رئيس منتخب

عارف بكرة إيه؟ بكرة أول يوليو... أول السنة المالية الجديدة، بداية عصر جديد فى مصر، بس تبع الروتين بردو، بكرة حلم، بكرة أمل، بكرة فكرة...

ناس كتير أوى مش عايزة تصدق ان الثورة خلصت، حتى الرئيس نفسه، أول حاجة عملها بعد إعلان النتيجة أنه نزل مظاهرات، الناس ادمنت حالة الأكشن المستمرة، مش عايزة ترجع للإستقرار

بس الماضى قريب مش بعيد أوى، و الماضى بيعلم، بس للعايز يفهم

الكلام سهل، أسهل حاجة انك تتكلم، و المثل بيقول، الذى يفعل لا يقول و الذى يقول لا يفعل

و بردو على رأى الست ليلى مراد: كلام جميل، كلام معقول مقدرش أقول حاجة عنه، لكن خيال حبيبى المجهول، مش لاقية فيك حاجة منه

الوزرا بيطلعو على طول فى التلفزيوت يقصو شرايط، و فى الجرايد يتكلمو عن محدودى الدخل، و فى الأخر إيه اللى كان بيحصل؟

و أول حاجة عملها محمد مرسى أنه إتكلم على عربيات الحراسة و المرور، مع أنه أول مرشح يقفل منطقة حيوية زى كوبرى الجامعة عشان يعمل مؤتمر إنتخابى، و لو خايف أوى على سيولة المرور، نزل التحرير ليه، هى مش مظاهرات التحرير دى بردو بتقفل المرور؟

محمد مرسى: مبروكة مصر ليك انت و الجماعة، بالهنا و الشفا، انتو تعبتو كتير بردو، تستحقوها بعد كل المجهود و الفلوس المبزولة، تستحقو تدوسو على رقابينا، تستحقو تمصو دمنا زى اللى قبليكو، تستحقو... انتو أشتغلتو و بقية الناس كانت نايمة

تحياتى

سؤال اليوم: ولائك لمين؟

سلام

جيمى

نيوزويك 2004

أهلاً يا رئيسى، شوفت اخر الأخبار؟ المورسىيى نازل المليونية النهاردة، هو نازل بالظبط ليه انا مش عارفة، ماهو المفروض خلاص هايحلف القسم (اللى انا مش شايفاله لازمة اصلاً) قدام المحكمة، يعنى وافق على الإعلان المكمل رسمى، بس هو تقريباً نازل لهدف فى نفس يعقوب، ادينا هنتفرج مع بعض النهاردة

المهم نكمل كلام امبارح بتاع التفسير اللوزعى بتاعى لأسباب قيام الثورة فى مصر:

قلناا ان نظرية المؤامرة فاكسة شوية (كتير)، و قلت ان سبب قيام الثورة الواد الشياكة اللى فى البدلة الكاروه اللى فى الصورة جيمى؛ جمال مبارك

هاتقولى قديمة و بايخة ماجبتيش حاجة جديدة، كل الناس عارفة كدة، هاقولك مش بالظبط لأن الهدف الحقيقى كان تشويه جمال مش بس إبعاده عن الرئاسة

كلام جنان صح؟

مش لأن مثلاً جمال كان الطاهر عفيف النفس، لا ماهو أكيد زى كل المصريين عايز مصلحته، و مين فينا كان قدامه يسرق الحكومة و مسرقهاش؟ (مع انه كان هو الحكومة)

 جيمى اتفرقع من مبدأ المية ماتفوتش على عطشان، و الكيف مناولة مش مقاولة (انا معرفش بجيب الكلام دة منين، حقيقى) المهم ان كل الأحزاب و الإخوان و الدنيا و الأخرة كانت تفضل انها تتعمى و ياكلها كلاب السكك ولا إن جيمى دلوعة ماما يمسك مصر

طب السؤال هو: طب مابينا و بين بعضينا ماكناش عايزينه، طمعاً فى الكرسى، لكن برة ماكنوش عايزينه بردو ليه؟

كان نفسى اعمل مسابقة كدة و أقول إبعتلى الإجابة الصحيحة، بس هاريحك، بس من غير ضرب أوكى يا رئيسى!

