ميدان مصر

انا عايزة جيكا

مكملين

انا ماليش دعوة، انا عايزة سالى زهران

طلعولى البير من السجن

مرسى... فين وديع؟ مسجون ليه؟ هل ده شرع ربنا؟

بديع... انت بتحارب فكرة بدخان و رصاص الداخلية، و الافكار ماتتحربش غير بافكار

انا شوفت مصر... مصر مش عوزاكو، مش هاتنفذ كلامكو ولا بالرصاص و الدم

انا شوفت مصر.. ايوة... كل مصر

عايز فلوس... خد... اسرق براحتك، عايز جبروت؟ اتجبر، اركب و دلدل رجليك، بس هاتلى الناس اللى راحت

غير كدة ماتتوقعش اننا نبوس ايدك و رجلك و نقولك امين

ماتتوقعش ان مصر نسيت فى سنتين شعور الحرية و الرفض

ماتصدقش انك وصلت، لا

عشان انتو ديابة بتاكل فى بعض، عشان متعودين على البيع و الشرا، و عمر ما حد فيكو بيدى التانى الامان

احنا جمعنا الحب، و انتو جمعكو المصلحة

احنا جمعنا الفكرة و الامل، و انتو جمعكو الفلوس و السلطة

احنا دينا حقيقي، فمابناكلش من وراه عيش،

احنا بنحترم أقل واحد بنطبطب عليه، مش بنشتريه بالفلوس

احنا بنربى ولادنا على الحرية، مش على العبودية

احنا هانكسب، و هانرجع جيكا، و الف جيكا غيره، 

الافكار مابتموتش حتى لو اللى شايلنها فى قلوبهم ماتو او اتسجنو و اتعذبو

سلام

الحرية و العدالة

حرية؟

لا !!!

طب قول والله
يا جدع قول كلام غير ده؟

انا مش هاتكلم على محمد محمود

مش هاتكلم على الدستور اللى عايشين منغيره بقالنا سنتين

لا انا مش هاتكلم عن وظايف وزارة القوة العاملة اللى الحزب هو اللى بيعلن عنها أو الغاز الطبيعى اللى تبع وزارة البترول اللى بردو الحزب هو اللى هايدخله "بالبطاقة"

لا، مش هاتكلم عن هدر الموارد، ولا محسوبية التعيين فى الدولة، مش هاتكلم عن اعادة المحاكمات اللى محصلتش، ولا الديون اللى بنغرق فيها كل يوم عن التانى

ولا كمان هاتكلم عن استخدام الشريعة الاسلامية و اهانة الدين للوصول لأغراض و مكاسب سياسية

ارمى كل الكلام ده فى الزبالة و افتحلى اخر حلقة من برنامج ذا فويس، او اقولك تعالى نروح اخر جزئ فى توايلايت

اه بهزر، اومال انتحر

مالقيوش اسم تانى؟؟ هل الاخوان بيدورو على حرية؟؟ نقول مثلاً هل انا حرة اغير دينى فى حكمهم؟
حرة البس على كيفى؟
حرة اكون وزيرة او رئيسة اى مؤسسة او على اى مستوى ؟
هل انا حرة اختصم الحكومة على الاتوبيس اللى اتفرم تحت عجل القطر؟

بلاش، عدالة ايه؟ فين؟

طب ادينى امارة كدة

لما كل انابيب البوتجاز بتتوزع فقط عن طريق الحزب عشان ياخدو ارقام بطايق الناس اللى هايزورو بيها سوا الانتخابات او الاستفتاء

لما يعينو شباب بمرتب الف جنيه فى الشهر عشان يوصل عيش مهرب من المخابز من ابو شلن يبعيوه شوية اغلى بس بردو بصور البطايق؟

هل من العدالة كتابة الدستور زى مايكون انا بس اللى بفهم فمحدش هايكتبه غيرى؟

مرارتى و قلبى الصغير لا يحتمل

و النبى لاتغيرو الاسم، خليه حزب النهضة، سموه حزب مصر الاسلامى، حزم الامة المؤمنة، اى فكس ان شاء الله تسموه حزب سرحان و نفيسة، بس بلاش حرية مالكوش دعوة  بيها، بلاش عدالة، انتو ماتعرفوش معناها ايه



سلام

الشيخ حسان للشهادة

صباح الاشراق و التفاؤل

ايه ده ايه ده، حصل ايه؟

ايه... فى ايه لده كله؟

قطر؟
اتوبيس؟
غزة؟

تمام تمام بس ايه علاقة ده بصباح الخير، بلاش يا عم لو بتزعلك

ايه؟ ماعنديش دم؟ لا ثانية واحدة، ولا هو سكتناله دخل بحماره؟ اومال الماتش اللى كنت بتتفرجج عليه ايه اول امبارح؟ ولا ده من دواعى الدم أو المسكنات

