إيد واحدة



يوم الكرامة أم يوم الذكرى السنوية

صباح النور، النهاردة إمتحان اليوغوسلافى (أو اليابانى: المهم حاجة لا بتتقرى ولا بتتفهم، بتتحفظ بس)

إمبارح و أنا بتفرج على التلفزيون (و على رأى الست الوالدة إن أنا هيمتحنونى فى المسلسل) و قاعدة مركزة (طبعاً، مش هامتحن فيه) كان بيتكلم على فترة الستينات فى إسرائيل (المسلسل نفسه متصور سنة 1990 ما علينا)

لقيت فى المسلسل الجيش على المخابرات على وزارة الدفاع على رئاسة الجمهورية (دى مؤسسة مش عبد الناصر لوحده) بيتعاونو مع بعض عشان يرجعوا رأفت لمصر عشان ياخد ويك إند

عاجبنى أوى التعاون ده و سألت نفسى لو موضوع التعاون ده يتعمم على بقية مؤسسات الدولة، بمعنى إن وزارة الخارجية تبقى عارفة الإتجاه العام بتاع الداخلية و الدفاع (عشان التبريرات الدبلوماسية)

اللى عاجبنى جداً تصرف  وزارة الإعلام فهيا بعد ما عارفت يعنى إننا فى حالة حداد على الضحايا اللى بيموتو فى مختلف شوارع البلد دراما 1 و دراما 2 جابو أحلى مسلسلات عندهم يعنى عشان يخرجونا من موود الإكتئاب اللى إحنا فيه

عندك أرابيسك و شلش و سوق العصر وجدار القلب و ظل المحارب بتاع هشام سليم، و زيزينيا، حقيقي حركة لطيفة، مرسى بكو (و بيسألونا مبننجحش ليه)

المهم أن يبقى فى تعاون، مش كدة

"الشكك ممنوع لأن عم عشم مات، دلوقت الحياه خد و هات"

سؤال اليوم: إيه أخبار العدالة البطيئة؟

أشوفك بكرة

يوووو تيووووب

"المصريين أكثر شعب (بعد الأمريكين) فى البحث عن الجنس على الإنترنت فى العالم"

حاجات وحشة

صباح الخير، إيه أخبار الإمتحانات، الدنيا ضلمت صح؟

المهم

عمرك فكرت إن فى يوم من الأيام هتقرا جملة زى اللى فوق دى؟ ولا أنا، و على فكرة الجملة دى صحيحة، بس تفتكر ليه؟

إوعى تقولى الكلام لأهبل بتاع الحكومة (تأخر سن الجواز) لسبب بسيط، أولاً وجود ناس متزوجين بيدخولو على الحاجات دى بردو، ثانياً سن الدخول على النت فى مصر بيبدأ من 8 سنين

الكلام ده معناه أنها ثقافة مش كبت، إحنا عندنا ثقافة أن التفكير فى الجنس (و شرب المخدرات) يعتبر طبيعى و من الرجولة بالنسبة للشباب

بس السؤال إيه اللى خلى فى بلدنا الثقافة دى؟ (الأصابع الخفية؟؟!!!)

أولاً: من المهم أن المصريين يتلهو، بمعنى ميبقاش فيهم دماغ يفكروا فى حاجة تانية غير نفسهم و متعتهم الشخصية (سواء ناس من جوة أو من برة)

ثانياً: دى تعتبر من أرخص المتع فى حياة الشعب المكافح: يعنى النت دخل كل بيت من سنة 2000 و المخدرات بتنزل السوق مدعومة من زمان

ثالثاً: إحنا شعب لا يعرف القراءة (على رأى موشى ديان) دليلى أن ده ممكن يكون أول بلوج تقراه عشان فى صوره، هتقولى طب و إيه العلاقة؟ هاقولك القراية بتنور المخ، بتنشر الوعى، بتعرفك أن في حاجات تانية فى الدنيا غير الإستمتاع بالجنس و عمل الدماغ

عرفت ليه إحنا بنحب أمريكا، عشان أمريكا هية اللى بتجيب لنا المزز (ولاد و بنات)

