لأن كانو ممكن يفضلو فى الشارع و يكترو، و يحصل عصيان مدنى و دولة موازية بجد، (ده إحنا بدلنا الداخلية فى يناير يا جدع)

 

كان لازم الناس تروح، و ترجع لكوباية البيبسى و صينية المكرونة

 

و هما يفضلو ماسكين الكرباج و إحنا نفضل نبوس إيدهم و نقع فى عرضهم

 

 

سلام

 

 

 

الشرعية الامريكية

نظرة للتاريخ:

سيادة الرئيس محمد حسنى مبارك (1981 - 2011)

الرئيس الشرعى الحى لمصر الان (قانونياً)، كان نائب للرئيس محمد انور السادات، اللى هو بردو كان نائب لجمال عبد الناصر اللى هو كان رئيس غير قانونى لأنه عمل انقلاب على الرئيس محمد نجيب اللى هو اصلاً غير شرعى أو قانونى لأنه جاء بانقلاب عسكرى على الحاكم الاصلى للبلاد جلالة الملك فاروق الاول (بعد كدة فى خديويين و اغوات و مماليك و الف ليلة و ليلة)

سيادة الرئيس محمد مرسى (2012 - 2013)

هنا الموضوع فى مشكلة، بس نتكلم قانونياَ الاول، ايوة الشيخ مرسى رئيس شرعى (لحد 30 يونيو فقط) و لكن نرجع تانى للتاريخ، الانتخابات المريبة، و غزوة الصناديق، و الاقباط اللى اتهددو بالسلاح و نزول الاتباع لميدان التحرير كورقة ضغط و أعلان النتيجة عن طريق الجماعة (مش لجنة الانتخابات) فى الفجر

سيادة الرئيس (المؤقت) عدلى منصور (2013 - ؟؟؟؟)

و اللعب هنا هايحلو، عدلى ماحلفش يمين تعينه رئيس الدستورية الا بعد 30 يونيو، و أصلاً تعينه كرئيس جه نتيجة الدستور الاخوانى اللى (لم يسقطه) و لكن أوقفه

و يبقى الحال على ما هو عليه

السؤال الذى يطرح نفسه و بقوة، هو ليه الشعب المصرى بجميع طوائفه و فئاته و مستوياته و حكوماته و شحاتينه كروديات؟

بمعنى أخر، بص تانى للأسامى اللى فوق:

مين أختارهم؟

طب دعنا نقول ان فى حد وصى ع الشعب هو اللى بيختارله (أمريكا أو المخبرات أو زيوس اله الاوليب)

الثورة؟ يناير 2011، قعدت 18 يوم فقط و انهتها المخابرات

وزارة الدفاع، محمد محمود، دموية الداخلية قتلتها

ميدان التحرير، تم تشويهه

الثورة؟ يونيو 2013، قعدت تلات ايام، و انهتها المخابرات الحربية

التجمع مخيف، مرعب للى فى السلطة، طوفان البشر من عبدة رغيف العيش، طابور الموظفين، شرايين الحياة، ملح الارض، لما يحسو بقيمتهم الحقيقية، و يعرفو انهم الاسياد، و الوزرا و الريسا اللى بيقبضو أد الموظف 20 الف مرة هم اللى خدامين، هم اللى مايسوش تمن الشراب القطوع اللى الموظف بيلبسه، و ان لو الناس عرفت الكلام ده ماحدش هايقدر يوقفهم

"انا مع الحكومة فى عدم رفع العلاوة، لأن رفع العلاوة سوف يؤدى إلى تركيز الثروة فى أيدى الفقراء، و ممكن ينحرفوا و يشربوا عصير مانجة" جلال عامر

سلام

رمضان جانا 3

نفس العلقة اللى فاتت لا قلم زاد ولا قلم نقص

رمضان كريم يا رمضان، و بعودة الايام، عارفة انى غبت كتير، بس ادينى جيت، و معايا رمضان

بس يخيبك يابو صيام، انت مابتتعلمش؟ نفس الغلطة، تانى؟ يعنى أسيبك كام أسبوع أقول الواد كبر و عقل، هايعرف يتصرف لوحده، الاقيك واقع فى نفس الغلطة؟

هو بصراحة بردو ترتيب ابالسة و شياطين، و احنا هانيجى ايه فى الاربعة الجامدين الناشفين العتاولة

