نزلت المسيرة؟ أى واحدة، طب شوفتها فى التليفزيون؟ طب شوفت إعلان الأفلام الجديدة؟ و أنا كمان
و أنا قاعدة إمبارح بقرا الأخبار عرفت إن العيش هيبطلو يعملوه عشان المازوت غلى (إيه هو المازوت؟ إنت بتسألنى أنا؟)
و تخيل قبضو على خط الصعيد، طول عمرنا مباحثنا رجالة و الله دول حتى أحبطو محولة تفجير خط الغاز (تانى)
بس زى ما قالو قبل 25 يناير غير بعد 25 يناير، قبل 25 كان فى مقلم (سورى) قصدى مخطط لحرق مصر، قبل 25 كان فى القط الأسود صاحب المخالب... يييى قصدى الأصابع الخفية، العنصر المندس أهو القط الإسود ده هو أس البلاوى و سبب المصايب فى البلد، لازم تخاف لازم تترعب، لازم تبقى غرقان فى القلق: خايف متلقيش شغل، خايف إسرائيل تهجم علينا و تشكرنا على حسن التعاون، خايف متلاقيش تتجوز، و خايف تتجوز، خايف من الإخوان ليمسكو البلد و خايف لميمسكوش، خايف من إنفلوانزا الخنازيير و خايف من البلطجية خايف لمخزون القمح الإستراتيجى يخلص و خايف لأمريكا تقطع المعونة و الإحسان، خايف الدول العربية مترضاش تشحتنا، ياه... ده إحنا حالنا بقى يصعب عالكلب الأجرب
عارف إيه اللى هيحصل لو بطلت خوف؟ لو دفيت و شبعت و إطمنت للمستقبل؟ صوتك هيعلى و هم بصراحة مش عايزين يسمعو صوتك عشان عايزين ينامو
تصبح على خير
سؤال اليوم إزاى تعرف إن المخبر مخبر؟
أشوفك بكرة
ليست هناك تعليقات:
إرسال تعليق