سؤال النهاردة: هتعمل إيه خمسة و عشرين منه؟

أشوفك بكرة

كل شيجن إنكشفن و بان

نهار داخلى،

بهو قصر خلافة المهلبية،

صوت Britney Spears يصدح بأغنية you want a piece of me من شاشة التلفزيون البلازما ال300 بوصة (أيوة عايز حاجة؟) خليفة يتمايل و يرقص وهو يغنى "يو وان ا بيس أوف مى... ميس اميريكان دريم هههههه سافنتيين هممممممم" ثم يرن ال أى فون، يذهب و يبحث بين الشلت و الأرائك فيجده، ينظر به قليلاً ثم يتأفف و يقول:

-يا فتاح يا عليم،(ثم يضغط على الشاشة التتش) أيوة، إيه... ياسلام؟! يعنى تتجرأ و تتكلم عشان السبب الهايف ده؟ أنا مالى أنا إن كان فى عالم من عندنا خد جايزة؟ مهم كل يوم بيخدو، إيه الجديد؟ مش فى عندك وزير بيقف فى المواقف دى... أهه سفير أمريكا جاى...، الساعة كام؟ طب ماينفعش نخليها...، طيب إستعنا عالشقا بالله

يجرى خليفة بكرشه المتمايل الى شماشرجى القصر، الذى يقف فور رؤيته

-إطلع جيبلى العباية الزفرة من فوق أم صوف مارينو، و الساعة السويسرى و السيجار الكوبى و السبحة الماليزى و القلم الباركرالدهب و الجزمة البالى، وإوعى تنسى البلاك برى عشان التويتر و الأى باد عشان الفيسبوك و إبقى قول للكوافير يجهز الحنة الهندى الحمرا و الماكيير يبقى يجيب بارفان الشاليل الفرانساوى، بس قبل دة كلو روح للطباخ خالى يعمللى شوية كشرى و بصلة كبيرة و متنساش تبقى تجيب السواك

ثم يصدح التلفزيون بموسيقى عناوين الأخبار المميزة فيصرخ خليفة حتى إنتفخا منخاريه و توقف شعره و نفرت عروق وجهه

-مين اللى قلب القناة عالتلفزيون المحلى...

"عناوين الأخبار: تداعيات أحداث ماسبيرو، وصول طابور العيش غرباً إلى السلوم و طوابير البوتجاز جنوباً إلى شلاتين السودانية، وصول المعونات الأمريكية من القمح الفاسد و الأسلحة المحرمة ميناء الدخيلة منتظرة من يتسلمها مع عمى جميع أفراد الشعب و من يمتلك كلتا عيناه لم يتعدى عمره السادسة، وصول هيفا مطار شرم الشيخ لإحياء عيد ميلاد سوزان ال90 و إليكم التفاصيل"

....عاجبك كدة نفسى إتسدت

سؤال النهاردة: ليه بنموت فى أمريكا؟

أشوفك بكرة

تنحى؟ تخلى؟ إتخلع

ياه، زمن... بقالى بتاع يومين مكتبتش... أنا زهقت أصلى (زييك بالظبط) من كتر السياسة، و كنت خلاص هالجئ للكتابة الأدبية، بس بصراحة أستفزنى الناس ال....

هاسألك سؤال:

مبارك؟ إيه اللى حاصلو

أ) تنحى عن السلطة

ب) تخلى عن المسؤلية

جـ) الجيش خلعو

أيوة، أنت متخيل أن التحرير عمل حاجة! بس قبل أما تبتدى تزعق، عايزة أقولك الراجل ممشيش أصلاً

ركز
أنت شوفته بيقول أنا ماشى؟
شوفت ورقة بتقول أنه إستقال عليها إمضيته؟
خلاص... لما تبقى تشوف تبقى تتكلم


بالنسبة لسؤال المرة اللى فاتت:
نظرية المؤامرة بتقول إيه؟
أن أنا برئ و إنت برئ و فيه حد تالت بيلعب ما بينا صح؟ بس لو ركزت هتلاقى أن الموضوع أبسط من كدة، من الآخر الرجل اللى مشاننكلاك فى طريقك هى رجلك أنت مش رجل حد تالت (ركز)،
 كل المصريين دلوقت مستنيين الفرعون الجديد عشان يقدموله فروض الطاعة، عشان كلنا قطط سيامى

