كامل كمال الكامل

فاكر فيلم الزواج على الطريقة الحديثة؟ فاكر دور عبد المنعم إبراهيم، لما كان العريس الكامل، و إسمه كان كامل كمال الكامل، أهو أنا إفتكرت الفيلم ده بالذات و الموقف اللى فى الصورة، و انا بفكر فى موضوع إنتخابات الرئاسة

من هو الشخص اللى يستحق عروستنا المكسحة التعبانة اللى عمرها 7500 سنة، لا و اللى لسة بيجلها خطاب

عايزيين أحسن عريس، طب بأمارة إيه؟ و إذا كانت العروسة نفسها من عجزها و خرفانتها إختارت عريسها خلاص، تبقو زعلانين ليه يا عواجيز الفرح،

أنا حبيت أعرف نبض الشارع، سألت واحدة ست عادية من الناس اللى بتشوفها فى الميكروباس، على موضوع الإنتخابات تخيل ردت عليا و قالت إيه:

-"لا مهما هيقولولنا زى ما حصل فى إنتخابات مجلس الشعب"
طبعاً بعد ما إستفسرت عن اللى "حصل" دة، طلع الإخوان المتأسلمين بيوقفو ستات منقبات على أبواب اللجان و ياخدو أسماء الستات اللى داخلة و يكتبوها على ورقة مكتوب فيها أسم المرشح و الرسمة بتاعته، بكل بساطة، و لما سألتها طب مادام إنتى مش مهتمة بمين اللى يكسب روحتى ليه، ردت و قالت أنهم قالو أن اللى مش هينزل ينتخب هيخصمو من معاشه خمسميت جنيه و إذا ماكنش بياخدد معاش هيخصموه من الفلوس بتاعة تجديد البطاقة (و الكلام دة إشعات على فكرة)

سألت راجل تانى أصغر من الست دى بس أب بردو و مسؤل عن عيلة، هاتنتخب مين؟

-"بصى لما الواحد مايلقيش حد ينتخبو يبقى يلجأ لبتوع الدين، أنا مع أبو إسماعيل بس بعد ما الجيش عمل عملته عشان يشيله، يبقى مفيش غير الشاطر"

ساعتها إتأكدت أن من مصلحة الإخوان لو مسكو البلد أنهم يخلو البشر جهلا و مغييبين، عشان يفضلو فى السلطة، لازم يسيبو قضية أطفال الشوارع و يمسكو فى حجب المواقع الإباحية و إلغاء تدريس الإنجليزى

عرفت أن عروستنا إختارت عريسها خلاص.


لازم نسترها بسرعة عشان إكرام الميت دفنه


سؤال اليوم: ليه اللى أوله شرط أخره نيون؟

سلام

(+18) سايبر سكس 2

عارف أنا بكتب الجزئ التانى ليه، عشان الجزئ الأول شهر البلوج بطريقة كرهتنى فيه و خلتنى عايزة أمسحه، بس قولت "طب أمسحه ليه، ما أكتب حاجة تفوق البشر اللى عمالين يقروه - مع العلم أنى قريته أكتر من مرة عشان أعرف عاجب الناس أوى كدة ليه - و فى نفس الوقت نصلح بعض المفاهيم شوية للى مش فاهمين"

خلاصة الجزئ الأول عشان اللى مش عايز يقراه كان عن تشوه العلاقة المباشرة بين الجنسين فـ بيستخدمو الوسائل غير المباشرة زى السايبر سكس

دلوقتى نتكلم فى نقطة مختلفة تماماً، و هى هل البيضة ولا الفرخة اللى جت الأول، يعنى هل ممكن يكون اللى شوه العلاقات الإنسانية و منها العلاقة الجنسية هو النت؟

السايبر لايف: فايس بوك، لأصحابك، order on line يعنى تطلب أكل و دوا و أدوات أونلاين، يوتيوب و تى فى ستريم، يعنى حتى التلفزيون إستبدلناه، wikipedia بدل المكتبات و الكتب، و قبلهم السايبر سكس
بمعنى ان الجهاز اللى قدامك ده بعدك عن الدنيا و فصلك عن الناس و إذا كان المطبخ جنبك أو عندك شغالة، يبقى كمان كسحك، (يعنى حد من حركتك تماماً)

