صباح الخير على عيونك يا جميل، أحسن النهاردة؟ أنا بقول كدة بردو
anyways
النهاردة المليونية الوحيدة المتوقعة و الغير محسوبة النتائج، الساعة دلوقت 4:30 صباحا يعنى يادوب تصحى تجهز عدة الشغل إذا ما رضيتش تجهزهم إمبارح عشان الوالدة ما تعرفش إلا النهاردة، و تروح تتوضى و تصلى الفجر عشان تتكل على الله (أو إليه لو حصل أى حاجة من اللى بيقلوها بتوع نظرية المؤامرة) ما علينا
و عشان محدش يفهم غلط ولا الاقيهم كابسين عليا كمان ربع ساعة (عدة الشغل): انا أقصد الكمامة بتاعة الدخان و البطاقة و شوية ساندويتشات وإزازة مية و إزازة خل و شنطة فيها الكاميرة و شلتة قطن تقعد عليها يعنى أنت فاهم انا قصدى أيه
المهم إن انا وانا بتفرج على اللى بيحصل... كذا مرة يتقال: أظبط لجنة إلكترونية، إلحق لجنة إلكترونية أبص ذى أى مواطن شريف كانت فكرته عن المخابرات أنهم كدة ذى يوسف شعبان أو صلاح قابيل، يعنى ناس شيك كدة و دايما يقولوا: "دة علشان مصر" لكن مش عارفة ليه و انا بقرأ الأكونتات و البوست بتاعهم الصورة دى إدمرت وحلت مكانها صورة صلاح نصر بكرشه الكبير حاطت فى بقه مبسم الشيشة و بيتفرج على ميمى دربوكة و هى بترقص
من الأخر كلام قذر يعاقب عليه القانون و يندى منه الجبين (حلوة دى) و حاجة يعنى... المهم فى نقطتين هنا واحدة ليك و واحدة ليهم
اللى ليك: سؤال: إزاى أى بنى أدم تحت أى مسمى و أى هدف يسمح لنفسه يستخدم اللغة دى و يقول دة للبلد؟! أنا فعلا عايزة أعرف
اللى ليهم (و كمان للجان الأجنبية) : يا جماعة بأمانة ربنا الموضوع بتاع الأكونتات ده مفقوس أوى باين بغباء أنا كنت فاكرة ان إحنا كمان عندنا موضوع البرامج اللى بتفلتر الكلام و تتطلع الناس المهمة و تقدر تحجب و تنزل زى بتوع برة يعنى بجد مش مصدقة أن مصر دلوقت سنة 2011
أما عن إمبارح أنا وعدت إنى هاقول الدور بتاعك إيه
الدور هو أن عايزة الاقى الشخص الذكى اللى هيقدر يفسر تعريف مصر مش لازم النهردة أو السنة دى يمكن فى يوم من الأيام حد يلم الكلام الفاضى ده كله ويطلع منه بإستنتاج صح
أشوفك بكرة
ليست هناك تعليقات:
إرسال تعليق