جمال مبارك شديد الذكاء (غير أبوه تماماً) و مالوش ممسك، و قبل ما تشتمنى هاريحك دة ماكنش معناه انه ماكنش هيسرق انا ماقولتش انه طيب، انا معرفوش شخصياً، المشكلة بالنسبة للدول الكبيرة انك ماتبقاش متحكم فى الرئيس بتاع الدولة الناميه، انه ولائه مايكنش ليهم، ولائه لنفسه بس و جمال ولائه لنفسه و كمان ماينضِحِكش عليه (ذكى زى ما قولت) و دى بالنسبالهم مصيبة

هاتقولى امال إيه موضوع التشويه، هاقولك: فاكر أول الثورة لما مبارك قال لم اكن أنتوى، لا هو ولا إبنه كانو هيمسكو الإنتخابات بتاعة سبتمبر 2011 كنا يا هانشوف إخوان يا هانشوف فلول، و فى الحالتين المدة اللى بعدها، سبتمبر 2016 كانت هاتبقى بتاعة جمال

سؤال اليوم: ايه الجديد؟

سلام

انها الحرب

صباح الإسلام المعدل، عامل إيه فى الدنيا؟ أهو أدينا عايشين و مطرح ما "هاترسى" هندقلها

سيبك أنت، بس أحلى حاجة أنه مع أن الثورة رسمياً خلصت (مش جبنا رئيس مطرح اللى خلعناه) بس كل حاجة زى ماهى، ولا حاجة إتغيرت، و دى حاجة كويسة على فكرة

-"طب و الإصلاح و التنمية، و الحرية و العدالة الإجتماعية؟!!!"

يا جدع ده انت طلعت طيب أوى، أنا بحمد ربنا اننا مقلبناش على حرب السودان فى دارفور، و انت تغنيلى اللى جاى أحلى، الكلمات دى موجودة بس عشان نستخدمها فى أسامى الأحزاب، لكن على أرض الواقع، ماينفعش

-"طب كنا عملنا ثورة ليه، كان لازمتها إيه دم اللى سال و الناس اللى ماتت، مادام هو هو نفس النظام لكن بدقن؟"

ممكن اشلّك و أقولك (سنة الحياه التغيير) بس هاشرحلك و اهو أكسب فيك ثواب:

انت عملت ثورة عشان إتقاللك تعمل ثورة، مش عشان انت عايز، أه انت مخنوق و مظلوم و مطحون، بس عمرك فكرت تقف فى الشارع تزعق للجيران؟

التغيير الحقيقي فى أى بلد بيتم بتغيير الناس مش السلطة، لو الناس إتغيرت، كل اللى أنت عايزه هايتغيير لوحده من غير ثورة ولا يحزنون، و قدامك أوروبا أهى، قمة التحضر التدريجى، تقريباً بدون ثورات، حتى إنجلترا لسه فيها ملكية!

الثورة دى سبوبة: "شو"، بتجيب اللى هايكون مكلف منك أنه يعمل الديرتى بيزنس بتاعك، مين هايخد و ينفذ ليك أوامر أمريكا، مين هيحافظ على الشكل المدنى لمجتمع حيوانى فى الأصل

بس السؤال الأبدى الوجودى اللى ودا الناس فى داهية "ليه؟"

فى نظرية سمعتها لكن مش مصدقاها أوى بتقول أن الثورات فى المنطقة العربية (ماعدا الجزائر و المغرب) كانت لترسيخ الحكم الإسلامى فى المنطقة عشان التبرير بعد كدة لأى هجوم ممكن يحصل حماية للأقليات (لو غزو على كل دولة على حدى) أو لحماية إسرائيل (لو كلنا لوكشة واحدة)

انا مش من هواه نظرية المؤامرة و كمان مش مصدقة ان فى أى هجوم أو غزو ممكن يحصل دلوقتى خصوصاً بعد الهجوم الكبير اللى حصل على إدارة بوش بعد غزو العراق

أنا أظن أن الليلة دى كلها معمولة عشان الواد الشياكة : جمال مبارك

ليه؟ المرة الجاية و عليك خير

سلام

الهوس جنسى و الكانساس سيتى شافل

صباح الخير متأخر، عامل إيه فى الدنيا معاليك، أرجو ماكنش إتأخرت عليك... و انا أقدر... العنوان بتاع البلوج؟ أه مانا جايالك اهو فى الكلام، أصبر على رزقك شوية

