إيه أخبارك اليومين اللى ف آخر السنة اللى مش عايزة تعدى دى، يالله كلنا لها، واللى مايموت منين يفوت، وحدوووووووووووه
أولاً نبدى أسفنا (زى المجلس، أنت صاحى معايا أهو) لللجان الألكترونية، فهمت بس متأخر شوية معلش شغل عيال (ده اللى هو أنا، مش أنت يا باشا، عيب) اللجنة صاحية و واعية و معاها أخر أصدارات السوفت وير (بس نصيحة ياريت يكون المضروب مش الأصلى: طبعاً مش هفهم سيادتك، تبقى أنت بتراقبنا و هم بيرقبوك) بس فات على سعادتك شئ مهم: اللى الدافع بتاعه أنه يموت عشان بلده يبقى أقوى من اللى الدافع بتاعه أنه يقتل عشان خايف يموت
ثانياً ملحوظة للمجلس العسكرى (أو أى حدق أو لبيب بيفهم) ليه كل واحد فى البلد دى حاسس أنه الوحيد اللى بيفهم، الوحيد المؤمن، الوحيد الوطنى و الوحيد اللى هيخش الجنة
ثالثاً رسالة لوزارة التربية و التعليم: أرجو تغيير شعار (صوتك العالى دليل على ضعف موقفك) إلى (بلاش شتيمة بالأب و الأم لو سمحتم) و شعار (إغسل يدك قبل الأكل و بعده) إلى (كفاية إعلانات أكل وزنك تقل يا ميدو) و أخيراً تكذيب لخبر سمعتو قبل كدة: إن الستات فى مصر أكتر من الرجالة لأ العكس، أنا بقالى فترة ما بشوفش ستات أساساً، حد يقولى راحو فين
إجابة سؤال أمس: هو السؤال (إزاى قامت 1919 من غير دعوة على التويتر) حلوة صح؟ لأ...؟ طيب
سؤال اليوم: كيف تختار مرشح الرئاسة من كتلة الإخوان السلفيين؟
أشوفك بكرة
ليست هناك تعليقات:
إرسال تعليق