صباح الخير، سؤال المرة اللى فاتت مهم، إحنا بنصرف منين؟ ركز، لا بلادنا فيها صناعة تتصدر ولا إبتكارات علمية ناخد عليها ملكية فكرية، ولا حيلتنا خام نبيعه (لا بترول ولا دهب ولا الهوا) بس و مع ذلك، بنستورد كل حاجة أكل، شرب، موبايلات، كمبيوترات، عربيات، هدوم، أدوية، كوبايات شربات فلايات مين يقول هات؟
من كام شهر كنا فرحانين أوى بالفلوس اللى جايلنا من أوروبا بمناسبة الربيع العربى (الربيع اللى إنت فيه يا قلبى) و من السعودية و شوية دول كتير، بس بعد كدة لما الفلوس إتأخرت، طلع علينا الجنزورى باشا يقول "باوظتو الإقتصاد، مادوناش فلوس" و زعلنا أوى و إتأثرنا باللى حصل
بس جبنا فيهم جون: قبضنا على شوية الجواسيس اللى كنا سايبنهم بيلعبو اليومين دول، فالأمريكان خدو على خاطرهم و قالو مش هنديكو المصروف لو ما بطلتوش شغل العيال دة
بس اللى عاجبنى موضوع محمد حسان: يللا نلم من بعض عشان نشحت الحكومة
الحكومة اللى بتاخد منا ضرايب (مشاركانا فى المكسب و مش فى الخسارة) و فواتير مية و كهربة أصلاً جايلها ببلاش
الحكومة اللى سايبة الناس بتدور على أكلها فى الزبالة، و الناس اللى بتموت من فلاتر غسيل الكلى المضروبة، و بتموت من نقل الدم اللى إتعبى فى أكياس دم بايظة، و بتبنى فى مبانى مجلس الشعب و تجديده و عربيات الحراسة المستوردة للوزرا و إستيراد المخلفات النووية و تاخد عليها أرضية و تدفنها فى الصحرا الغربية عشان تسمم مخزون المية الجوفية
الحكومة اللى بتصرف مرتبات لجيش موظفين قوامه ستة مليون، (ما علينا، ده حتى عملوله وزارا عليها وزير بمكتب و موظفين، إسمها وزارة الشؤون الإدارية) يعنى لو كل واحد فيهم بياخد ميت جنيه فى الشهر يبقى بندفع ستميت مليون جنيه فى الشهر نصهم بطالة مقنعة
الحكومة اللى بتستوردلنا (أو بترضى) أقذر أكل (لحمة بقر على خرفان على خضار مصاب بأمراض تجيبلنا إحنا السرطان يمكن نموت و الزحمة تخف)
نص الناس فى بلدنا بيسرقو عشان يأكلو عيالهم و يشترولهم الموبايل، و فى ناس ف بلادنا بتنام فى الشارع، و فى ناس كل يوم بتغطس فى تلال الزبالة عشان تلم الأزايز الفاضية عشان تبعها و تاكل بتمنها، إحنا مش عايزين معونة إحنا عايزين شوطة تاخدنا كلنا
شعبنا مبقاش يصدق الهبل دة و كمان معدش معاها فلوس تشحت حد (خصوصاً بعد مستشفى سبعه و خمسين و الجمعيات الخيرية اللى بقت أكتر من الفقرا و الأيتام) ، بس الحكومة مش هتسكت، هتسرقنا هتسرقنا، و الشركات فعلاً إبتدت تخصم للموظفين و العمال عشان يوم الكرامة بتاع حسان و الجنزورى
حد ينده الأمريكان يحتلونا أحسن
1 سوريا
2 الدستور و المرشحين
3 المعونة اللى هتتقطع
4 حق الشهدا؟
أشوفك بكرة
ليست هناك تعليقات:
إرسال تعليق