مجاميع و إخراج و صرف باين (ألحان و كلمات و مغنيين و ممثلين و ديكور مابيقعش على الممثلين، و داخلى و خارجى)، بس السؤال اللى الناس اللى بتفكر سألته... "إيه العلاقة بين اننا دايما مع بعض و بين التليفون؟"
طب ما دام دايما مع بعض يبقى عيب صراحة أرن عليك، مانت مرزوع جنبى!
علم النفس 101 بيقول إيه، إرتباط الأشياء بطاقة إيجابية أو سلبية هو اللى هايحدد تقبل الافراد ليها
ماشى تمام، زى ما تلاقى كدة بالظبط واحدة بتاكل أيسكريم أو زبادى و هى هاتموت من الإنبساط، تحس انها هاتقع على الأرض من فرط اللذة
أو مثلاً تلاقى إعلان بيكرهك فى التدخين أو الإرهاب، تلاقى الإعلان غامق و كئيب و تحس و انت بتتفرج عليه انك لو قتلت نفسك يكون أحسن بردو
إسمه الإرتباط الشَرطى
بس النقطة هى جملة "مع بعض" و جايبلك كمية إختلافات فى الإعلان، تقريباً كل الناس المختلفة اللى "مش مع بعض نهائى"
و هو ده المهم، إجتماع كمية كبيرة من الناس على حاجة هاتخليك تقتنع بيها من غير تفكير، غصب عن مخك، الإجماع هايفرض رأيه، علم نفس بردو
من الأخر انا جايبلك ناس موافقة و مبسوطة و بتتكلم على مواضيع مهمة و دايماً مع بعض، انا هنا مش ببيع خط تليفون انا ببيع حالة نفسية، و وصلت
احنا مع بعض، إحنا متفقين، رأيك مش مهم، رأيك لازم يكون زيينا، لازم و إلا تتطرد من موافقة و مظلة المجتمع، لازم تلبس زينا، تتكلم زينا، تشرب و تاكل زينا، تحب اللى بنحبه و تكره اللى بنكرهه، تعوز اللى نعوزه و ترفض اللى نرفضه، تصدق اللى إحنا عايزينك تصدقه، لأن المجتمع صح و الفرد غلط
سؤال اليوم: معاك ستة تمانيتين؟
سلام
ليست هناك تعليقات:
إرسال تعليق