أنا قولت المرة اللى فاتت أن الجنس سبب قرب الناس من بعضها، أحب أفهمها ببساطة: لو البشر أحادى الجنس و كل واحد بيتكاثر مع نفسه، مكنش هيبقى فى حاجة إسمها عيلة و أسرة و أصحاب، و حب، مش فقط وسيلة متعة، خصوصاً للرجالة

و كل ما أسأل حد منهم يتعامل معايا من منطلق أن ده أمر واقع و إزاى أذهل منه "أنا راجل و طبيعى أفكر على طول فى كدة"

بس حكمة ربنا بقى خلت الولاد مهوسين بالجنس بطريقة مش فهماها

المفروض أن ربنا خلقك حر بتحبس نفسك فى المنطقة دى ليه

طيب يا رجالة ، مادام مش ناويين تفكرو فى حاجة تانية، و تفضلو فى مستوى تفكير الحيوانات (الجنس و الأكل) يبقى سيبو الستات هى اللى تحكم

سؤال اليوم: رئيسى و دستورى السؤال دة: هل من كترت خطابها بارت؟

سلام

مطلوب دكر

مفيش حد حر فى الدنيا غير الأطفال، و شوية ناس كبار بس يتعدو على الصوابع
مع أننا عشنا طول طفولتنا مستنيين إمتى نكبر عشان محدش يقولنا نامو بدرى أو روحو المدرسة، كنا أحرار بس مش عارفين
أنت فاكر أنك حر؟ لأ، أنا أسفة أنى أبلغك أن إنت مش حر، ولا حتى لما تقوللى: "أنا عايش فى شقة لوحدى إزاى مبقاش حر"
أنت دلوقتى مقيد بمجتمع مينفعش تخرج عنه، مقيد بماضى تندم عليه و تتعلم منه، مقيد بمستقبل تقلق منه و تحاول تحضرله بأقصى ما تستطيع، و أخيراً عقلك مقيد بثقافة مفروضة عليك، بتخليك تفكر زى ما الثقافة دى بتقول

مطلوب دكر

و أنت طفل، معندكش ماضى، و مابتفكرش فى المستقبل، بتعيش لحظة حاضر طويلة و جميلة ما بينكدش عليك فيها غير الأشخاص البالغين، و أنت طفل أنت لسة مش فاهم يعنى إيه مجتمع و ثقافة، يعنى إيه تخلى بالك من مظهرك و تصرفاتك عشان المجتمع ده يقبلك، و إنت صغير قمة أمالك أنك تلعب، و أنت فعلاً كنت بتلعب

أنت عارف يعنى إيه أنك تبقى عارف الصح و المنطقى، و تحس أن العالم كله ضدك، و تحس أن أنت لو إتكلمت الناس اللى حواليك هايغلطوك، و تبتدى تشك فى نفسك و فى الآخر تبقى جزئ...

جزئ من القطيع

مطلوب دكر

طبعاً طبيعى، مش إحنا عايشيين جوة قطيع

سؤال اليوم: ما هو دستورك أيها المواطن الكامل الأهلية و المسئولية؟

سلام

هوبا مات يا رجالة

ما هو المعنى لهذا العبث الذى نعيش فيه؟

إسأل نفسك، هل تعرف ما هو المطلوب منك فى هذه الحياة؟

و هل تفعل ما هو مطلوب منك؟ و إذا كنت تفعل، فهل تفعله بضمير؟

و أنا بتفرج إمبارح على مسرحية تخاريف، أخدت بالى من حاجة لذيذة أوى،

إحنا بالفعل وصلنا لمرحلة فين أيامك يا مبارك، زى مالكتاب بيقول بالظبط وحدة الثورة باب العرب، درس الإجهاض

الحاجة قالها هانى رمزى: و مين المستفيد من أمية الشعب؟

مبارك بقالو فى المسؤلية تلاتين سنة، بمعنى جيل كامل إتخرج من تحت إيده، تلاتين سنة كنا on pause متقدمناش خطوة واحدة للأمام، ليه؟ ده هو المستفيد، لو البلد بقت كويسة هو لما يسيب الحكم هيعيش كويس...