هاقولك انا انت زعلان ليه.. ثقافة الموت

ايوة، مجتمعك.... و ثقافتك.... ثقافة تأجبل المتعة و عيشة اللحظة عشان تشتغل أو تذاكر او تستحمل و النتيجة فى الاخر

اه افكرك:

ربط الحزام: الشعب لازم يستحمل قطع الكهربا و الماية للتوفير و بعدين النهضة هاتجيب رخاء

ثانوية عامة 101: ذاكر و اضغط على نفسك عشان تتدخل الكلية اللى بتحبها

الشغل: اشتغل و انت شاب و كون نفسك عشان تلاقى تتجوز

صلى و صوم واعبد ربنا عشان لما تموت تخش الجنة

سيب حبيبك على هواه لحد ما ديله يجى على قفاه

و هلم جر

اللى يغيظ فى الموضوع ان الكبار هما اللى لبسونا القرطاس، هما كمان لبسوه و هما صغيرين بس يظهر كان ضيق فمعرفوش يطلعو منه

و اللى يغيظك اكتر ان حتى الناس المبسوطة و مقضياها عندها شعور بالذنب مبوظ عليهم استمتاعهم بالحياه

المثال الاوضح هو الرهبنة أو الاعتكاف و الزهد، فى سبيل الجنة او العالم الاخر او النيرفانا
و عشان مانروحش بعيد، و بما ان الاغلبية مسلمة: فمثالى هو بعض الشيوخ الاسلاميين
هما يعيشو و يفسرو ايات الدين بما يتفق مع متعهم الدنياوية، لكن يجو ليك انت، و يقولولك:

صلة الرحم، الايثار، الزهد، الخشوع و قيام الليل، و اخيرا عشان يسخروك "لخدمة القضية" الشهادة فى سبيل الله

تمام، انا معاك يا سيدنا الشيخ، الشهادة طريقها معروف، و من كام ساعة خمسميت شاب مصرى دخلو غزة و اتعرضو لقصف، لو واحد منهم كان مات كان من وجهة نظركو هايحتسب شهيد

قشطة جداً و انتو يا كباتن؟؟ مابتدوروش على الشهادة، احسن موتة؟ ضمان للجنة و عظيم الثواب؟
ماسفرتوش ليه؟ ماحربتوش ليه؟ ماكونتوش على راس جيش جرار من كل البلدان العربية عشان تحاربو بنو صهيون او تنقذو مسلمى بورما او مينامار؟

بتحبو ربنا ولا بتحبو نفسكو و بتحبولنا احنا ربنا؟


سلام

غرفة التأديب 2

منطق اى طفل اقل من 6 سنين هايكون افضل من منطق راجل اكبر من اربعين سنة

لأن الطفل عمره ما هايبرر اى شئ بكلمة "هو كدة" أو "ده النظام"

لا الطفل هايحاول يفهمك سبب، و سبب حقيقي، ليه مثلاً عمل ورق الشغل صواريخ ولا ليه حط الموبايل فى حلة الشوربة

فاهمنى انت يا جندى، او يا ظابط

ضربت نار ليه؟؟

قتلت بدم بارد ليه؟؟

عذبت بكل الغل ده ليه؟؟

طيب اسالك انت سؤال: انت عسكرى غلبان فى قسم، عارف يعنى ايه ظلم، تقدر بفطرتك تفرق بين مجرم معتاد الاجرام و واحد مسجون ذل و جبروت أو تصفية حسابات، ليه تدخله "غرفة التأديب" ما تفتح الباب و تقوله امشى، روح لعيالك، انا ماشركش فى ظلم

طيب انا مش هاسميك عسكرى انا هسميك انسان، و زميلك انسان، مش مجبر انك تتزل بلقمة العيش، لا مش مجبر، لأن اللى بيديهالك شغال عندك، و عند ابوك و اللى خلفوك (الحكومات بتشتغل عند الشعب، اللى مجوعاه و سجناه و قاتلاه)

لو شفت الظلم قول لا، مش لاعب، ماتبقاش اداه، لأن الظلم من غير ادوات ضعيف، و الحق حتى لو لوحده قوى

ايوة الحق اقوى، لأن كل الناس عايزة حق، ماحدش بيطلب باطل

مش سلو بلدنا، مش اوامر، مش الناس كلها بتعمل كدة، ولو الناس كلها نايمة ارجوك

اصحى انت

سلام

غرفة التأديب 1

 

