مونسانتو و عيد الحصاد

صباح العيش السخن،

و فرخة عايزة قمحة
و القمحة عند مونسانتو، ايوة مونسانتو

سيبك من كل القلق اللى حاصل بتاع ان مرسى كداب و مش هايقدر يحقق اللى وعد بيه، عن انتاجية القمح و الرز.
مرسى ماكدبش، و بالدليل... بس لازم نرجع بالتاريخ شوية.. و استحملنى فى القصة دى، لأننا لازم نعرف كلنا

1+1=2 على الاقل، ممكن تلاتة أو اربعة كمان


و اربعة و اتنين يبقو ستة و العدد يزيد و الزباين تزيد و معنى ذلك ان الفلوس هاتزيد

قالو هانضرب عصفورين بحجر.. نبان طيبين و حلوين و فى نفس الوقت نسجل المادة الوراثية براءة اختراع!!

إختراع يا كوتش

فى اوائل التمنينيات جربو و فشلو و رمو محصول القمح فى المحيط
فى اوائل التسعينات نجحو، و زرعو رز و قمح، الفدان فيه بيرمى مش عارفة كام اردب
البطاطس مش بتعفن و الطماطم بتستحمل الشتا!! معجزات (بس طماطم بيضا للاسف كلنا اتعرفنا عليها مع المكرونة)

حتى زرعة الدرة مافيهاش فاقد: سبحان الله بركاتك يا مرسى (مرسى!!)

من كام سنة قريت كتاب بيتكلم عن موضوع الهندسة الوراثية، سيبك من موضوع انها ممكن تسبب سرطانات او مشاكل فى الجهاز الهضمى او الجهاز العصبى.. التقيل ورا

شركات الهندسة الوراثية بتجهز البذور الزراعية (الاحسن، الاجود، اللى بتدى محصول اكتر و اكبر و مش معرض للامراض، و مش محتاج يترش "زى ما بيقولو") بحاجة زى القنبلة الموقوتة

بمعنى ان مثلاً بعد القمح ما يتزرع زرعته الاولى، بعد الزرعة التانية بيفقد قدرته على التكاثر، يعنى بيموت البذرة

و دى مش عشان هم اشرار و وحشين، لا دى اسمها حماية حقوق الملكية الفكرية، عشان ماتشتريش غير منهم

بس هم مابيعملوش كدة دلوقتى عشان بيربو زبون




سلام



 

علبة الزبادى

هى دى مصر:

 

تبع جوجل مابس، (كل الحقوق محفوظة ماعدا لينا طبعاً)

و لو اخدت بالك فى الخريطة دى (و اى خريطة عالمية من سنين) هاتلاقى خط منقط عند الجنوب الشرقى (يمين تحت) و الخط ده دايماً مكتوب عليه تلات كلمات

منطقة متنازع عليها

بس مش ده اللى هاتكلم عليه، انا هاتكلم على موضوع تانى، عن دولة تانية و رئيسها اللى بيمثلها، فى الدولة دى مافيش حد فى مكانه، مافيش حاجة فى مطرحها، و الناس عارفة، ده حتى سموها دولة الزبادى، لأن الشعب كله بعد ما بياكل الزبادى بيغسل العلبة البلاستيك و يشيلها و يرمى المعلقة فى الزبالة.. كلهم عارفين و كلهم مبسوطين

اللى بيتخرج عندهم من طب بيشتغل مؤلف رويات للجيب، و اللى بيخلص هندسة بيفتح كافيه، و اللى بيخلص زراعة بيشتغل موظف فى وزارة العدل (كل الكلام ده حدث بالفعل)

و فى الاخر ممكن تقعد فى كافيه تطلب قهوة يجبولك قصعة اسمنت.. ترفع قضية ماتلاقيش عدل، تعمل عملية تموت.. و كل الناس عارفين، و كلهم مبسوطين

و رئيسهم مش هايختلف عنهم أكيد

و تبع كلام كوندليزا رايس دى هى الفوضى الخلاقة.. لأن بالاوضاع دى استحالة الناس تعيش، بس عايشين، ضد المنطق و ضد العقل، ضد حتى أبسط القوانين الانسانية