تحس الشعب فى حالة صدمة، الناس مش عارفة أصلاً تحس بإيه؟ ناس مبسوطة عشان عايزة تتبسط، مش عشان هما مبسوطين فعلاً

و ناس زعلانة، و ناس مش هممها (زيى) تحس اننا فى مولد، كل حاجة داخلة فى بعض، بس الحلو فى الموضوع هو الناس اللى زينا اللى مش هاممها، و دول كتير أوى على فكرة، و هى بتتفرج على ردود الأفعال

غير رد الفعل الرائع بتاع عكاشة إمبارح، كان فى رد فعل تانى لطيف فكرنى بأول الثورة خالص، على شهر 3 أو 4 بالكتير، لما بعض الأخوة المواطنون -الدُكُرة- كانو بيمشو فى الشوارع أو وهمة راكبين العربيات يقولو للمحجبات يتحجبو، و كان فى ستات بتقول كدة بردو، المهم...

رد الفعل، بعد الثورة بتاعة يناير كان معظم ولاد الطبقة المتوسطة ذوى التعليم العالى بينضفو الشوارع و يدهنو الأرصفة، و يعلقو يفط "من النهاردة دى بلدك أنت" كان إحساس لطيف، و معناه كان كبير

دلوقتى رد فعل الإسلامجية بعد ما كسبو اللوتارية، "غطى يا حرمة" 

بيقولك أشد المجتمعات تحريماً لشئ هى أكثرها هوساً به، أه صح، بس فى نفس الوقت اللى كان فيه المجتمع المتأسلم المسطح التفكير بيدور على أشد إهتماماته (الجنس) كان الإخوان بيصافحوا الشيطان نفسه (كل واحد و إهتماماته)

هنا يجى دور الكانساس سيتى شافل، و هو عندنا بالمصرى بنقول عليه على رأى عمنا جلال عامر: إرفع راسك فوق.. شايف العصفورة؟!!

عايز حد يقبل مصيبة حاصلتله إشغله بالنتايج، مرسى كسب -بالتزوير أو غيره و لو مش مصدقنى اسأل أى حد كان حراسات على أى لجنة تعرفه عن نسبة الإقبال- و عشان ماترغيش كتير فى إزاى هو كسب و تفكر و جايز تفهم، هافرجك على نتايج فوزه "شوفت ولاد مرسى بيعملو إيه؟!!" هاخليك تنسى اللى حصل، شوفت العصفورة بقى؟

سهلة و بسيطة

و بعودة يا رمضان

سلام

الشعب يريد 3

صباح الخير يا مصر، عاملة إيه، طب عايزة إيه؟
خناقة على رئيس، طب ليه، هو اللى قبليه كان عمل لنا إيه؟
عمرى ماكنت أتخيل إنى ممكن أشوف مصريين بيخوّنو بعض،
على إيه؟ على واحد هايجى يقبض خمسين الف، ميت الف جنيه فى الشهر غير اللى هايسرقه من مص دمنا، من إستغفالنا، من الغيبوبة اللى إحنا عايشينها؟
بنتخانق على مين هايموتنا تانى بالبطئ
بنتخانق على مين بيموت فينا الآدمية و يخالينا أشباه حيوانات

انت عارف السادات مات ليه؟

عشان خاين! تخيل، السادات خاين عشان حط إيده فى إيد اليهود، بمعنى أدق: كان ساب سينا لإسرائيل، و كان فضل عايش

دلوقتى اللى مع الإخوان بيقولو إحنا الثورة، و اللى مع شفيق خانو دم الشهدا، و اللى مع شفيق بيقولو إحنا مع الهوية المصرية و اللى مع الإخوان عايزين يبيعو البلد لصالح دولة الخلافة

المسألة بقت ضبابية، مابقتش عارف انت مع مين و ضد مين، أزاى تثبت ان دول و دول مصريين، إزاى ممكن تؤتمن على هويتك و تحقق هدفك من غير ما تبقى ميكيافيللى