"نزلت و قلت أنا مش راجع، كتبت بدمى فـ كل شارع، سمعنا اللى مكنش سامع...
...و بكرة واضح قدامنا"

سؤال
إيه معلوماتك عن الخلافة الإسلامية؟

عيد ميلاد سعيد

أشوفك بكرة

كولو بامية 4

 أنا أسفة جداً، أعتذر عن غيابى لظروف قهرية (ماتحبستش لسة)، حقيقي، عاماً النهارده آخر كولو بامية (على ما أظن)

و) مرشحوا أحزاب الوسط (الإعتدال يعنى): يمثلهم (الأكثر شهرة) أيمن نور:

المميزات: هى هى العيوب: اللى هى بردو معرفهاش، الموضوع سياسى و كبير و الواحد لو إتكلم فيه هيتدبس

س) مرشحوا اليسار(اللى همة الإشتراكيين بالبلدى): عنهم حمدين صباحى:

المميزات: عودة الميرى و تعيين الحكومة، كل الشركات هترجع قطاع عام، عودة (تأميم شركة قناة السويس شركة مساهمة مصرية) على كنتاكى، و كافيه كوستا، و شيبساوى على طول (الحاجة هتبقى ببلاش تقريباً) و عودة قانون الإصلاح الزراعى بس بدل مالحكومة توزع أراضى هتوزع شاليهات مارينا (هو ده اللى موجود دلوقتى، ماعدش فيه أصلاً أراضى) و عودة "قالو الطالب يوم ما طلب العلم كتاب وسلاح" و أخر حاجة عودة عبد الحليم حافظ

العيوب: رجوع قها (أسوأ أنواع شركات الأغذية فى مصر) ، الأكل اللى هناكلوا هيبقى على حسب الموظف (يعنى لو مرتشى هنرجع تانى لأيام لانشون الكلاب و الألبان المشعة) و أخر حاجة هتبقى "مربوط عالدرجة التامنة... و الناس درجات و مرشح أخد التاسعة غير العلوات"

حـ) مرشحو أحزاب الثورة: (اللى همة الشباب بتوع الثورة) عنهم: بثينة كامل:

المميزات: أخيراً هنبطل نشوف وزرا فوق الأربعين (ممكن 45) ، هيبقى فيه نظرة شوية لمشاكل الناس اللى فى سننا (زى مناهج التعليم و توجه الحكومة لفك شفرة (و أمية) النت ، شغل المجالس هيقف (كشباب يعنى إحنا بنعرف نقف و نمشى كمان) عاماً يعنى الموضوع كلو هيحصلو أب ديت

العيوب: أن كل الناس العواجيز بتوع الحكومة هيطلعو فى التلفزيون يحللوا الموقف

game over

إجابة سؤال أمس: على رأى عادل إمام فى فيلم (الإرهاب و الكباب)

"ما فيش حاجة تعبانى غير رغيف العيش.. بقف فى صف طويل عريض.. بتعذب لحد أمابلقيه و بتعذب كمان وانا باكلو"

سؤال اليوم: عن نظرية المؤامرة: مين العدو بالظبط فى النظرية دى؟

أشوفك بكرة

كولو بامية 3

تابع: مرشحى الرئاسة:

هـ) مرشح الأحزاب الليبرالية: يمثلهم الدكتور محمد البرادعى:

المميزات: الليبرالية ذات نفسها، يعنى لا قيود ، كل واحد حر، خلفية أمريكية (و ياريت دماغك متروحش بعيد) بمعنى النظافة و النظام و الحياة الأمريكية لكل مواطن (البيت الدورين و الكلب أبو شعر دهبى)

العيوب: هى هى المميزات لو كنت من التيار الدينى (ما عدا النظافة و النظام، بيتهيئلى محدش يختلف عليهم) بالإضافة إلى الإعجاب الزائد بأمريكا كلنا زهقنا بقى، ممكن نعجب بمصر شوية (لما إن شاء الله تتعدل)

و) مرشحوا أحزاب التلميع الإعلامى: عنهم (إما توفيق عكاشة أو مرتضى منصور)

المميزات: بجد؟ مستنى تقرا مميزات؟ خلاص مش هكسفك...