تلاتين سنة مابنعملش حاجة غير أفلام السينما، و علاقتنا بالعرب إتدمرت، أسوأ حتى من أيام السادات و معاهدة السلام، و دلوقتى السعودية هتبوس إيد المجلس العسكرى عشان الثورة تبوظ و مبارك يطلع منها، و بيحاولو ينسو شعبهم أى حاجة عن الثورة عشان آل سعود يفضلو فى الحكم

تلاتين سنة، يعنى بنى آدم قضى طفولته و شبابه و إتجوز و خلف فى عهد مبارك، و أكيد عنده وظيفة يا إدارية (pushing paper) يا تنفيذية (application) توقف تام للعقل البشرى، لا إبتكار و لا خيال، أكل و جنس فقط، و حط اللمبى فى الدى فى دى

إسرائيل بقالها 62 سنة بس، ده عمرها كلة، لأ و إبتدت فى الستينات بس، و عندها جوايز نوبل فى العلوم أكتر ما إحنا كلنا كعرب أخدنا جوايز غنا و رقص و تمثيل

"Pride is the source of all the other sins"

هوبا حب يعمل إنقلاب، شرب هو السم

سلام

الحب كله

فاكر صاحبى الإخوانى إللى قولتلك عليه؟ أهو زى ما قولتلك قبل كدة أن الثورة جت عليا بخراب بس الموضوع طلع فيه نقطة إيجابية،

 البداية كانت إنه زود العيار عليا حبتين اليومين اللى فاته، و شغال عاليا بفديوهات الهداية، و سيديهات الإيمان، و بعد كدة يقعد يسألنى فيهم عشان يناقشنى (وهو الحقيقى بيمتحنى، بيشوف سمعتهم ولا لأ) من الواضح أنه شايفنى من "عاصية من الضالين" -نبيلة عبيد، الراقصة و السياسى-

بس على الشق الرومانسى زنقته و قولتله،

-أد كدة بتحبينى يا تيفة؟ هو راح مدينى ريأكشن شفيق ضرب لخمة و قال

-إيه...ها؟

-طبعاً أنت مش عايزنى أروح الجنة عشان نبقى مع بعض؟! :)  (دى سمايلى البراءة اللى بستهبلها عليه)

-أنا بتكلم لمصلحتك... روحت مقطعاه و قولتله

-عشان أنت بتحبنى..أنا مكنتش فاكرة أنك رقيق أوى كدة

الراجل معرفش يفلفص منى، و أضطر يعترف، (غصب عنه طبعاً) بإنه بيعمل كل دة عشان هو رقيق و رومانسى و نفسه أنى أدخل الجنة عشان هو أكيد رايح و مش عايز يروح لوحده

و دة ورانى وجه تانى للإخوان و السلفيين،

أنت فاكر أن الناس دى عايزة تكتب الدستور لوحدهم عشان يستبدونا و يفترو علينا؟ أبسولوتلى، دول بيحبونا حب ياجدع، عايزين يعرفونا ديننا بالقوانين و السجن و الجلد و قطع الرقبة، بإستخدام الكذب و النفاق و شهوة السلطة الكول سلو و كمان هايخشو النار عشان إحنا ندخل الجنة، مفيش إنكار للذات أكتر من كدة.

"مدنية الدولة" :أه صح

سؤال اليوم: أنت بتتنفس حرية، أمال شمة بنزين ليه؟

سلام

محطة فضاء السنبلاوين

أهلاً يا منص، واحشنى يا راجل، عارف، و انا فى المدرسة كنت مخنوقة من البلد بردو بس مكنتش عاملة البلوج ده، فكنت مرة بكلم المدرس بتاعى و بقوله،

-يعنى يرضيك كدة أن بلادنا ما يبقاش فيها مفاعل نووى و إسرائيل فيها، مع أن عمر إسرائيل خمسين، ستين سنة و إحنا عمر بلادنا سبعتلاف سنة؟

فالراجل بص لى بخبث و قاللى:

-و مين قاللك أن إحنا معندناش مفاعل؟!