كان عندنا فرصتين نصلح فيهم كل حاجة

- ظهور النتيجة (شفيق و مرسى بجد؟ انت بتكلم حد فى كى جى 2؟!!!)
- حكم المحاكمة (براءة للمساعدين الستة، طب كل ثورة و انت طيب)

و الفرصتين ضاعو، و الناس رجعت لخانة البداية، مربع نمرة صفر، مبارك  و الإسلاميين، نتيجة انتخابات 2005

الله يرحمك يا جلال يا عامر، ربنا بيحبك ان ما خلاكش فعلاً تشوف يوم المصريين فيه بيقتلو بعض

سلام و ربنا يستر و يعدى النهاردة على خير

الشعب يريد 2

صباح الخير فى المليونية العجيبة بتاعة الإخوان

حاجة غريبة جداً ان الإخوان بدل ما يتكلمو بهدوء مع المجلس العسكرى كـ حزب و له ثقل و مرشح، ينزلو الشارع و إضرابات و مظاهرات و (قلاقل)!!!

إحنا كبار بردو، ماينفعش شغل الدول المتخلفة بتاعة العالم التالت، مش فى بورصة و إقتصاد منهار؟ هاتقوللى هانجيب فلوس مصر اللى برة، هاقولك يو ماما ان زا نست ولا بايباي؟

اللجوء للفضايح أسوء شئ بين السياسيين، لأنه بيكشف نوياهم، طول ما الشغل بيبقى تحت الترابيزة، يبقى جميل، لكن فرش الملاية يوقعك فى الغلط، مثلاً

- حكم القضاء ببطلان التلت الفردى جه بعد سنة من انتخاب مجلس الشعب و قبل يوم من انتخابات الرئاسة؟؟؟ (مظهر الضحية)

- تأخير أعلان الرئيس؟ (كارت ضغط)

- تأخير تأسيسية الدستور لما بعد إعلان الرئيس؟؟ (كارت ضغط)

- الإعلان الدستورى المكمل؟ (لوى دراع و لو عاجبك)

و سابو ده كله و قالو: هو الرئيس هيحلف اليمين قدام مين؟

طب ما مبارك حلف، كان برء بقسمه؟

و كل ده كوم و دخول القضاء فى اللعب ده كوم تانى، القضاه اللى نازلين تعترضو على حكمهم، هما اللى ماسكين الإنتخابات اللى ممكن تجيب مرسى

و هما القضاة اللى هيحلف قدامهم الرئيس

و هما القضاه اللى هايخشو فى تكوين و صياغة الدستور

لا ده مش شغل سياسة، دى مراهقة سياسية، لما تكبرو إبقو نادو للشعب

سلام

متعودة دايماً

أهلا بيك فى مصر، مصر الحضارة، مصر العراقة و الكلام دة للإستهلاك المحلى، و انا احب ابسط الزبون

الحقيقة اننا كنا فى يوم كدة، بس العالم كان اقوى مننا، زمان كان ممكن تلاقى واحدة ست (ماسكة) مصر، حاكمة مصر، دلوقتى إستحالة

و مش لشئ غير الغرور الذكرى أو (male ego) اللى جايب الكل معاه ورا

و قبل ما تجيب طوبة و تبطحنى، فكر شوية معايا، بالمنطق، كلو بالمنطق، و هو ربنا كان إداك مخ ليه؟

انا راجل: و كـ راجل المجتمع راسملى خط امشى عليه، طريقة اتكلم بيها، واجهة أوهم الناس بيها، مع انى من جوايا ضعيف أوى، أه و بتجرح بسهولة، بس الراجل مايبكيش

انا راجل : مجتمعى مايسمحليش اسمع كلام مراتى او حتى امى، لانها ست، و حتى لو انا مقتنع بكلامها ممكن اعمله بس من وراها و ورا كل الناس

انا راجل: سهل التأثير عليا، سهل اتلهى بصورة، و إيحاء بس اعمل إيه ربنا خلقنى كدة

انا راجل و بهتم جداً برأى اللى حواليا خصوصاً الرجالة التانيين

انا راجل: و لو لقيت أختى لابسة ضيق، هاضربها لانى لما بشوف واحدة لابسة زيها بهيج، و هى بتاعتى، تخصنى على اسمى، و الناس هاتبصلها زى مانا ببص، انها شئ

