 |
| وداعاً جلال عامر |
عارف شقة أم محمود، دى الجارة اللى فى السابع (لأ مش الشهر، الدور) كل العمارة بتشتكى منها (الشقة مش أم محمود) أم محمود نفسها محدش شافها من سبع سننين، هى و جوزها سفرو الخليج و قفلو الشقة، عندنا بقى الشقة دى مليانة براص و فران و تعابين، من القفلة، بسبب الشقة العمارة كلها إتملت فيران، و كلنا فرحنا و هيصنا لما أم محمود رجعت هي و جوزها و إبنها (محمود ست سنين) قلنا العمارة هتنضف، ياه ياه... كانت أيام
أم محمود فتحت الشقة و هوت العفش و مسحت و كنست بس ورا الدولاب لقت عشة فيران: أب و أم و تمن فرافير صغننين، الواد إبنها شاف الفيران إتسرع، بس لما الأب و الأم (الفيران مش البشر) جريو من الرعب و الواد شاف الفيران البيبى عجبوه أوى و أمه كمان صعبو عليها، فقررت تسيبهم
أخر الفيلم ده إيه؟
الناس النضيفة فى العمارة سابتها، و اللى مقدروش ماتو بالطاعون
و على رأى المثل:
"ما يفضل على المداود غير شر البقر"
أم محمود: الجزئ الثانى (2012)
شعب الفيران فى شقة أم محمود
الواد محمود بيكلم الفيران بعد سنة بيقولهم:
-أنتو لازم تنضفو نفسكم، لازم تحسنو أحوالكم، إيه رأيكم تعملو إضراب مثلاً أو عصيان مدنى
زعيم الفيران أبو شنب جنان:
-ماشى، أوكى يا كوتش إحنا وراك إنت و أمك و أبوك لما تنضفو الشقة
فجأة دخلت أم محمود و أبوه على أبنهم لقوه قاعد على الأرض بيكلم روحه
-يا كبدى يابنى الواد عقلو طار
-مانتى سايباه يا هانم قاعد عالنت طول النهار، أدى اللى بناخده من أمريكا وو سيرة أمريكا
و يطلعو من الأودة و محمود يبص حواليه ميلاقيش ولا فار:
-سبتونى لوحدى يا جبنا
يطلع فار من تحت السرير و يقول
-يا عم إحنا قدهم، أنا خايف على مستقبلى و لقمة عيشى، دانا ورايا كوم لحم
طبيعى فى بلدنا إن جلال عامر يموت علشان توفيق عكاشة يعمل مظاهرة، عارف ليه لأننا منستهلش غير توفيق عكاشة
-أنت اللى باعت دعوة فرحك لسيادة الريس ؟؟
-شقاوة شعب يافندم
سلام
ليست هناك تعليقات:
إرسال تعليق