مايعرفوش ان ليهم حقوق، مايعرفوش انهم بنى ادميين، ماتعلموش حتى يصرخو من الالم، مايعرفوش انهم عايشين، على طول دماغهم محطوطة على الاوتو بايلوت (القيادة الالية) بيضحكو على اللى اتعودو يضحكو عليه، بيزعلو على اللى اتعودو يزعلو منه، بيسمعو كلام بعض، و بيتكسفو من نفس الحاجات ، و بيتفشخرو بنفس الامتيازات، ماحدش فيهم هايعمل اى تصرف ثورى غير لما حد كبير يقولهم، لأنهم مالهمش رأى، و مش هايكونلهم رأى، هايفضلو ماشيين جنب الحيط (أو جواه) على نفس الخطوط، بنفس الاسلوب

خلصت

سؤال اليوم: ما هو الاستقواء بامريكا؟

سلام

القط الاسود 3

موضوع الآخرون أو "the others" أصبح ممل بالنسبة لى، لا بجد

انا عارفة اننا نفسياً مُصَمَّمين للتفكير بطريقة احنا و هم، بس ماتجيش تتخانق معايا على مين اللى بيزغدك فى ضهرك و المركب يتغرق (قديمة المركب بتغرق دى... خليها و البيت بيولع)

و بالذات فزاعة الفزاعة (المعروفة ايضاً بالبلاك بلوك) بما ان الاخوان كانو فزاعة فعارفين اللعبة بتتلعب ازاى

انا كنت قاعدة فى حالى زى اى يوم جمعة لطيف و بتفرج على سبايس توون و إذ فجأة لقيت الاخوان بيصرخو فى الشوارع زى الولية اللى ضاع منها ابنها و بيقولو:

"الحقونا يا خلق... غيتونا يا ناس.. حد يبلغ اى حد.. احنا واكلين علقة ماكلهاش حرامى فى مولد"

انا استغربت.. حقاً .. لا بجد (زهول و كدة) 

بقى الناس اللى كان معاهم تسليح مرعب ايام الاتحادية و نزلو ع الناس قتل و سحل و تعزيب، بيستنجدو؟؟ دى من علامات الساعة يا اخى

المهم ان بعد القصة اللطيفة دى فهمت اللعبة (اللى هانسميها سوا لعبة الغوازى يا محمد)

اللى حصل بالترتيب الزمنى:

- حكم قضائى بعودة عبد المجيد محمود " النائب العام السابق" لمكانه و الغاء الاعلان الدستورى و ما ترتب عليه

- حكم بحبس هشام قنديل "رئيس الوزراء الحالى" لتجاهل احكام القضاء

- يا نهار ازرق هو احنا مش بنحكم البلد ولا ايه!!!! ~ الاخوان

- هاتو شوية القضاه دول فى شوال و حطو مكانهم حبايبنا

- هاتنكشف كدة يا ريس، الناس مش هابلة

- نعمل ايه طيب؟

- أضرب ولاقى، العب دور الضحية

- صح، يلا نخرج شوية من كبار الوطنى و نطلع ضد القضاه على بعض

-ايوة يا باشا و ممكن كمان نتهاجم عشان التمثيلية تكون واقعية، و اهو نلم شوية عيال الفيسبوك

البلاك بلوك حتى لو ليهم وجود مادى حقيقي (و ده اصلاً مشكوك فيه) مش هايكون ليهم التأثير الرهيب للأخوان المسلمين ايام مبارك

البلاك بلوك أمنجية إن مكانوش رتب فى امن الدولة اصلاً، لخلق الصراع اللى المواطن المنتخب دافع الضرائب بيحب يتفرج عليه، لكن لا دول ولا دول همهم ان حياتنا تكون افضل

و بانو بانو بانو على اصلكو بانو

سلام

صوابع الرئيس

انا مكسوفة ..

جداً، فوق ما تتخيل

مش لأنى كنت اقدر اغير شئ من اللى بيحصل، لا... انا مكسوفة حتى من شعور العجز

مكسوفة من ان أهل بلدى خدو على قفاهم كذا مرة و سكتو... لا و مش بس كدة، بدل ما يوجّهو غضبهم للاتجاه الصح بيلطشو فى بعض

بدل ما يقاومو الحكومة عشان تنقذ الاقتصاد و تبطل سرقة و شرب قهوة و شاى بتلتميت الف جنيه فى تلات شهور، بيسرقو من بعض

بدل ما يكون ليهم حياة سليمة بيدمرو حياة بعض

رئيسى بيلعب فى بتاعه فى المحافل الدولية

الناس بتقتل بعضها فى الشوارع فى نفس الوقت اللى واحد بيلعب بلاى ستاشن و بيقتل بردو