أيوة ثورة: انا معاك، بس كلنا شامين ريحة المحفذ (فاكر بلوج بلطجى؟)

يوم الاربع البلد تنشف من البنزين، و يوم الحد ثورة (صدفك كترت أوى صراحة)

و قبل رمضان بأسبوع، و بعد امتحانات ثانوية عامة، بحيث تشتعل سريعاً ثم تنطفئ أسرع (لإعطاء غطاء لطيف لأنقلاب عسكرى) صراحة اه، بس قبل ما تشتمنى، و تحدفنى باللى فى رجلك، إدينى فرصة أشرح موقفى و أقولك غلطتك

الاخوان لا خلاف عليهم، طماعين، تجار دين، متسرعين و مابيعرفوش سياسة، ولا إدارة دولة، كان لازم يمشو بجد

المشكلة ان المؤسسة الدفينة (دى بنت عم العميقة) أخدو بالهم (بسبب غباء الاخرين) ان الحرية و العدالة بدأت تنتشر فى مكاتب الدولة الصغيرة قبل الكبيرة، بسرعة و عنف (و من ثم مصطلح الأخونة)

قالو إزاى؟ ماحدش غيرنا هياكل التورتة، ركبونى مورجيحتى، عايزة أركبها لوحدى (عبدو موته ستايل)

كل ده مايخصنيش، و عدو عدوى يبقى صاحبى و حبيبي، بس عض قلبى ولا تعض رغيفى، احنا كمصريين كسبنا ارضية لا تسبق فى تاريخ البشرية ثورة/ إنقلاب 30 يونيو (أصله ياختشى كدة ينفع و كدة ينفع) و اه كان لازم نمشى بعدها (كان ورانا شوبينج رمضان) و نفس غلطة الثورة اللى فاتت من سنتين، مافيش قائد يمسك، فالجيش عمل نفسه الاخ الاكبر (لا مش زى 1984) (لا استنى... اه زيها فعلاً) و قال انا اللى هاقول و جابو الاخ عدلى اللى يقال انه مسك الدستورية قبل ما يبقى رئيس باسبوع (إبن المحظوظة) بدل الامر البديهى ان اللى قوم الثورة هو اللى يمسكها و تبقى شرعية ثورية و امك فى العش ولا طارت يا استبن؟

سؤال اليوم: هى ثورة؟

سلام

الكفار المسلمين

صباح الخير، يوم جميل النهاردة فقررت ادردش شوية معاك عن نفسى يابو صلاح

انا ليبرالية بالاساس، يعنى و من شاء فليؤمن و من شاء فليكفر، و ربنا اللى بيحاسب، و عشان اشرح اكتر (مش ليك انا عارفة انك فاهم) الليبرالية موقف سياسى، مش دينى، بيقول ان فى الدولة من حق جميع المواقف السياسية (زى الاشتراكية و الرأسمالية) انها تمثل نفسها و تعرف الناس عليها

و انا علمانية بالفطرة (فذكر إنما أنت مذكر، لست عليهم بمسيطر، الا من تولى و كفر، فيعذبه الله العذاب الاكبر، إن الينا إيابهم، ثم إن علينا حسابهم) الغاشية

و المعنى واضح، لست عليهم بمسيطر، يعنى مافيش سلطة دينية فى الاسلام، حتى من كفر، "إن علينا حسابهم" ربنا اللى بيحاسب، فالعلمانية تعنى ببساطة: حرية العقيدة و الإيمان، و مش الحكومة اللى تحاسب الناس على ايمانهم، ربهم أعلم بهم، و وظيفة الحكومة فقط خدامين الشعب، خدمة و تنظيم حياتهم

المهم هنا ان حالتى النفسية فى الارض، تطبطب عليا و تسألنى ليه؟ أقولك انا

فى صفحات الفيسبوك و مجتمع تويتر، بلاقى هجوم عليا بشع (مش انا شخصياً) 

"الليبراليين الكفار" "العلمانيين اعداء الدين"

طب ثانية واحدة!

