رمضان جانا 2

الأيام بتجرى يا جدع، ده كان لسة من كام يوم و انا باكلمك عن الكنافة و تأثيرها على الوعى السياسى المصرى، بس إكتشفت أن فى حلويات سورية ليها نفس التأثير، زى عش العصفور مثلاً

بس والله لوحده و من غير ماكلمه، مرسى قام بالواجب و زيادة، و قال للى ميعرفش أعرف،

أه هو صحيح عامة الشعب و الراجل أبو بطيخة مش معانا تماماً، بس النخبة الفاسدة و شوية العيال بتوع المواقع الإجتماعية، واخدين بالهم و مفتحين للصغيرة قبل الكبيرة

إيه ده كله، دول لو قاصدين يكشفو نفسهم مكانوش عاملو كل دة

بس كام نقطة على السريع بخصوص رمضان،

-ميزانية مهولة لمسلسلات التلفزيون لم تسبق فى تاريخ رمضان من ايام الرسول

-ازدياد المشاكل التافهة و الصغيرة

-سوريا.

بس كله كوم، و تعامل الناس مع تبعات فوز مرسى كوم، لقد نجحو انهم يشربونا المقلب، و على وشوشنا جميعاً إبتسامة "الحمد لله ان ربنا ستر"

بس بردو يا مرسى (أو يا مرشد)، مقدرتش تتغلب على النحس، و هو من المواضيع المفضلة عند الشعب المصرى

رمضان كريم

فسح شوية

إيه الأخبار يا صديقى

أخبارى انا؟ لا زفت، كنت فخورة بنفسى انى لحد دلوقتى محدش قاللى عيب على لبسى، أو إتحجبى يا حرمة، قولت ان الإخوان ميقدروش يهزمو الثقافة المصرية، و العادات بتاعتنا، لحد النهاردة...

بدون الدخول فى تفاصيل، لقد تم الفصل العنصرى بين الجنسين، رسمى

مش من الشارع، ولا من واحد فاضى

طب مش كفاية الخراب بتاع مدارس البنات اللى انا اعرف شخصياً ان البلاوى بتحصل فيها اكتر من المدارس المشتركة، 

أيوة يا معلم، لحد الجواز العرفى سن 13 سنة صباح الفل

ايه الرعب ده؟ لا دى محتاجة حد يفهمهالى، النظرية جت إزاى؟

هنا هاكون انانية شوية، كله كوم وانا كوم، "أصل الدنيا هاتبقى ليل و احنا بنخاف عليكو" قول والله!

 كم من الهبل بيرتكب بإسم الخوف و الأمان، بأسم الشرف، بإسم الأصول و العيب

طيب يا راجل، يا شريف يا حامى حمى الفضيلة، عارف فى كم ست مُعيلة بتنزل الساعة اتنين و تلاتة الفجر مقالب الزبالة تجمع الأزايز البلاستيك و الكانز عشان تأكل عيالها، بلاش دى تعرف كام بيت فى مصر فتحاه ستات بتشتغل فى الدعارة، و قبل ما تشتم، عشان ياكلو و ياكلو عيالهم، ولا البلطجة و السرقة أشرف؟

شهر 5 بعد الثورة على طول كنت بكلم واحد، قاللى يا ريت الإخوان يمسكو البلد، دانا لو بقيت رئيس أول حاجة هاعملها هاشيل شارع الهرم من اساسه

قولتله هو المنع القانونى لأى حاجة حرام هاتخلى الناس تبطل تغلط؟

قاللى أكيد، أو على الأقل هايقلله

قولتله الجمله المعهودة: اللى عايز يعمل حاجة غلط هايعملها، و لو حبسو البنى آدم فى سجن كل عمره ممكن يوصل للكفر فى عقله

الغلط مكتوب علينا، و المكره على الصلاح زى المكره على المعصية، الإتنين لا يؤاخذوا بما عملت أيديهم

أفصل يا بابا، طلع العقد النفسية علينا مانت أشترتنا

سلام

الغنم

تحذير من الأول: البلوج النهاردة مش تشجيع على اللادينية أو الكفر

-أكل أستمر أتكاثر

الموضوع بسيط، مع انى ماليش فى موضوع الوحدة الطائفية اللى فى البلد، ولا عمرى كنت هاتكلم فيه، بس موضوع المرة اللى فاتت أجبرنى أنى أكتب، للأسف البديهيات لازم تتفسر

