الف مبروك عالدورى اللى رجع، حقيقى مش مصدقة عينية، لا و مش بس كده، دة كمان أخدنا مداليات دهب فى الدورة العربية و مبارك هيتحاكم (أه تانى! هو كان إتحاكم أولانى) و الجنزورى رجع يتكلم على أراضى الشباب شكلها هيبقى فل الفل
الدنيا زهزهت و الحياه بقى لونها بمبى، فاضل بقى نفرح بيك، إيه أخبار الجو؟ (لا الجو دى قديمة أوى) إيه أخبار المزة؟ إن شاء لله تكونو بخير؟
انا؟ آه... المز بتاعى و انا بينا شوية مشاكل، هو إخوانى سلفى و أنا ليبرالية منحلة، ف موضوع الثورة ده شكله هيخرب علية، بس أحلى حاجة أن ف عز المعمعة والموت اللى كان شغال، بردو السيما كانت شغالة، فأنا و هو دخلنا أنكد فيلم ف مصر عرفتو طبعاً، المهم أنا قلت فى بالى كويس هنبطل نتكلم فى مين اللى ينفع يحكم مصر -إكمنها اليومين دولم مشية على حل شعرها- بس لا تأتى الرياح بما تشتهى السفن، هو إبتدى يلقح بالكلام من أول ما خرجنا
ماهو أصل لو البلد دى فيها راجل يحكمها... إنتى ماتعرفيش يعنى إيه حكم أسلامى...ده الراجل اللى برحلو الدرس... و هكذا حتى أصبحت أم راسين لأنى خلاص إتعودت ماتناقش معاه علشان الليلة ماتقلبش نكد
تانى يوم (اللى هو إمبارح) بتفرج انا على محكمة القرن اللى فات أو بمعنى أصح التغطية الإعلامية اللى ماشوفتش منها حاجة أساساً :ده كان على عشرة الصبح، حولت التلفزيون وانا ماسكة الملزمة بتاعة المذاكرة على أساس أنى بذاكر، و قعدت أتفرج على قناة الأغانى، شوية الموبايل رن فتحتو بتلقائية، و إفتكرت أنه هيعتذر على تصديعة دماغى إمبارح أو هيعزمنى الويك إند الجاى و لكن "أنتى كمان قاعدة بتسمعى الأغانى بدال ماتشوفى اللى بيحصل فى البلد" و طاخ السكة إتقفلت فى وشى
سألت نفسى سؤال: هو أيه اللى بيحصل فى البلد؟
أما عن إجابة السؤال بتاع إمبارح: فرد السؤال بسؤال
إيه هو الشئ اللى بيتعرض على حلقات فى التلفزيون؟
أ المسلسل التركى
ب مليونيات التحرير
ج محاكمة القرن
أشوفك بكرة
ليست هناك تعليقات:
إرسال تعليق