 |
| جزئ من المؤتمر العالمى لبوس الأحذية النايك |
أهلاً سى لطفى، إنت جيت ياخويا؟ طبعاً زمانك بتدعى عليا من البلوج اللى فات، و مش عارف تشرب كوباية شاى من ساعتها، أنا بقى قولت أصالحك و أضحكك شوية
فى مثل بيقول أن الحلقة الضعيفة هى اللى تفك السلسلة، بس مش هو ده الموضوع اللى عندنا، إحنا معندناش سلاسل، إحنا عندنا الحبل الدبلوماسى، و هو دايماً بيثبت إنه... بونبوناية فجوله
فجأة صحينا كلنا من النوم الصبح لقينا قفانا بيوجعنا، فتحنا التلفزيون لقينا ناس أجانب فى النشرة طالعين طيارة شكلها يخوف و بي بيبايو للكاميرا
و من ساعتها و كل مسؤل فى الحكومة بيبص للى جنبه و محدش فاهم حاجة
و بعد ما الهمس و التساؤلات زادت واحد قام وقف و قال:
"دى أمريكا يابا، دول بينشرو الغسيل بالورب" -بالو بالو- أشرف عبد الباقى
أنا عايزة أفهم حاجة واحدة، إحنا (كمصر يعنى) موقفنا السياسى إيه؟ بنحب أمريكا ولا بنكرها، صديقة أم جاسوسة لصالح الصهاينة الأشرار الوحشين، نشكرها على المعونة، و نقول الحمد و الشكر لله يا رب على جوجل و فايسبووك، ولا إخييييه شوفت أمريكا عملت إيه فى العراق و أفغانستان و اليونان!
أمريكا يا ويكا (على رأى عمنا محمود السعدنى) عندها أجندا ولا بلاكبرى؟ طب إدينى عقلك و إمشى من غير أديداس ولا نايك، 90% من الأفلام الأجنبية، أمريكية، يعنى مفهوم الأجنبى عندنا هو الراجل أبو شعر أصفر و عيون خضرا، و لما نعوز نتعلم بنسافر أمريكا، و لما نعوز نتجوز بنتجوز أمريكييات (حتى لو عجوز شمطاء عشان الجريين كارد يا عمرى) حد يا بشر يفهمنى...
طب ما نوفر كل ده و نبعت نجيبهم، و نتحول إلى ولاية أمريكية، دة حتى ده لو حصل إسرائيل (أو غيرها) عمرهم ما هيهوبو ناحية مصر تانى
صحيح إحنا هنبقى خدامين اللى جابوهم، بس كدة أحسن بدل مإحنا خدامين للمصريين الفاسدين بس ببلاش
صحيح إحنا هنبقى ممسحة الجزم قبل عتبة أسيا، بس هناكل التفاح الأمريكانى
صحيح نص المصريين ممكن (فى إحتمال بسيط يعنى) يموتو بس أهو أحسن ما نلحس الزبالة و نشرب المجارى
قبل ما تقول المجلس العسكرى و الإخوان ركعتونا كلنا، إسأل نفسك سؤال،
بهبورى قول لماما إيه؟؟؟
ماما أمريكا يا أخ
ليست هناك تعليقات:
إرسال تعليق