و ادينى بكرر مش خوف بس حرص، انا عمرى لا هادعى لدين أو لا دين

هاتلى انسان فى مصر شاف ربه، اياً ما كان مين ربه، أياً كان دينه، حد شاف الهه؟

أمال حضرتك بتعبد مين؟ و ليه بتسمع كلام دينك

انا أقولك: الثقة، اللى هى الإيمان faith بس انت أصلك و فطرتك حيوانية، مش بمعناها السيئ، لا بمعناها الأشمل، فطرة البقاء و التكاثر، بس عشان احنا حيوانات إجتماعية قبلية، بنحتاج حاجة زيادة و هى القبول فى القطيع، و ده له شرط، انك تبقى حلو و تسمع الكلام

طيب، جميل، يبقى احنا هانسمع الكلام، هانصلى للإله بتاعنا، إيه اللى بيخلينا نرفض الديانات التانية؟

برة بيسموها إحنا و هم (us and them) أو الإنتماء للقطيع بتاعك، و رفض الأخر، و ده أساس نظرية التطور لأن أصل التطور هو وجود الصراع، اللى بيؤدى للبقاء للأصلح، و بعد كدة النشوء و الإرتقاء

سيبك من الكلام العلمى و خلينا فى الأدبى عشان الأدب فضلوه عن العلم

إيه اللى خلى الدين يدخل فى المعاملات القانونية بين البشر؟

أساس تصنيف، مادام إحنا فاهمين اللى فيها؟

و مين قال ان فى حد فاهم

صح!!

سلام

المادة الأولى

اتأخرت صح، معلش انت عارف البيت و العيال، مش عارف؟ ولا انا، على العموم

نص قرار المحكمة بيقول ان المجلس غير دستورى و مع ذلك كل القوانين اللتى تم سنها شغال عادى يا معلم

بس إيه اللى ترتب على مجلس الشعب الغير دستورى؟

صح اللجنة،

اللجنة اللى إختارها مجلس شعب مش دستورى و الرئيس قال، "نحترم القضاء المصرى"

دستور غير دستورى!

المادة الأولى:

"جمهورية مصر العربية دولة ديمقراطية شورية دستورية حديثة، تقوم على الفصل بين السلطات، ومبدأ المواطنة، وهى جزء من الأمة العربية والإسلامية وترتبط بالقارة الأفريقية"

 من خصائص الشعب المصرى اللف و الدوران، حتى أول مادة اتكتبت فى دستورنا بتقول كدة،

لدرجة ان مروة طلبت من المصريين الوضوح فى الكلام و قالت بمنتهى الصدق:

"الصراحة راحة يا حبيبى و انت مابتعرفش"

بنعمل دستور لدولة مفتفتة

بنزوق عروسة عجوزة و ميتة

سؤال اليوم: ممكن اعرف ربك اسمه إيه؟

سلام

الأمر لله

العصاية و الجزرة

فى مصر بلد الشهادات، الجزرة هى الشهادة و الجواز

و العصاية هى الحكومة

هتلاقى المصري الغلبان اللى من الطبقة المتوسطة هو الحمار اللى ماسكينله العصاية و الجزرة، لازم تبقى مواطن حلو بتسمع الكلام، لحد ما تموت

و الا العصاية موجودة

ممكن اوريك هدف تانى فى حياتك، و ممكن تموت عشان الهدف ده، الفرق هنا فى الموتة

و ممكن اوريك عقاب اسوأ ميت مرة من سجون الداخلية

 الهدف (أو الجزرة الجديدة) هى حياة أحسن، أكثر تطور و رفاهية من فتات العيش اللى هاتستناه من كبرات البلد، و انت وراك كوم اللحم اللى أن شاء الله هاتخلفهم بعد ما تتربط فى سقية الشغل و فى أغلال الزواج

و العقاب الأسوأ، انك تفضل عايش العيشة دى فاكر انك كسبان، مدفون، مخك واقف، كل يوم زى اللى قبلو و زى اللى بعده، ميت عايش و عايش ميت

الحياة صعبة كدة كدة، مش هاترتاح كدة كدة، الهروب أسهل بس أسوأ فى النتيجة، المواجهة صعبة لكن أشهى فى الثمار

تعالى نجرب سوا

نتغير إحنا قبل ما نحاول نغير بعض

سلام

الدمل

صباح الالم

ايوة، النهاردة ماكنتش اعرف ان فى ناس بتتعذب فى صمت

صدمة لما تكتشف ان المشكلة المسكوت عنها مشكلة فعلاً، ماهو مش معنى ان الناس مابتتكلمش يعنى مافيش مشكلة

طب دة العذاب، طب و العادات؟

حاجة بسيطة تعملها مرة، محدش زعل، تعملها تانى بس عشان تتأكد، و الناس تستحمل، و تسكت و تبتسم

و الافعال الصغيرة، تتحول لعادات مؤلمة لطرف أخر بيسكت، عشان "عمر ما حد إشتكى قبل كدة"

