العبيد

ريانا: الآن بالاسواق

صباح شريف صديقى فى العبودية، كيفك ؟؟ ايه الاخبار، تمام؟ طيب حلو جميل، شغال

انا عايزاك تركز، اه فعلاً في امتحان فى الاخر، بس ركز، هنا مش فى الصورة، خلصت تتنيح...!! تعلالى هنا شوية بقا، نتكلم الجد

البو عزيزى، شاب خلص فترة عبوديته الاولى و اتجه للتانية، خلص التعليم، اللى بيعلمك الرضوخ لأولى الامر و الخضوع للشخص الواحد، و سماع الكلام و تقبل الظلم و انت ساكت و مش بعيد كمان بعض الاحساس بالذنب: انت اللى غلطان

الفترة التانية وجبت: حاول يكون عبد للقمة عيشه، حاول ينضم للمصفوفة (المايتركس) يندمج مع مجتمع و الناس تصبح عليه و تمسى، يتبع القانون و يخاف من اللصوص، و ياكل و ينام

يتربط فى الساقية التانية يعنى

بس ماجتلوش الفرصة انه يكون عادى، واحد من الناس يعنى، بس انت نجحت.. مبروك

ابتسم... انت من الاخوة المواطنين، الشرفاء يا معلم كمان، انت بتنفذ الاوامر، بتنافق رؤسائك، تلعب طاولة ع القهوة، بتستحمل حماتك، تستتفه مراتك و تضرب ولادك بالجزمة

انت بتسمع الكلام: برافو

بس لازم تلت حاجات كمان، الرغبة و الخوف و الاحساس بالتأثير، عشان تبقى تحت التحكم تماماً، totally under control

الرغبة: هى لوحة الاعلانات الكبيرة اللى بيبعولك بيها حاجات كتير انت مش محتاجها، انت لازم تشترى معجون السنان ده او الصابون ده او مزيل العرق ده، مش عشان سنانك او عشان ماتقرفش اللى حواليك؟... لا، عشان الجنس

الخوف: وجود خوارج المجتمع، اللى ممكن يسرقوك يغتصبوك او يقتلوك، مش عشان هم جعانين، او غيرانين من موبايلك، لا عشان هم اشرار، و بس، و انت لازم تخاف و تعتبر انهم غلط، عشان تحس ان انت صح، تخاف من مواجهتهم، عشان احساس الخوف بيدى طعم لطيف بالمغامرة

الاحساس بالتأثير: احساس التأثير مرعب بجد، انت لازم تحس انك مؤثر، من اول مجاملات الطقم الشياكة الماركة اللى لابسه النهاردة فى الجامعة، لحد شهرة ريانا، لازم تجرى ورا احساسك انك مهم، الأب اللى بيخوف عياله، الظابط اللى بيرعب المشبوهين و بيحيه العساكر، احساس البلطجى و الناس بتخاف منه، احساس اكتر من النشوى الجنسية و مسبب للادمان

ماهو اصل انا لو سويت بين الناس، لغيت البطالة، سيبت الاستقرار يسود العالم، الناس هاتفوقلى، هاتشوف اخطائى، مش هاعرف اسيبهم يتلهو فى بعض

فهمتنى؟

سؤال اليوم: ما هى عقوبة انى اشتم نفسى؟

سلام