قناة الفراعيين هى التلفزيون الرسمى للدولة، إعلان الحرب على إسرائيل و أمريكا، 99% من الشعب المصرى مش هيبطل ضحك، الكورة أو الشتيمة و الإبتزاز بالسيديهات هى المصدر الرئيسى للدخل فى الدولة، الحياة هتبقى آخر تهييس من الأخر

العيوب: إنتشار الخدرات و البيرة عشان بالليل لما الواحد يتفرج على التلفزيون، زيادة النفاق (ده على أساس إن البلد صريحة) ، كلنا هيبقى علينا سيديهات، إرتفاع معدلات الهبل و الإنتحار فى البلد

to be continued...تااااانى

(إنتشار التغييب الدينى، المخدرات و الهيبييز، أفلام المقاولات الجنسية، إستيراد الأغذية الفاسدة و المسرطنة، التعدى على الأراضى الزراعية، الإعتماد على الإستيراد الغذائى مقابل النفط، إنتشار الكوسة بالملوخية)
على فكرة أنا مبتكلمش عن اليومين دول، أنا بتكلم على ال سبعيينيات، أيام شباب الناس اللى ماسكة الحكومة دلوقتى اللى عندهم 60 و 70 و 80 سنة

سؤال اليوم: ماذا تعرف عن لقمة العيش؟

أشوفك بكرة

كولو بامية 2

أهلاً، أهلاً، كل سنة و إنت طيب، ها... قضيت إمبارح فين؟ شوفت حفلة حماقى؟ ولا أنا... المهم نكمل المرشحين



ج) مرشح اليمين الإسلامى: a.k.a. السلفيين: يعنى الشيخ حازم أبو إسماعيل:

المميزات: حفظ السيرة النبوية و سيرة السلف الصالح، حبس 45 مليون ست فى البيت (البلد هتبقى فاضية) عودة الجمال و الحمير كركوبة بدل العربيات (التلوث هيقل)

العيوب: هتنسى شكل الستات، هتودع التلفزيون (ما عدا الشيخ خالد عبد الله- بتاع قناة الناس- دة هيبقى التلفزيون الرسمى) و النت، منع السياحة، منع السينما، منع مطاعم الشارع، عودة القباب، والسواك بدل فرشة السنان، و أهم نقطتين:

- عدم الخروج على الحاكم: مالآخر يعنى دى آخر ثورة هتعرفها فى حياتك

- الموت و التكفير هما مصيرك إذا أنكرت ما هو معلوم من الدين بالضرورة (و هو أى حاجة حتطلع من بقهم)

من الآخر يعنى هنرجع الحجاج بن يوسف الثقفى

د) مرشح اليمين المسيحى: يعنى رجل الأعمال نجيب ساويرس:

المميزات: مليون جنيه لكل مواطن، تسديد ديون مصر ( إنت نسيت أن الراجل ده من أغنى 100 شخص فى العالم)، on tv هتبقى التلفزيون الرسمى، المورد الأساسى للإقتصاد المصرى هيبقى التليفونات، عمر ما أمريكا هتخش مصر بحجة التفرقة على أساس الدين (ممكن يخشو بحجة إضطهاض السلفيين) و أحلى حاجة بقى أنه هيجيب كرتون ديزنى الإسلامى

العيوب: ممكن يوكل حد يدير البلد بدالو عشان هيبقى مشغول بالبيزنس، هنلاقى بقية عيلة ساويرس متقسمين على الوزارات (ممكن تبقى حاجة كويسة لو هيصرفو من جيبهم على البلد) ، هنعلن الحرب على الجزائر، (دى بردو ممكن تبقى حاجة كويسة لو أنت متعصب كروياً)، أسوأ شئ أن أكيد فى الآخر هتقوم ثورة (و ده أكيد) هتقلب مصر للبنان

to be continued

سؤال النهاردة: علل سبب إنتشار مرض الزهيمر فى مصر من سنة 70

أشوفك بكرة