الغبا وبا

الناس عايشين جوا كوكب دماغهم، نفسيتهم مريضة لدرجة انهم بيبررو الشر و يمدحوه

اصل ده شر نقى، من المنبع: قتل، تشويه، أهدار كرامة، تلويث سمعة، قتل برأءة أطفال

سرقة قوت شعب، سرقة ادميته، جروح نفسية لبنات فى أول حياتهم

غياب عقل شباب بالكورة و المخدرات و اى اسلوب الهاء

انك تعيش وسط الزبالة بريحتها النتنة و منظرها القبيح، لحد ما عينك تتعود عليها و تشوف فيها الجمال و تقول سبحان الله

و لو حد حاول ينضف الزبالة دى تمنعه و تقول: الملحد الكافر عدو الدين

انما يريدو ان يلهوكم عن ذكر الله

يريدو ان تشيع الفاحشة

كبرت كلمة تخرج من افواههم

و تقتله، و الناس تسقف و تقول يستاهل

او على الاقل يقفو يتفرجو من سكات

حتى اللى ممكن لو فكر يتوجع.. هايدور وشه الناحية التانية

دور وشك.. اقفل الكلام الفاضى ده و دورلنا على فيلم حلو و سجارة حشيش

سلام

الدولة الاسلامية 1

صلى على النبى أو مجد سيدك، أو اذكر داروين بالخير

تانى وقفة ليا بعيداً عن تكملة كتابة طريقة عمل الثورة للأبلة نظيرة، هابتدى بتعريف للدولة الاسلامية من وجهة نظر "متدينة" أو "ذات المرجعية الاسلامية"

"الامة المسلمة: لا ترتبط الأمة المسلمة ببقعة معينة من الارض،و انما مساحة عملها الارض كلها، فحيثما تمكنت من إقامة حكم الله فذلك مقرها الاول و نقطة أنبعاثها، و بعد ذلك تتوسع دائرتها منه بالدعوة و نشر الفكرة حتى تشمل الارض جميعها...."

و فى حالة ان العالم مش عاوز أو مش عارف (و ده شئ مش منطقى من ساعة فضيحة 11 سبتمبر)

"...فمُهِمة الامة باقية، و عليها واجب كبير، و هو الجهاد فى سبيل الله حتى تتمكن من تطبيق منهج الله فى الدنيا قاطبة"

و كلنا عارفين يعنى ايه الجهاد لأن المؤلف بيكمل كلامه عن الحرب!!

سيبك من أعتراض اى بنى ادم متحضر أو مثقف، أو حتى زيى سِلمىِ، ان فكرة الحرب دى ضد المبادئ الانسانية (نرجع نقول انا اللى يمكن ساذجة شوية و عبيطة فى معظم الاحيان)

بس حقيقى، حرب إيه؟ أدوات ايه اللى فى ايد اى حد من "الامة الاسلامية" اللى تسمحلهم انهم يحاربو حتى دوله زى السودان الشمالية مثلاً

ايوة باكستان و إيران و قبل كدة العراق كان عندهم أسلحة ردع، و يقال بردو أسلحة نووية، لكن فكر معايا شوية كدة... 

إحنا كمصر بنشحت من ايام مبارك الاسلحة من المعونة العسكرية من امريكا، معظم دول شمال افريقيا هم حكامها ثبات عروشهم، حتى الدول الغنية زى دول الخليج و السعودية، جيشهم لا يقوى على دخول حرب ودية، (أيوة زى الماتش الودى)

أما الدول الاكثر خطراً زى اللى ذكرتهم الاول فأمريكا عاملة حسابها و مقصقصالهم ريشهم أول باول، و غرقانين فى حروب أهلية أو مشاكل داخلية

انا مابقولش كدة عشان نحارب حد انا بس بفتكر موقف محمد صبحى فى مسرحية تخاريف و هو بيكلم السواق اللى بيكلكس للهانم عشان تنزل للبيه، فمحمد صبحى أو آدم عبد ربه آدم بيقوله هاعورك فالسواق بيرد عليه و يقوله

"ماتقدرش" 

بالظبط كدة، و عشان ماطولش و بما اننا كلنا عارفين ان الكلام عن المشروع الاسلامى ده كلام للاستهلاك المحلى، فانا هاكمل الكلام عن الدولة الاسلامية من منطلق نظرى و مقارنته باللى بيحصل على ارض الواقع، بس كلنا فى الاخر عارفين ان تحقيق دولة اسلامية بيتحقق شكلياً فقط لإرضاء العامة و لإستخدام "عدم الخروج عن الحاكم"

