 |
| أغلى من حياتى |
يا صباح الخير، خلاص هانت، كلها كام يوم... على الإمتحنات (دماغك متروحش بعيد والنبى، إحنا مش ناقصين)، الواحد هايفضى بعد طول عذاب،
بس أكتر حاجة عاجبانى هى نزول فيلم توايلايت، طبعاً إللى شافو شافو خلاص عالنت أو فى السينما، و لكن للسينما طعم تانى، أحمد و منى... سورى قصدى إدوارد و بيلا...
أكيد أول حاجة هاعملها أول ماخد الأجازة هى أنى أروح الفيلم، أصحى من النوم الصبح أفتح التويتر، أبص على العيال عاملين إيه، أقابل الأنتيم بتاعى "توتة" فى سيلانترو، ناخد الموكا و بعدين نقضى الضهرية شوبينج و بعدين نتغدا فى تشيليز مع بقيت العيال و بعدين نطلع على السينما، انا و البنات نقعد ننهنه و نسح و الولاد تتريق علينا، نطلع بعد كدة على البولينج، و بعد كدة نشوفلنا أى كافيه إحنا البنات و الولاد كالعادة تخلع و يطلعو على الصحرا فى الخلا يروشو و يعملو كامبينج للفجر
نرجع بقى لأرض الواقع: تعرف فى كام كلمة إنجليزى أنا كتبتها بالعربى، طبعاً إذا أنت (و أنا لا أعتقد ذلك) بتقول فى دماغك، (ياسلام، أحلى عيشة) تبقى من الأغلبية الكاسحة من الطبقة المتوسطة من الشعب المصرى، الباقى يإمة فقرا و بيتمنو يإما أفقر من الفقر و مش هاممهم أصلاً الكلام الفاضى دة، أما بقى طبقة الكريمة فبلاش الواحد يتكلم عليهم ليخش النار
و مازالت الثقافة الأمريكية تسيطر
و مازلنا نعانى من اللسان الملووح
إجابة إمبارح: نو أى دونت، باى باى بيبى
أشوفك بكرة
ليست هناك تعليقات:
إرسال تعليق