صباح شريف معطر برائحة الزهور و التشيز كيكاوشكنا على الانتهاء من الامتحانات و نكاد نتنفس الصعداء، بالعربى يعنى، الاجازة جاية و نسبنا الحكومة و صبحنا حبايب
بس المشكلة هى انى مش عارفة اعمل ايه؟
اروح المئوية بتاعت الثورة؟
مافيش مئوية؟؟ اه سورى قصدى الاربعين، المهم ان مشكلتى انى احدد موقفى
انا زعلانة فبالتالى هانزل فى مظاهرات و كدة؟
انا امنت بالامر الواقع و هانزل فى الذكرى عشان اكرام الميت دفنه و هاقعد اعيط جنب الحيط؟
انا مكبرة دماغى و اللى يجي يجي و اللى يروح يروح و المهم الانبساط يا معلم؟
انا اكتشفت انى ولا حاجة من التلاتة دول، لانا شايفة جدوى من المظاهرات لانها ببساطة تعبر عن خبط المواطن لراسه فى الحيط، ولا انا زعلانة لانى عارفة من الاول ان هدف الثورة ماكنش عشان الظلم كان ان جمال مبارك مايحكمش، و ده اتحقق، و انا مكبرة دماغى فعلاً بس المشكلة ان الدستور اللى اتكتب ضد مزاجى، و بالتالى فى تعارض مع السكوت
الدستور: ده لو كان اتكتب على ورق بفرة كان بقى افيد، مش لانه شرير و ظالم و وحش، لا خااااالص
ده لانه و ببساطة زى مابيقولو فى ترجمة الافلام الامريكانى:
هراء
النصباية اللى حصلت زى ما بيبعو المكنسة الذكية و العصارة الشقية و طقم البطاطين السحرى فى التلى شوبينج او الشراء عبر التلفزيون، كلام كتير زى العسل (على قلبى هواك) و فى الاخر تلاقى النتيجة (اشتم اشتم ماهو ده تمامك)
عارف لما بتنزل سوفت وير او تشترك فى عرض من عروض الموبايل، و يقولك " I've read and agreed to the terms and conditions " أو "تطبق الشروط و الاحكام" و حضرتك توافق لسبب بسيط انك عايز الفايدة و الخلاصة و فى الاخر كلنا بنلبس
بس انزل؟؟ اعمل ايه؟ اصوت؟ اولع فى نفسى زى البو عزيزى يمكن حد يحس؟
حد يفوق؟
الاخوان (بغبائهم المعتاد) هايشحنو قطعانهم (جمع قطيع، اللى هو الاهل و العشيرة) و يودوهم التحرير على اساس ان الناس مبسوطة و فرحانة و منشكحة
انا مبسوط و فرحان و منشكح بس لسبب تانى خالص
الدورى راجع يا رجالة
سلام
ليست هناك تعليقات:
إرسال تعليق