إذيك؟ واحشنى... شوف الجديد النهاردة عشان بقالى كام يوم برد عالسؤال فى أخر البلوج بس المرة دى هغير، ... السؤال ببساطة، هتنتخب مين؟
لأ مش بتكلم على مجلس الشعب، الرئاسة اللى هى هتبتدى خلاص، لازم نجهز نفسينا عشان نعرف هننتخب مين، المرشحين كاللآتى
أ) فلول: يمثلهم الجدع اللى آخر شياكة و أناقة (جمال مبارك) أيوة ، مسمعتش غلط، أول بس ما يخلص القضية اللى عليه هيجى على طول
المميزات: فرصة جيدة لكل محبى الإستقرار، هنرجع مستقرين زى أيام مبارك كدة: أغانى، أفلام، مارينا، سرقة ، رشاوى (بس للأسف معتقدش دى هتتغير مع أى مرشح) تامر حسنى، مسلسلات رمضان، و الأسعار فى إزدياد مستمر مع الرأفة بمحدودى الدخل
و أحلى حاجة بقى: أعتبر 2011 محصلتش أساساً من أول القديسين لمجلس الوزرا
العيوب: مسح تاريخ السنة اللى فاتت من الأغانى، انت عارف إحنا عملنا كام أغنية عن الثورة؟
ب) إخوان: يمثلهم الرجل أبو دقن، للأسف لم يستدل على أسمه لأن حتى الإخوان لسة ميعرفوش
المميزات: الحج هيبقى ببلاش، هيلغو إليسا من التلفزيون (دى ممكن تقلبها عيوب لو عايز) ، هندفع بدل الضرايب زكاه (دى جامدة طحن: يعنى بدل ال 30% بتوع الضرايب هيبقو 2.5% بس)، لغى حلاقة الدقن كل يوم الصبح يعنى هتوفر إمواس و أفتر شيف و كمان الذل بتاع الربع ساعة قدام المراية اللى ملهمش لزمة غير الوجع
العيوب: نهاية مسلسلات رمضان، نهاية باسم يوسف (أنت متخييل أن فى حد بعد كدة هيقدر يفتح بقه؟) نهاية أون تى فى، نهاية الساحل الشمالى (لأ هيسيبوا شرم عشان الدخل القومى، لو معاك فلوس حلوة طير أنت) و أخيراً نهاية البلوج ده عشان دخول المرأة عالنت لوحدها بدون محرم حرام
to be continued إن شاء الله
سؤال النهاردة: أمنية
ربنا يعدى 2011 على خير
فاضل 15 ساعة
happy new year
ليست هناك تعليقات:
إرسال تعليق