انت مين بالظبط عشان تشككنى فى دينى؟

مين انت عشان تخرجنى من الملة؟

انت عايزنى من الاخر امشى على مزاجك و اسألك قبل ما يكونلى أراء سياسية فى وضع بلادى عشان تختملى ع الباسبور اللى بخش بيه الجنة؟؟؟

إزاى تهنى فى شرفى و كرامتى و تقول انى نازلة يوم تلاتين عشان البلطجية يتحرشو بيا؟

بتخوفنى؟ و مين قاللك انى بخاف؟

طب و الناس اللى قدمت حياتها، و حرارة اللى بعد ما خسر عينه الاولانية نزل يقدم عينه التانية؟

انت بتقول عليا بحارب الدين؟

و انتو لما بتكفرو اللى مايعجبكوش و لو ماسكتوش بتقتلوهم او تشككو فى شرفهم و انتمأهم؟ هو ده الاسلام بتاعكو

الاسلام بقى شتيمة و تجريح بدل "إدع الى سبيل ربك بالحكمة و الموعظة الحسنة و جادلهم بالتى هى أحسن إن ربك هو أعلم بمن ضل عن سبيله و هو أعلم بالمهتدين" النحل

مين هنا الكفار و مين المسلمين، مين اللى فعلاً بيئذى الدين و بيكفر الناس و يخرجهم من الملة؟

مين اللى بيحارب الدين؟ مين اللى فى ايامه ألحد مليون و نص مصرى؟

انا مش بكفر حد، انا بشاور على تجار الدين اللى بيبيعو كلام ربنا عشان يشترو أكل و شرب و عيشة أمريكانى و مزز سوريا

قد تبين الرشد من الغى

سلام

لقمة عيش

القانون الخفى اللى بيحكمنا كلنا

كلنا عارفينه بس ماحدش بيقولو بصوت عالى عشان مانحسش أوى اننا مذلولين

مكسورين

النظام الجديد، الحقيقي هو الدولة الحديثة: كله بيسمع الكلام و ماحدش بيخرج على المجموع.. القبيلة.. القطيع

ده كلام علمى مش تأليف، احنا مصممين نفسياً لأن نسمع الكلام

 فى كذا قانون خفى، إسمه العيب، المجاملات الإجتماعية، العرف

و فى الاقوى منهم و هو إسمه العادة، الاغلبية العظمى من البشر -بالذات الاكبر فى السن- مش هايغيرو عاداتهم و أسلوب حياتهم و ده لوحده كافى ان يخليهم تحت أمر القانون

و لو ده مش كفاية فى عقوبات تخليك تسمع الكلام غصب عنك: لقمة العيش، ذُلّك بلقمتك، إحتياجاتك.. أكل ولادك أو أسرتك، الحفاظ على مستوى إجتماعى معين و بالتالى دخل ثابت عالى هاتخاف عليه و تموت نفسك عشانه

بس ساعات ده بردو مابيبقاش كفاية، فى بعض النفوس القوية اللى بيسموهم الـ free spirits فلازم تقويمهم و نرجعهم يسمعو الكلام، فبنستخدم أدوات إسمها القوات النظامية، البوليس يعنى فى المجتمعات المتقدمة أو كبرات البلد و الحكماء فى المجتمعات الاقل تقدماً

بس خلينا نتكلم عن الاداة الاكثر إنتشاراً فى العالم: القوات النظامية "البوليس"

البوليس فى معظم بلاد العالم تطور من حماية المجتمع المدنى من الشواذ نفسياً اللى مش بيحترمو حرمة و ممكتلكات الغير، لترويع المواطنين نفسهم من الحكام، لأنه مش فى خدمة الشعب، بل فى خدمة رأس المال

هى ماشية كدة على أعلى الهرم، الفلوس و المشاريع الرأسمالية، تخدمها الحكومة، يخدمها القانون و المشرعين، يخدمهم البوليس و الامن

و احنا بنخدم كل دول بحسبة بسيطة و منطقية

أى مواطن بيدفع ضريبة، بيعتبر أشترى طبنجة أو قنبلة دخان للقوات النظامية

أى مواطن بينتخب يبقى موافق على استمرار النظام اللى بيحكم و بيخدم رأس المال

أى مواطن بيشترى منتج من السوبرماركت بيكسب رأس المال مباشرةً

أى مواطن بيهز راسه و بيبص الناحية التانية متواطئ فى إستخدام قفاه قنطرة "أو كوبرى مشاه"

سلام