صباح الخير، الدنيا ربيع و الجو 36 و عادى هاننزل بردو عادى، بس أنا مش نازلة أنتخب حد، أنا نازلة أبطل صوتى، لأن الحكومة ماتستحقوش، وانا مش هاديهم 100 جنيه، كفاية الفلوس اللى سرقوها
النهاردة يوم غير طبيعى و لازم أكتب و أقول اللى فى نفسى بدل ماكتم و يجيلى المرض البطال (بعيد بعيد)
مين فى المرشحين يستحق انى أحترمه، مين مات قبل كدة و بقى شهيد بنغنى عليه؟
مين إتفقعلو عين؟
مين إتيتم و هو لسة ماكملش سنة، مين إترمل، مين فقد الثقة فى البلد بعد 11 فبراير و الناس قالت حرية و غنينا فى الفيديو كليب و عملنا فلوس حلوة، و بعد كدة إتقتل و إتسحل و إتعرى و أتشتم بأفظع الشتايم؟
سنة عدت، الدنيا ربيع؟ الجو بديع؟
انا مين؟ ليه صوتى (مهم) و (امانة) طب ما كل الناس عارفة جواهم و لو مقالوش ان الإنتخابات دى مسرحية زى الإستفتاء بتاع مارس
أنا مين؟ ليه أتحجب؟ ليه أتنقب ليه أتجوز؟ ليه أبتسم بلطف و أسلم، ليه ألبس الفستان و الجزمة البلرينا؟
أنا مين؟ أنا ولا حد؟ و مش عايزة أكون حد، أنا مأذيتش حد، ماقتلتش حد، مانيمتش أم و هى بتعيط كل يوم بالليل و هى مش عارفة إبنها مات ليه؟
أنا مين؟
مالثورة قامت، بتقتلونا ليه؟
خدو الكراسى، راجعولنا مينا، راجعولنا عين حرارة، رجعولى صوتى و انا بقول لا من غير ما خاف حد يعرفنى و يكفرنى
الثورة قامت؟
إثبت
و إنتخب رئيس فى المسرحية
سلام
ليست هناك تعليقات:
إرسال تعليق