أهلاً يا جميل، إيه الأخبار؟ أيوة أنا كمان شايفة كدة، الناس زهقت ثورة، و قررت تغيير، ما فاضلش غير بتوع التلفزيون و الناس بتوع السياسة الملزقين اللى بيكسلو يحلقو دقنهم (بس بيجيبو فرق شعرهم على الصلعة) همة اللى كل شوية يطلعولنا فى التلفزيون يقولو، الثورة الشريفة، الثورة المصرية العظيمة، ثورة الشباب المحترم، فاضل بس يقولو العزة و الكرامة و نبقى بنعيد ثورة يوليو، الناس طهقت و زهقت و عايزة ترجع الملك، (أه والله فى ناس كلمت أحمد فؤاد -إبن الملك- و مراته المجنونة ماشية تقول أنا الملكة)
عندهم حق، طب الناس كانت شافت إيه عدل من الثورة الأولانية لما نجبلهم واحدة تانية و أون لاين كمان، يعنى ثورة حرام (مش كل بدعة ضلالة؟!)
المهم، الناس دلوقتى ملهمش سيرة فى التلفزيون غير الرئاسة، فأنا قولت أحط الخطوط العريضة للبرنامج الإنتخابى بتاعى (أيوة كتبو إسمى على الباب)
كإسلامية إخوانية سلفية مشتركة:
-هلغى تعليم الإنجليزى و الفرنساوى و الألمانى، و العربى، عشان محدش يتكلم كتير بقى و لوك لوك لوك و وجع دماغ و المدارس والجامعات يوم الحد و التلات و الخميس للرجالة و السبت و الإتنين والأربع للحريم العورات، هما مش هيروحو بس هنسيبلهم الأيام فاضية كـ مشاركة معنويه
-هقصف شرم و الغردقة و نويبع و الأقصر و أسوان و ححظر دخولها على المصريين (أجانب و بس يا معلم)
-السياسة الخارجية: المصلحة فوق كل شئ
-كل دكر يتجوز أربعة و ما ملكت أيمانه (و العب العب العب يا حمادة) بالقانون
-هنلغى الإنترنت، و الكورة و الرياضة و وزارة الشباب هنحبس الموظفيين اللى فيها، و ندمر مبنى الإذاعة و التلفزيون، و شركة ببسى كو مصر، بس هنسيب البلاى ستاشن
-لو بنى آدم إتكلم فى السياسة هيتطبق عليه حد الردة و نخزوقو، و لو حد حب يعمل دكر هنطبق عليه حد الحرابة و نلسوعه، و لو حد وقف فى مجلس الشعب هنطبق عليه اللايحة و نظبته
-هنلغى الستات (برة البيت) يعنى تبقى ماشى فى الشارع ماشفش ست ولا مرات بواب بتمسح عربية و لا ست بتبيع فجل و لا واحدة شايله إبنها بتجرى بيه على المستشفى، لو حد شافها يرجمها لحد ما تموت عشان هى كدة تبقى زانيا فى اللازانيا
-الدقن (مافيش واحدة ست تستهبل و تربى دقنها) بالنسبة للرجالة تبقى مكنسة، و يا ريت تتنكش و تجيب موس تشوهها من فوق شوية و زبيبة الصلاه تبقى نص متر فى وش الواحد، إن شالله يفرك قورته بورق صنفرة، لو واحد نزل (حتى لو مسيحى) مش بالمنظر دة هنعلقو لحد ما يبانله صاحب
-السينما تتقفل و حكم بالإعدام على كل الفنانيين، و عدم تداول صورهم أو أخبارهم أو أخبار اللى جابوهم
-الإقتصاد يبقى فى البنوك (لأ مش حرام) بس بالمرابحة نشترى أذون الخزانة الأمريكية زى ما أحنا و نلعب فى بورصة طوكيو و نقسم مع الشعب
-الصحة هتبقى بالحجامة و التداوى بالأعشاب و حبة البركة، اللى هياخد دوا هنقتله
-الداخلية هتبقى الأمر بالمعروف و القتل للمنكر
و السلام عليكم و رحمة الله و بركاته
2 B continued... :)
أشوفك بكرة
ليست هناك تعليقات:
إرسال تعليق