والله يا اخ انا تعبت، و كل ما اقول التوبة ترمينى المقادير (او المجادير زى حليم ما بيقول)
الاخ سيسي نصب على البلد فى كام مليون زى الكتاب ما قال، اشى صندوق تحيا مصر، و اشى حساب قناة السويس الجزئ الثانى، و اشى كهربا قاطعة و اشى رفع دعم و اشى اسعار والعة و الاخوة الثوار اكنك يابو زيد ما غزيت
طب حد يلايمنى على زمارة رقبة حد فيهم اطلع ازمر بيها فى ميدان التحرير و انا بغنى مايستهلوشى!
و وقعت الفاجعة، و رجعنا لأيام الحادى عشر من ايلول، و بما ان الحاج اسامة تعيش انت (اه ادى حال الدنيا) فالحاج الخليفة الجديد مابيسكتش، عاد اقوى و اعنف، بدل البلد اخد اتنين بسعر واحد (سوريا و العراق) و بقو فزاعة اتنين فى واحد، يخوفو بيها برة و هنا، و مش بس كدة اى عربى من معسكر الأعداء (على رأى الست لويزا ربنا يرجعها لعقلها) هايفكر يهاجر برة، هاياخد على دماغه و يرجع ايد ورا و ايد قدام
يبقى لابسين فى الحائط العربى
و من مميزات الحائط العربى انه مش بس مشكلة مؤسسات حكومية و عقلية رجعية بالمهلبية، لا ده يتميز انه بينتج نوع نادر من المواطن الزومبى، و ده بيتم العمل عليه منذ الصغر فى المؤسسات التعليمية، و اللى هى الوحيدة فى العالم كله اللى بتستعين بنظام التلقين، او كما احب ان اطلق عليه:
التلقيم، فهو بيعمل المعلومة ودن قطة و يحطهالك لقمة فى بقك (على خطى لواء الجيش اللى خطفته المخابرات المصرية برعاية محسن ممتاز من برة قبل الموساد و السي اى ايه ما يحطو ايدهم على ساندوتشلت الكفتة بتاعته)
و عشان تقارن فـفى اوروبا و الدول المتقدمة بيعلمو الناس بطريقة النقد او التشكيك و فهم المعلومات و مراجعتها (لعل و عسي حد فيهم يكسر نظرية اينشتاين زى الجاهبزة حدانا) فالناس على طول من حقها تراجع المدرس و الدكتور و العمدة و الوزير و الرئيس (اعوذ بالله من افكار الغرب الكافر اللى بيخرجو عن الحاكم دول)
و بكدة يطلع عندهم ناس اسوياء و يطلع عندنا زومبى معتبر ياخد المعلومة اللى التلفزيون بيقولها و معاها ساندوتش كفتة يتغذى عليه
سلام
ليست هناك تعليقات:
إرسال تعليق