سلام

عايز حقى

صباح الفل، معلش هنقتطع وقت ابلة نظيرة و نأتيك بخبر عاجل، مجلس الشورى اللى ظهر فى حياتنا زى العمل الرضى بعد ما مجلس الشعب انحل، قرر انه اوكى اننا نبيع اصول البلد.. بمعنى أخر

صوتى يا ام انشراح، مصنع الحديد و الصلب راح

فقد أقر مجلس الشورى (مبدئياً) بالقانون اللى ماعنديش فكرة مين اللى قدمه (قنديل!! لا يا راجل) بتاع الصكوك الاسلامية

نبتدى القصة من الاول، 

الصك هو العقد و ممكن نسميه ما بينا و بين بعضينا "حُجّة البيت" (أسأل جدك) و بيه تقدر الحكومة تبيع شئ مادى الوجود تملكه (و هو البلد) لمدة معينة (قول 99 سنة زى ما قناة السويس كانت ملك بريطانيا) بعديها (المفروض) ترجع الحاجة للحكومة

بس مين يعنى اللى هيشترى صكوك منجم السكرى ولا الاثار المصرية مثلاً؟

الاجابة سهلة.. اى حد و البيع بالمزاد العلنى لأعلى سعر (لو معاك شيل يا حبيببي) المشترى (أو المنتفع) سواء مستثمرين، حاملين اسهم، أو حتى الشيخ حمد (أوبس) هايشغلو المشروع و يدفعو فردة للحكومة، و المكسب بالكامل ليهم، و المكان أصبح بتاعهم يعملو فيه مابدهم

من الاخر الاخوان بتستلف بالفايظ من البنك الدولى، و كمان بتبيع فى الاصول المصرية: عايزين فلوس كتير و دلوقتى حالاً

و البس و تقل جامد، عشان هاتخر على دماغنا كلنا

سلام

دليل أبلة نظيرة لعمل ثورة 3

أهلاً بصديقى الثائر فى رحلة البحث عن طريقة عمل الثورة،

تخيل معايا الاتى:

نازل الصبح من بيتك بعد الفطار المتين، راكب العربية أو المترو، رايح الجامعة أو الشغل...
الدنيا لذيذة

ايه اللى ممكن يخليك تعمل ثورة أصلاً؟

بالظبط: الثورة محتاجة سبب، هدف نبيل، مسمى رائع و نادر و متسامى، أو السبب الحقيقي، الفلوس.. أو بمعنى ادق البيزنس

زى مثلاً ثورة الظباط الاحرار، أو التصحيح بتاعة السادات...

أو المثل الاكبر، ثورة 25 يناير (أه فى حاجة؟؟)

بمعنى انتقال البيزنس من ايد جمال و علاء مبارك لأيد و رجل منظمة الاخوان المسلمين و ممثلهم الاكبر فى مصر: خيرت الشاطر، بس السؤال هنا: إزاى الاخوان عملوها؟
دى سهلة جداً و اسمها الحركى لعبة الطيب و الشرير، الملك فاروق طاغية.. جمال عبد الناصر شهم، مبارك كافر و خارج عن الدين، محمد مرسى بيصلى الفجر

ايه ممكن تكون الاسباب الرئيسية للثورة (بالنسبة للشعب الطيب)

الفقر و الظلم و السخرة و فيلم الارض لو عطشانة، كل ده جميل و ممكن بس و انت بتعمل فيلم عن الثورة، الفقرا موجودين من ايام الملك و عمرهم ما ثارو، الظباط هم اللى ثارو، عيال الفايسبوك و الجامعة الامريكية هم اللى ثارو، يبقى السبب الطبيعى للثورة هو الغلاسة

لو ركبت العربية و مالقتش تحط بنزين، لو ماعرفتش تسهر باليل عشان حظر التجول، لو ماعرفتش تشوف الاغنية عشان النت فاصل، من الاخر اللى بيعمل الثورة هو اللى حاسس انه ممكن يغير حاجة، لكن الفقرا ماعندهمش الاحساس ده، عندهم راحة اليأس، الشعور الذيذ بالعجز اللى بيهرب من الشعور بالذنب و المسؤلية

و لنا عودة


سلام