سؤال محدش عايز يسأله لنفسه من ساعة عمر سليمان ما قرا خطاب التنحى: هو مبارك كان الشيطان الوحيد و سبب فساد مصر تماماً و بييمسك المسدس لبقية المصريين الملايكة عشان يسرقو و يرتشو و يفسدو و يتحرشو و يزورو و يوسخو فى البلد، بمعنى يعنى إن بعد ما يمشى الملايكة المصريين هيرجعو ملايكة تانى؟!!!!
حرة و نزيهة
هأو، لأ أضحكتنى يا فتى، "حرة و نزيهة" دى زى بالظبط "حرية و عدالة" لأ و كمان محدش بعد هالة سرحان (و الكلام دة من أكتر من شهر) حاول يتكلم فى موضوع الـ "حرة و النزيهة"
دة بأمارة أما مبارك بيتحط فى هليكوبتر رايح جى
و بأمارة إن كل وكلاء وزارات مصر لسة فى أماكنهم
و بأمارة إن كل رؤساء الأقسام فى الجامعات زى ماهم
و مرتب رئيس الوزارة (اللى بيروح المكتب بتاعه على حساب الحكومة و يقعد فى مكتب مكيف يمضى على ورق و بعدين يروح على الساعة خمسة عشان يلحق مسلسل كيد النسا) يدخلو فى خمس إصفار، و عامل المصنع اللى بيشيل و يحط و يتنفس مواد مسرطنة بيقبض الف و ميتين جنيه لو كان له واسطة و متسبت
حرة و نزيهة
طب ليه مش عايزين إنتخابات رئاسة أو كتابة دستور مادام الإنتخابات كانت "حرة و نزيهة"
إفكسو بقى، و رجعو مبارك مكانه و بلاش نضحك على بعض
خلينا نركز فى ألبوم شيرين الجديد
و إبقى سلملى على طنت نزيهة
سلام
ليست هناك تعليقات:
إرسال تعليق