انا راجل: و لو لقيت واحدة عايشة لوحدها، هاتكلم عليها، مش عشان انا مقتنع، لا عشان لازم اربيها، هى مش زيى، لو لقيت فرصة اهينها هاستغلها، لانها مش من حقها تقلدنى

انا راجل، انا مميز، مش عن امر واقع، لا لأن الناس بتقول كدة

مش هاتكلم انا عن العلم اللى بيقول ان عقل المرأة متطور عن عقل الرجل، مش هاقول ان المرأة أقرب لربنا من الرجل، مش هاقول، ان المرأة كدة كدة بتتحكم فى الرجل بس من ورا الكواليس، كلنا عارفين دة، خلينا نتكلم بطريقة عملية

من حق (الإنسان) يترشح للرئاسة، لأن ربنا هايحسبه سواء راجل او ست، من حق (الإنسان) انه يعيش لوحده، و يقرر مصيره، و يملك جسده و اللى بيعمله بيه سواء راجل او ست، من حق (الإنسان) انه يعيش من غير مايحاسب على رأى المجتمع سواء راجل أو ست

سؤال اليوم: دوقت الطعم الجديد للحرب الأهلية؟

سلام

الطبقة المدودة

احنا المصريين، اللى خرمنا التعريفة و دهنا الهوا دوكو

و مع انى لا اعرف يعنى ايه تعريفة ولا الدوكو، بس مصدقة الأسطورة دى، ان الراجل المصرى جدع و الطفل المصرى اذكى اطفال العالم

مانا لازم اصدق، امال اصدق ايه؟ ان من كتر فساد الطبقة الحاكمة لمدة جيل كامل أفسدت علينا طريق الرجوع

الرجوع لزمن كنا فيه مصريين، اه دلوقتى احنا لا مصريين ولا حاجة

لغو انتمائنا، الواحد بقى فخور انه بيتكلم لغة تانية و معاه جنسية تانية، بيتكسف يقول برة انه عربى

انه مصرى

و دول الطبقة المتوسطة الحاكمة، ايوة لا الطبقة الغنية فى البلد تقدر تربط ولا تحل لان تعدادهم اقل من اربعة فى المية من الشعب، و مع ان الطبقة المتوسطة كمان مش كبيرة اوى، بس متحكمة فى الإعلام و الفن و الانترنت كمان

 

معاها كل الكروت زى ما بيقولو

انا من الطبقة دى و كنت بردو زيهم مش واخدة بالى او عاملة مش واخدة بالى من الظلم اللى حوالية

ظلم البو عزيزى، ظلم ملح الأرض، الأغلبية من الشعوب العربية، الناس اللى بتحمد ربنا لو لقت اكل ولا فاكهة

اه انا شوفت بعينى ولد سبع تمن سنين داخل على ابوه شايل بطيخة بيقوله: قضيت يابا

الواحد عامل نفسه مش حاسس و هو بيحدد مين هايبقى رئيس مصر لأنه مهم، و احنا المفروض نعلمهم هما

 

نعرفهم بدل ما يشترو اكل بمستقبلهم هما

احنا الطبقة الفاسدة مش هاتفرق معانا مين يبقى رئيس، بنتصرف، لكن فى الاخر الظلم على الناس دى اللى خدت خمسين جنيه عشان ياكلو و باعو مصر، مش مصر باعتهم الأول؟!! 

و الناس دى بتبصلى و تسألنى ننتخب مين يا أستاذة؟

أقولهم إيه؟

احنا السبب فى الانتو فيه احنا الدود اللى بياكلكو

 

 

سلام

المورسى جوزى

بلوجين فى يوم واحد معلش بقى، عشان تحطهم جنب بعض و تمخمخ الجمعة براحتك

إحنا خلاص مافيش مابينا غير الصراحة،

 دى ------->

صورة الرئيس القادم، و مش 4 سنين و مش تمن سنين، لا ده لحد ما ربنا يسترد "وديعته"

محمد مرسى هو الصورة اللى تثبت للشعب بس أن الإخوان المسلمين مش طامحين للسلطة، بغض النظر انا مش هاخش فى نوايا الناس، الخلاصة ان الإخوان المسلمين هيطولو معانا شوية