أهلاً بيك فى مصر يا كابتن

فى تجربة نفسية حطو خمس قرود فى قفص، و علقو موز من حبل مربوط فى سقف القفص، بعيد عن القرود و فى نفس الوقت حطو سلم بيوصل للموز، و لكن كل ما حد من القرود يحاول يطلع السلم كل القرود يترشو بمية ساقعة متلجة

مرة... التانية.... التالتة القرود فهمو ان السلم (او الموز، او الأكل أو الهدف) معناه المية المتلجة (العذاب)... القرود بطلو "يحاولو" و الماية ماترشتش تانى

بعد كدة العلماء شالو قرد و حطو مكانه واحد جديد، مايعرفش قصة الموز و السلم و الماية، القرد بمجرد انه حاول يجرب يروح للسلم، الأربعة القدام نزلو فيه تلطيش، سكت ... شوية و يحاول تانى يطلعو عينه ضرب تانى، لحد ما بطل خالص (و خد بالك مافيش رش ماية)

العلماء كررو موضوع التبديل مع قرد من الاربعة القدام، و القرد الجديد حاول زى اخوه الجديد اللى قبليه انه ياكل الموز، بس  الاربعة (بما فيهم اللى قبليه) بردو نزله فيه تلطيش

و قصة التبديل تكررت لحد مالخمسة كلهم اتغيرو، ماحدش بقى فيهم من اللى اتعرض للماية المتلجة، ساعتها العلماء حطو قرد جديد،

اول ما حاول ياكل الموز "انضرب و مابنلوش صاحب"

و مع العلم ان القرود مايعرفوش هما بيضربو ليه؟؟ (ماحدش فيهم عارف القصة، بس هما انضربو) ما يعرفوش ليه مش مسموحلهم يجيبو الموز، بس "اتعلمو" انه ممنوع لأنه قانون، 

و انهم بقو حراس القانون

سؤال اليوم: عرفت انت ليه؟

سلام

ما انا بقارئ

فى دستور باين؟ بعد عك سنين و بعد ما العالم.... ولا بلاش احنا مش ناقصين عقد، المهم بنكتب دستور لـ فصل فى كى جى تو

لا؟؟ اومال بنكتبه لمين؟ 

بلد بلد ايه احنا هانهزر؟؟

المفروض الدساتير بتكتب لمشرعين القانون و لضبط علاقات مؤسسات الحكومة مع بعض و مع الرعايا فسيبك بقى من الشرع و المادة التانية عشان ده مكانه فى قانون العقوبات مش الدستور

لا!! انت مكدبنى!! طيب خد دى

مش قالو لغير المسلمين الإحتكام لشرائعهم، معاك، و اذا حصل بعد كدة تعارض ما بين الشريعة مع القانون، مثلاً شرعتى تقتضى موت القاتل مع ان مثلاً قانون الجنايات بيوصلها لـ تلات سنين، خلاص اروح اموته و اقول سورى انا احتكمت لشريعتى

طيب هو مش كمان القران بيقول و الجروح قصاص؟؟ يعنى لما حد يعملى عاهة اعمله اختها بالظبط، فاسيبك بقى من القانون الوضعى ولا ايه، و بقول كمان بلاش محاكم بالمرة نمشيها اولى الامر

طيب و تعليق الحدود؟؟ لما ابو بكر لغى حد السرقة، اللعنة على ابو بكر لأنه فكر و استخدم عقله، و اكيد هايروح النار مع انه من المبشرين بالجنة

خلينا صرحا انت المفروض سازج و مش عارف ان الدستور مابيتكتبش عشان الشعب ينفذو، انه للحكومة، بس انت كان قصدك اننا نبقى طيبين و كويسين مع بعض عشان نروح الجنة باين؟

طيب فى طريقة تانية اسهل و احسن و اقل صراعاً و دموية من سكة الدستور

اسمها العلم و الثقافة

عرف الناس الصح و الغلط و الدين و الفن و الحياة و الفلسفة و السمو و العلاقات الانسانية السليمة، و الفطرة انشر العلم و السلام بدل ما تحتكره و تبيعه

بدل ما تسرق بيه، و تستعبد الناس

بدل ما تتحايل عليا و تجبرنى انى اعمل الصح علمنى و فهمنى و سيبنى اختار الصح لأن المجبر لا يحاسب

و لو اذيت حد او مصلحة عامة ساعتها عاقبنى

ولا ما انت بقارئ؟؟

سلام