- انا مافيش فى إيدى حاجة اعملها

- هو فى حد يقدر يغير مجتمع

- يا عم وانا مالى، دة مش شغلى

- عادى! إيه الجديد؟

الجرح كان صغيير أوى، فكبرنا دماغنا، ردمنا عليه، و لما إتملا صديد، إستحملنا الوجع، تعايشنا مع المرض و "الغلط"

-طب إنتى دلوقتى بتتكلمى على أنهى مشكلة فى البلد؟

على كل مشكلة فى البلد

صباح الألم

سلام

+18 غشاء البكارة 2

انا غلطانة انى بحط اى بوست فى اى كلام عن الجنس، لأنى لازم بعد كدة أنزل جزئ تانى أشرح فيه الموضوع

نشرح،

أولاً مفهوم الكبت الجنسى مش كل جوانبه سيئة، لأن قلة الممارسة الجنسية أساساً بتهدى الواحد (ده مع قلة التعرض للمهيجات يا بابا، ماتقوليش انتى غلطانة و انت طول الليل بتتفرج على بورن)

ثانياً تقنين الممارسة الجنسية (فى إطار الجواز) و -مع إعتراضى- التأكد من وجود غشاء البكارة، مخلى العالم العربى من أقل البلدان فى العالم فى إنتشار الأمراض الجنسية

الغلط اللى كنت أقصده التركيز على النقطة دى بالذات، و تحويل المرأة من إنسان خلق ليحاسب، لأداه (ناقصات عقل و دين)

شوفت الموضوع سهل إزاى، بسيط إيزى، أعترف بالضعف الإنسانى، مش كنقطة ضعف و لكن كجزئ من الحياة عشان مايستولاش على دماغك، إعترف ان المرأة جزئ هام من المجتمع، و ان حبسها فى البيت يشل نصف المجتمع، انها مش اداة لتسيير الحياة، انها انسان

افهم ليه البلوج بتاع غشاء البكارة اخد viewing اكتر من البلوجين بتوع السايبر سكس، طب إزاى، إيه المهم أوى فى ان مراتك ماتكنش غلطت مع حد، عايز تقنعنى انك برئ... عفيف.... عذراء (مش البرج)؟!!!

اللى يهمَك (و يهمِك) عن شريك حياتك هو عدم تكرار الخطأ (الإخلاص) مش الماضى، لأن الماضى ممكنك مايكنش فيه غلطات جنسية بس فيه غلطات أسوأ (ممكن تكون مراتك قاتلة محترفة، أو جاسوسة) ممكن!!

دماغك يا عم، المهم انك تلاقى حد صح، بيفكر زييك، بيحبك بجد، عنده مخ و قدرة و مسئولية للجواز نفسه و تكوين أسرة (صح ولا تبدل بواحدة عفيفة بدماغ باريس هيلتون)

أشوفك قريب

سلام

البس لجنة 3

صباح الخير يا لجانى المفضلة، النهاردة البلوج ليكو مخصوص، انا عارفة... معلش، فعلاً بقالى كتير مكتبتلكوش حاجة، بس أهو، و زى ما بيقولو، خيراً ان تصل متأخراً من أن لا تصل إطلاقاً، صح؟

انا حبيت الفت نظركو للتقدم الهائل فى انظمة التجسس فى اليابان سنة 1985، أيوة، اللعبة اللى فى الصورة دى بدايات إنشاء أجهزة تنصت تندمج فى المحيط، يعنى بالبلدى كدة: حاجة ماتشوفهاش العين حتى لو شافتها

انا مش ضد التجسس إطلاقاً، بالعكس، يعنى ما بين الدول المتقدمة و بعضيها، و جود التجسس بيمنع الحرب المباشرة، عشان كدة طلع مصطلح الحرب الباردة، مافيش دم ولا خراب ولا موت

بس التريب هنا هو وجودنا إحنا فى النص، بنستخدم التجسس، عشان نتجسس على بعض، (زى ما الست الوالدة تأرر مرات البواب عشان تعرف المشاكل اللى حاصلة مع الست جارتها هى و جوزها)

المخابرات (او الأمن القومى: كدة لايقة أكتر) بتتجسس على النت، و على مكاتب المسؤلين الكبار فى البلد، الفنانين و الإعلاميين و صناع الرأى، و بعض الدول العربية

طب إزاى كدة ممكن نمنع حرب؟

كل ما اجى اتكلم عن المخابرات بيجيلى إحباط صراحة، بقى احنا نعمل كدة بعد إزدهار التجسس و المخابرات فى الخمسينات و الستينات؟

دايرتكو مقفولة، بتضيعو فلوس و طاقات بشرية على الفاضى، مش ده المهم، مش ده الصح، ده مش شغلكو

كدة إسمكو هيبقى جهاز النميمة العامة المصرية

سؤال اليوم: مصرى مصرى ولا مش مصرى مصرى؟

سلام