همة كدة كدة مش خسرانين كتير بموضوع دخولهم الرئاسة، و جايز كمان تكون ورقة ضغط على المجلس العسكرى ليس إلا، لأن الحكم كدة كدة معاهم، لو مش الأربع سنين اللى جايين هيبقو الأربعة اللى وراهم، و لو أكتر يبقى احسن (أبو بلاش كتر منه)

بس كـ مرسى، فى شوية مشاكل تحول دون أنه يبقى رئيس مصر، هوة نفسه عارفها عشان كدة تحس انه الوحيد فى الإخوان اللى مش مقتنع بترشيحه (بص على وشه لو مش مصدقنى)

أولاً ده هيبقى أول رئيس مش براشوت، و الناس حطة أمل كبير على السلطة اللى جايه، الراجل ده هايدخل التاريخ (من انهى باب معرفش) ولكن هو خايف ليكونو بيستخدموه كواجهة (و ده حاصل) و همة بياخدو اللى عايزينه من ورا الستار (تحت الترابيزة يعنى)

ثانياً مرسى نفسه مش عايزها، بيروح اداء واجب، تحس انه مزقوق عليها، ماسكين عليه زلة، و صراحة تعبير الألم اللى على وشه صعب الواحد يستحمله أربع سنين

ثالثاً ولاده الأمريكان، يعنى عيب أوى ان ولاد رئيس الدولة يبقى معاهم جنسية تانية تحت أى مسمى، معناها وحش (ان ولاد رئيس مصر مش مقتنعين لا همة ولا أبوهم بمصر كوطن)

محمد مرسى فى الأول و الأخر تابع، خد امر و نفذه، إزاى أسمح ان التابع يبقى القائد، و مش للإخوان لأ لمصر كلها

يلا نتابع لاحقأً

سلام

شفيق يا راجل!

هو انا اغيب اسبوعين تفكو مجلس الشعب، بس شفشق لسة مكمل، فدعنا نتكلم قليلا عن يوم السبت

إحنا بالصلاة على النبى سنة أولى أنتخابات، يعنى لسة منعرفش الدهاليز السياسية و أسلاليب الدعاية السلبية، و شَغل الرأى العام بمواضيع تانية فى الوقت المناسب،

إحنا بس لازم نعرف اننا لازم هنختار غلط اول مرة، لأن هى أول مرة كدة، هاتطلع أى كلام

نبتدى بأحمد شفيق، صراحة، حتى لو نجح شفيق (و ده مستبعد من وجهة نظرى) مش هيبقى رئيس دولة بالمعنى المشوه فى أدمغة بعض المصريين من أولاد ابو إسماعيل أو حتى أولاد صباحى، لأن مافيش دستور أساساً يقول الرئيس سلطاته كذا و يقدر يعمل كذا، و مينفعش يعمل كذا، و ده كان هيتم على أى مرشح غير محمد مرسى، بمعنى ان لو الرئيس مش من الإخوان، هيبقى (بعد الدستور ما يتكتب) رئيس تشريفات (زى رئيس إسرائيل كدة)

يبقى نتكلم على شفيق من المنطلق دة، لو الموضوع تشريفات و قابل السيد الرئيس وفد مش عارفة إيه، يبقى شفيق ماينفعش، بصراحة، الراجل دة مابيعرفش يخبى، (إيه) أيوة، و عامل زى القطر (دب)، و السياسة عايزة حد ملاوع و يقدر يبقى بوشين، و احمد شفيق أبعد ما يكون عن ذلك

تقوللى الجنزورى: أقولك أه، بس أوفر إيدج يا راجل، تقوللى عصام شرف، مش هرد عليك صراحة

و طبعاً نيجى للحتة الخطر، وزير موقعة الجمل، معاك، بس السؤال: هل نتيجة الانتخابات معناها ان الناس نفسها عايزة رجل قاتل (لا يا بنتى، تزوير طبعاً)

-متأكد؟

(طبعاً)

-ده معناة ان نتيجة الإنتخابات كلها متزورة و الإخوان اللى بيحلفو بنزاهة الإنتخابات فيها لاخفيها، ماهم مش هايزورو حتة و يسيبو حتة ولا إيه؟

(إيه؟!)

سؤال اليوم: هل مرسى عايز الكرسى؟

سلام