يا باطستة، صباح النور، ولا بلاش خليها صباح الصباح، دا اللى جاى أكيد (إنشاالله) أحلى من اللى راح، بعد المنظر الجميل بتاع إمبارح و الناس واقفة تحت المطر و على رأى الهتاف
"فى عز الساقعة و عز البرد صوت الثورة يدفى التلج وآدى الدنيا كمان بتمطر يسقط يسقط حكم العسكر"
يسلام منظر يرد الروح: بس المشكلة بقى فى سيبو المنصة لأ حطو المنصة، طب سيبو الحتة دى لأ دى محجوزة، طب قوم هات الواد اللى شايل يفطة ضد الإخوان لأ سيبو ده ملكش دعوة بيه، و هكذا هكذا يجرحنى دايماً هكذا
على طول إفتكرت الأستاذ خليفة خلف خلف الله خلف خلاف المحامى، عارف لما قال "قالولو" مهمة اللى قالولو ...
غلطة المرة اللى فاتت بتتكرر، مع الفرق إننا المرة اللى فاتت كنا أشد وحدة و تماسك، بس إيه هية غلطة المرة اللى فاتت؟
التركيز على الرمز: المرة اللى فاتت لما أول ما الراجل مشى سابو الميدان مع إنه رمز لعصر الفساد أما هو شخصياً لا كان بيحل ولا يربط بالعكس كانت رجلو و القبر
المرة دى بردو الرمز: هو إنتو فاكرين لما تشيلو أحمد و تحطو الحاج أحمد هتفرق، طبعاً لأ الناس الصغيرة هى اللى لازم تتغير، و مش معنى كدة إننا نرميهم فى السجن، لأ إننا نفهمهم الحقيقة اللى غيبة عنهم، نحسن مستوى دخلهم و نحسسهم إنهم بشر و من حقهم يعيشو صح من غير ما الشرف يخليهم يشحتو، نعرفهم إننا كمان بشر من حقنا نعيش من غير ما ناخد على قفانا منهم
سيبك من الراس و خليك فى الجدر، شيلو من تحت الأرض عشان تنضف و نزرع من الأول ناس على نضيف
إجابة إمبارح: إنت عايزها بكام؟ هتدفع فيها إيه؟
سؤال اليوم: مين الريس؟
أشوفك قريب عشان مش متأكدة من موضوع بكرة
سلام
سؤال اليوم: مين الريس؟
أشوفك قريب عشان مش متأكدة من موضوع بكرة
سلام
ليست هناك تعليقات:
إرسال تعليق