-بجد يا مستر؟

راح الراجل سكت و إبتسم نص إبتسامة، و هز راسه بطريقة معناها (مش كل حاجة بتتعرف بتتقال)

و مرت السنين و عرفت أن الراجل كان بيشتغلنى، و فهمت أننا فى مصر كل واحد فينا مؤمن بـ فرض الكفاية: بمعنى أن ما دام فى حد تانى بيشتغل فخلاص كدة الفرض سقط من عليه، و عايش فى الوهم أن ما دام الناس عايشة و البلد شغالة، يبقى أكيد، فى حد فى مكان بعييييييييد     بيشتغل فى مصر

كل واحد قاعد (زيى) قدام التلفزيون بيتفرج على المسلسل، و بيشرب كوباية الشاى، و مطمن، أن فى فـالبلد صناعة و ناس شغالة و أن بيجرى بناء محطة فضاء السنبلاوين، و ميعرفش أننا تحت إحتلال إقتصادى

ميعرفش أن المصانع الأساسية فى البلد بتشتغل بمكينات مش مصنعة فى مصر و لو باظت بيجيبو قطع غيارها من برة و لو باظت بتتبدل من برة

ميعرفش أن آبار البترول و مناجم الفوسفات و الحديد و الدهب، مملوكة للحكومة و هى بتأجرها لشركات أمريكية هى اللى بتنقب فيها، و أن حتى المناجم المصرية اللى بيشتغل فيها مصريين، الأجهزة اللى بيستخدموها للتنقيب مستوردة

ميعرفش أننا عايشيين بالمعونات و القروض الدولية (و بيع المواد التعدينية و القطن و السياحة)

ميعرفش أن لو بلاد برة قطعو علينا مية و نور (بمعنى فرض عقوبات دولية و يعملو حظر و يقفلو حنفية الإستيراد) مش هايبقى فى صناعة فى البلد غير الصناعات الصغيرة و الحرفية، اللى هى بتقفل واحدة ورا التانية عشان الحكومة مبتهتمش بيها

إحنا عندنا حاجة واحدة بس اللى شغالة الله ينور: التلفزيون

سؤال اليوم: أنت بتحبنى يا تيفة؟

سلام

وردة من جوة جنينة 2

كفارة يا ريس

خيرت الشاطر...

أيوة خيرت الشاطر...

يا سلام، هو صحيح مش ساويرس، بس الراجل فاحش الثراء بردو، أهو على الأقل محدش هيقول أنه طمعان فى الرئاسة عشان يهبش زى غيره، (ولو إنه دخل السجن بتهمة تخص زمته المالية)

الإخوان مصممين يصدمونا و يخالونا always waiting for more

بس اللى أذهلنى هو رد فعل الناس اللى عـ تويتر و فايس "هما مش الإخوان قالو مش هنرشح حد للرئاسة و فصلو أبو الفتوح عشان نزل الرئاسة"

وده عامل زى لما واحد يقول فلان دة مش هيبطل إلا لما يتوب الكلب عن هز ديله: يبقى ليه الزهول دة أن الكلب مازال بيهز ديله

بص السيناريو ده:

-1: إلحق يا 2 أنا عايز أرجع فى كلامى بس مراتى هاتقول إنى راجل عيل، مش عارف أعمل إيه، دبرنى يا وزير

-2: سهلة يا عم ولا تنعى هم، أنا و إنت ننزل الشارع قدام الناس ندب خناقة لرب السما، مراتك تتطلع تبص من البلكونة تشوفك، هى اللى هاتبوس إيدك عشان ترجع فى كلامك

-1: أه والله فكرة، صح،  ييلا بينا

(نزلو بعد شوية رجعو)

-2: إيه يا عم دة، مش تلم لسانك شوية، أنت ناوى تزعلنى منك ولا إيه؟

-1: معلش، عندى دى

-2: و إيه موضوع "هأقطعك و و أرميك أنت و مراتك فى الشارع" ؟

-1: مش عشان مراتى تصدق

-2: انا قلقان منك

-1: عيب يا ساحبى

(ينزل 1 من البيت و يشترى حتة سلاح آلى، بينما يدخل 2 أودة النوم يشييك على الكام حتة آلى اللى عنده)

سلام