 | |
| حظيرة الدعاية |
و الله يا خويا ما أخرنى عنك غير الشديد القوى، الواحد جاله برد مكسر عضمه و ملخلخ رقبته و قاطم ضهره، و أدينا شغالين على السخن و الساقع أشى سحلب و إشى قرفة و إشى جنزبيل لحد ما الواحد بقى حاسس إنه قاعد فى قهوة، بس اللى خارجنى من موضوع العيا هو السؤال المنتشر دلوقتى و اللى بسببه محدش بيتكلم عن الدستور و هو:
هاتعمل إيه لو مسكت رئيس؟
تخيل إستفزازى اللى خلانى أسيب سرير المرض و أطنش الورثة و همه بيسئلونى دفنت خريطة الكنز فين و قومت أكتب البلوج ده بأيادى مرتعشة
طب يا واد يا مؤمن، إسأل هاننتخب مين الأول؟ لكن ساعدتك ترد عليا بمنتهى القرف كدة و أنت حاسس أنى مش عايشة فى الدنيا:
الموضوع دة محسوم من زمان، طبعاً هانتخب.....
معلش مكتبتش إسم المرشح بتاعنا عشان حظر الدعاية
لأ و أنا كمان أعرف واحد طالع نازل رايح جاى على سخسية بعينها، البلد هاتنضف، الأمن هايستتب، الناس هاتبقى كويسة
طب دى بقى أنا مش فاهماها، يعنى إحنا هاننتخب رئيس أو رئيسة جمهورية عشان يعمل مننا ناس كويسة، طب مالأسهل يروح يرشح نفسه فى بلد تانية، ناسها كويسين على الجاهز، أنا معلوماتى أن أى رئيس (أو أى حكومة) هى ناس بتشتغل عند الشعب، موظف يعنى عشان ينظم الحياة و يحسن الأحوال، علاقات تجارية خارجية، على مدخلات الضريبية، على الموقف السياسى الرسمى من فوز زامبيا بالكاس بتاعنا
لكن أول مرة أعرف أن الرئيس (اللى بالمناسبة هايقعد أربع أو ست سنين و بعد كدة هانجيب غيره) هيربينا، طب بمناسبة الدستور بقى اللى المفروض هيطول عن كدة فى أرابيزنا، الموضوع بقى هسهس عليه ليه؟؟؟
يابنى دماغك، خليهم يتخنقو مع بعض، مانا و أنت عارفين الفولة من مدة، و الرئيس دلوقتى فى مكتبه و الهاموش بيباركله و مكتب الإرشاد ختم على قفاه
سلام
ليست هناك تعليقات:
إرسال تعليق