أنا الرئيس 2

صباح شريف عليك يا باشا، بغض النظر عن كون مصر بلد صغيرة أوى و مقفولة أوى و اللى بيحصل فى شمالها بيتعرف فى جنوبها أخر النهار و دة شئ بيخلى ردود الأفعال السياسية متوقعة، لكن فى عامل عشوائى صغير لا يخضع للتحليل و غير قابل للإستنتاج و هو الشباب، و خصوصاً تحت تسعتاشر سنة، و الدليل:

إيه هو الفرق بين أبوك اللى عنده 55 سنة و أخوك اللى عنده 15؟

الإجابة الجاهزة هى الخبرة، هيقولك أكبر منك بيوم يعرف عنك بسنة، و لكن اللى عنده 55 ممكن ميكونش حصل فى حياته كتير، قضى حياه بسيطة فـ بالتالى خبرته فى الحياه قليلة أو محدودة فى نطاق الناس اللى عرفهم بس، و على العكس اللى عنده 15 سنة ممكن يكون إتمرمط بسبب الفقر أو اليتم فيكون أكثر خبرة بالبشر و قسوة الحياه

الفرق الحقيقى هو الصبر: السن بيعلم الصبر، كل ما تكبر تعرف أن اللى محققتوش النهاردة تحققه بكرة أو السنة الجاية و إن منفعش يبقى تتعلم تعيش من غيره، و على العكس السن الصغير ميعرفش يصبر تخلط دة بالحماسة القوية و سهولة التأثير يبقى معاك كوكتيل تحقيق المستحيل، أو رجل المستحيل

و ده البرنامج بتاعى كشباب ثورة 25:

-بالنسبة للتعليم: كل واحد يتعلم اللى نفسه فيه، و يختار المدرس بتاعه، و لو المدرس طلع عبيط إخصم من المرتب
-السياسة الخارجية: على وشك يبان... ياللى بتقول البيان
-الأقتصاد: الثورة التكنولوجية أساس المستقبل و إن منفعش فالكافيهات موجودة
-الرياضة: لاعب كرة قدم لكل مواطن
-جعل سن المعاش 40 سنة (عشان الدورة الوظيفية تبقى أسرع)
-عمر الرئيس 30 سنة و مدة الرئاسة سنتين و نص، النص اللى باقى للإنتخابات الجديدة
-جعل الحكومة أون لاين بس (يعنى مفيش موظفين بشر) يعنى مفيش طوابير، و مفيش رشوة
-السينما و التلفزيون يبقو كلهم سيت كوم، و منع ليلى علوى و إلهام شاهين و يسرا من أدور الأمهات، قدهم بقو جدود و نهاية مسلسل الدالى و بعد كدة يبقى أبن الدالى خلينا نخلص بقى
-الداخلية نقلبها أف بى أى
-الشكل العام للمواطن: الدكر يبقى إدوارد و البنات بيلا و إقلب

سي يو مان

سؤال اليوم: إيه دة، هو أنت؟ و الله يابنى ما أنا شايف! (إيموشن إسماعيل يس إبن حميدو)

سلام